اڭىزدارعا ارقاۋ بولعان, تاستارىنداعى پەتروگليفتەرىمەن ءۇنسىز سىر شەرتەتىن, اراسان بۇلاقتارىمەن شيپا دارىتقان, كونە وركەنيەتتەردىڭ ىزىمەن تاريح تۇنعان بۇل ولكەدەن شىققان اۋلەتكە تەرەڭ دۇنيەتانىم, قاجىرلى ەڭبەك, توزىمدىلىك پەن نازىك تە كوركەم تالعام دارىعان. كورمەگە اۋلەتتىڭ بىرنەشە بۋىنى – اعا ۇرپاقتان باستاپ شوبەرەلەرگە دەيىن قاتىسىپ وتىر. ولاردىڭ قاتارىندا سوعىس ارداگەرى, سۋرەتشى ءارى ونەرتاپقىش احمەتقالي قاسىمبەكوۆ جانە ونىڭ ۇرپاقتارى: بالالارى بولات, ماناربەك, جانارگۇل, بەگايىم, نەمەرەلەرى ايعانىم دۋلاتقىزى, گۇلميرا اپپاسوۆا, نازەركە ماناربەكقىزى, ءىلياس سليامعازى, وركەن قاسىمبەكوۆ, ادەمى نۇرتىلەۋ, سونداي-اق شوبەرەلەرى – حامزا دۋلات ۇلى مەن الەن يزباساروۆ بار. ەكسپوزيتسيا قولدانبالى ونەر, ءمۇسىن, زەرگەرلىك ونەر جانە ديزاين سالالارىنداعى تۋىندىلاردى قامتيدى. اۋلەت مۇشەلەرىنىڭ شىعارماشىلىعى شەبەرلىك دەڭگەيىنىڭ جوعارى بولۋىمەن, ستيلدىك سان الۋاندىعىمەن جانە ماتەريالعا دەگەن تەرەڭ قۇرمەتىمەن ەرەكشەلەنەدى. كورمەگە كەلۋشىلەر كوركەم ءتىلدىڭ ۋاقىت اعىمىنداعى ەۆوليۋتسياسىن, ءار اۆتوردىڭ دارا شىعارماشىلىق قولتاڭباسىن, سونداي-اق وتباسىلىق داستۇرلەردىڭ ءار تۋىندىدا قالاي كورىنىس تاباتىنىن تاماشالاي الادى.
ءا.قاستەەۆ اتىنداعى مەملەكەتتىك ونەر مۋزەيىندە قاسىمبەكوۆتەر اۋلەتىنىڭ شىعارماشىلىعىن تانىستىرۋعا ارنالعان «ونەرلى اۋلەت ورنەگى» كورمەسىندە ءمۇسىنشى بولات قاسىمبەكوۆتىڭ ونەرى ەرەكشە ورىن الادى. نازارعا اۆتوردىڭ ءار كەزەڭدەگى – ەرتەرەكتەگى جانە كەيىنگى جىلدارداعى جۇمىستارى ۇسىنىلعان. ولاردىڭ قاتارىندا: «قورقىت» (2013), «ابىز اتا» (قولا, 2012), «الما ۇستاعان بالا» (گيپس, 2012), «اباي قۇنانباي ۇلى» (گيپس, 2019), «دىنمۇحامەد قوناەۆ» (گيپس, 2020), «شاحمات فيگۋرالارى» (قولا, 2023–2024), سونداي-اق 2024–2025 جىلدارى جاڭادان قولادان قۇيىلعان تۋىندىلارى بار. كورمەدە الماتى, ۇزىناعاش, جاركەنت جانە ماڭعىستاۋ قالالارىندا ورناتىلعان مونۋمەنتالدى شىعارمالاردىڭ فوتوماتەريالدارى قويىلعان: «ەلتىندى باتىر» (2006), «شوقان ءۋاليحانوۆ» (2008), «س.نۇرماعامبەتوۆ» (2013), «باعاي باتىر» (گرانيت, 2004) جانە باسقالار.
«ونەرلى اۋلەت ورنەگى» — بۇل تەك كوركەم جەتىستىكتەردى عانا ەمەس, سونىمەن بىرگە وتباسىلىق داستۇرلەردىڭ, رۋحاني قۇندىلىقتار مەن ونەرگە دەگەن سۇيىسپەنشىلىكتىڭ قۋاتىن بەينەلەيتىن شىعارماشىلىق اۋلەتتىڭ ءتىرى شەجىرەسى. كورمە مادەنيەتتەگى ساباقتاستىقتىڭ ماڭىزىن ەسكە سالىپ, ۇلتتىق كوركەم مۇرانى ساقتاۋ مەن دامىتۋعا شابىت بەرەدى», دەيدى «قازاقستان بەينەلەۋ ونەرى» ءبولىمىنىڭ ءارى كورمە جەتەكشىسى گ.جۇبانوۆا.
الماتى
