فوتو: جي يلليۋستراتسياسى
- ماقپال قۇرمانجانقىزى, بۇگىندە جاساندى ينتەللەكت ارقىلى قازاق ءتىلىن ۇيرەتۋدىڭ وزەكتىلىگى مەن قاجەتتىلىگى قانداي؟
بۇگىندە تەحنولوگيانىڭ قارىشتاپ دامۋى ءبىلىم بەرۋ سالاسىندا دا جاڭا وزگەرىستەرگە جەتەلەۋدە. جاساندى ينتەللەكت (جي) ارقىلى ءتىل ۇيرەنۋ الەمدىك ترەندكە اينالىپ وتىر جانە بۇل ءۇردىس قازاق ءتىلى ءۇشىن دە وتە ماڭىزدى. قازاق ءتىلىن ۇيرەنۋشىلەر ءۇشىن ىڭعايلى ءارى ءتيىمدى شەشىمدەر قاجەت. اسىرەسە, قازاق ءتىلىن ەكىنشى ءتىل رەتىندە مەڭگەرۋشىلەر, شەتەلدەگى قانداستارىمىز, قالا تۇرعىندارى مەن جاستار ءۇشىن زاماناۋي ءادىس ماڭىزدى. وسى تۇرعىدا, TilQazyna جوباسى ءتىل ۇيرەتۋ ادىستەمەسىن تسيفرلىق دەڭگەيگە كوتەرەتىن العاشقى كەشەندى شەشىمدەردىڭ ءبىرى بولارى ءسوزسىز.
- ءموبيلدى قوسىمشا وزگە دە قازاق ءتىلىن ۇيرەتەتىن پلاتفورمالاردان نەسىمەن ەرەكشەلەنەدى؟
TilQazyna – قازاق ءتىلىن ۇيرەنۋگە ارنالعان العاشقى ينتەللەكتۋالدى پلاتفورما. ونى ءتىل ۇيرەتۋدىڭ جاڭا باعىتى دەپ اتاساق تا بولادى. بۇل تەك ادەتتەگى ءتىل ۇيرەتەتىن قوسىمشا ەمەس, جاساندى ينتەللەكتكە نەگىزدەلگەن تولىققاندى كومەكشى قۇرال. باستى ەرەكشەلىگى – قوسىمشا حالىقارالىق CEFR ستاندارتىنا (A1–C1) سايكەس جۇيەلەنگەن. قولدانۋشىنىڭ ءتىلدى مەڭگەرۋ دەڭگەيىن اۆتوماتتى تۇردە انىقتاپ, سايكەس تاپسىرمالار مەن ساباقتار ۇسىنادى. قازاق تىلىندە ءماتىندى دىبىستاۋ (TTS) جانە داۋىستى تانۋ (ASR) تەحنولوگيالارى ەنگىزىلگەن, بۇل ۇيرەنۋشىگە سويلەپ ۇيرەنۋگە جانە ايتىلىمىن جەتىلدىرۋگە مۇمكىندىك بەرەدى.
قوسىمشانىڭ تاعى ءبىر ەرەكشەلىگى – جي مۇمكىندىكتەرى ارقىلى ءار قولدانۋشىعا جەكە باعدارلاما تۇزىلەدى. جىبەرىلگەن قاتەلەرگە قاراي جۇيە وقىتۋ ءتاسىلىن بەيىمدەپ وتىرادى. TilQazyna چاتبوتى قولدانۋشىعا 24/7 كومەك كورسەتۋگە دايىن. بۇل قازاق ءتىلىن ۇيرەنۋدە مۋلتيمودالدى جانە دەربەستەندىرىلگەن تاسىلمەن جۇمىس ىستەيتىن العاشقى وتاندىق جوبا بولماق.
- ءموبيلدى قوسىمشانى ازىرلەۋگە قانشا مامان جۇمىلدىرىلدى؟ قانشا ۋاقىتتى قامتىدى؟
TilQazyna قوسىمشاسىن ازىرلەۋ جۇمىستارى 2024 جىلدىڭ ورتاسىندا باستالدى. قازىرگى تاڭدا پلاتفورما ۇزدىكسىز جاڭارتىلىپ, جاڭا ساباقتارمەن تولىقتىرىلىپ كەلەدى. جوبانى جاساۋعا 25-كە جۋىق مامان اتسالىسۋدا. ولاردىڭ قاتارىندا ءتىلشى-عالىمدار, باعدارلاماشىلار, جاساندى ينتەللەكت ماماندارى, دەرەكتەر ينجەنەرى, ديزاينەرلەر جانە جي زەرتتەۋشىلەرى بار.
- قوسىمشانى پايدالانۋشىلار قانداي باعىتتاردا انا ءتىلىمىزدى ۇيرەنە الادى؟
قوسىمشا تەك سوزدەردى جاتتاپ قانا قويماي, قازاق ءتىلىن كۇندەلىكتى ومىردە قولدانۋعا مۇمكىندىك بەرەتىن ناقتى داعدىلاردى دامىتادى. قولدانۋشىلار ءتۇرلى دەڭگەيدەگى اۋديوماتىندەر مەن سويلەۋ ۇلگىلەرىن تىڭداۋ ارقىلى تىلگە دەگەن تۇسىنىكتەرىن ارتتىرادى. ءوز داۋسىن جازىپ, دۇرىستىعىن تەكسەرۋگە بولادى. جاساندى ينتەللەكت ايتىلىمدى باعالاپ, قاجەت بولعان جاعدايدا تۇزەتۋلەر ۇسىنادى.
قوسىمشادا قازاق تىلىندە سويلەسۋگە ارنالعان دايىن ديالوگتار دا بار. ءتۇرلى گرامماتيكالىق تاپسىرمالار مەن كوپ تاڭداۋلى تەستىلەر قاراستىرىلعان. ءار ساباقتا جاڭا سوزدەر مەن ولاردىڭ اۋدارماسى ۇسىنىلادى. سونىمەن قاتار, سوزدەردى جاتتاپ, ەستە ساقتاۋعا ارنالعان ارنايى جاتتىعۋلار مەن ويىن ەلەمەنتتەرى دە قامتىلعان.
- قوسىمشا قاشان جالپىعا قولجەتىمدى بولادى؟ قولدانۋ اقىلى ما, تەگىن بە؟
قوسىمشانىڭ بەتا-نۇسقاسى 2025 جىلدىڭ قاراشا ايىندا كوپشىلىككە ۇسىنىلادى. قولدانۋشىلار ءۇشىن بارلىق فۋنكتسيونال تەگىن قولجەتىمدى بولادى. ال, تولىق نۇسقاسى 2026 جىلى قولدانىسقا بەرىلەدى.
- ءموبيلدى قوسىمشا قانداي جي جۇيەسىندە جاسالدى؟
TilQazyna قوسىمشاسى جاساندى ينتەللەكتتىڭ سوڭعى ۇلگىلەرىنە نەگىزدەلگەن. قازاق تىلىندەگى داۋىستى تانۋ ءۇشىن Whisper large-v3 جۇيەسى, ءماتىندى داۋىسقا اينالدىرۋدا KZ-TTS تەحنولوگياسى قولدانىلادى. سونىمەن قاتار, قازاق تىلىنە ارنايى بەيىمدەلگەن ۇلكەن تىلدىك مودەل – Llama ارحيتەكتۋراسىنداعى جۇيە جۇمىس ىستەيدى. بارلىق تەحنولوگيالار قۋاتتى سەرۆەرلەردە ورنالاستىرىلىپ, قاجەت كەزدە اۆتوماتتى تۇردە كەڭەيتىلەدى.
- تەحنيكالىق ۇتىمدى تۇستارى قانداي؟
قوسىمشانىڭ تەحنيكالىق ارتىقشىلىقتارى وتە كوپ. قولدانۋشىنىڭ ءبىلىم دەڭگەيىن ءدال انىقتاپ, سوعان ساي جەكە باعدارلاما ۇسىنۋ – باستى ارتىقشىلىقتاردىڭ ءبىرى. جىلدام ءارى قۋاتتى سەرۆەرلەردىڭ ارقاسىندا قوسىمشا كەدەرگىسىز جۇمىس ىستەيدى. وقىتۋ ءماتىن, دىبىس جانە سۋرەت ارقىلى ءتۇرلى فورماتتا وتەدى, بۇل ۇيرەنۋدى جەڭىلدەتەدى. قولدانۋشىعا وقۋ بارىسى تۋرالى حابارلامالار جىبەرىلىپ, بارلىق كونتەنت وففلاين پايدالانۋعا بەيىمدەلۋى مۇمكىن.
- قوسىمشا پايدالانۋعا بەرىلگەننەن كەيىن جەتىلدىرىلىپ وتىرىلا ما؟
ءيا, بۇل ءتىرى جۇيە. پايدالانۋشىلاردان كەرى بايلانىس جيناپ, قوسىمشا ۇنەمى جاڭارتىلىپ وتىرادى. ءجيى جاڭارتۋلار مەن قوسىمشانىڭ جاڭا فۋنكتسيالارى ەنگىزىلەدى. جاڭا ماتىندەر مەن اۋديولار قوسۋ, جي مودەلدەرىن قايتا وقىتۋ, ينتەرفەيس پەن قولايلىلىقتى ارتتىرۋ جوسپارلانعان. مۇعالىمدەر ءۇشىن ارنايى قۇرالدار دا كەڭەيتىلمەك.
- اڭگىمەڭىزگە راقمەت!
