فوتو: اشىق دەرەككوز
بەس كۇندىك جۇمىس كەستەسىمەن ەڭبەك ەتەتىن قازاقستاندىقتار 6-8 ماۋسىم ارالىعىندا ۇزاق دەمالىسقا شىعادى.
قۇربان ايت مەرەكەسى 2025 جىلى 6, 7 جانە 8 ماۋسىم كۇندەرى اتاپ وتىلەدى. بۇل اقپاراتتى بۇعان دەيىن قازاقستان مۇسىلماندارى ءدىني باسقارماسىنىڭ (قمدب) شاريعات جانە ءپاتۋا ءبولىمى راستاعان بولاتىن.
بەس كۇندىك جۇمىس اپتاسى ءۇشىن:
- 6 ماۋسىم (جۇما) – دەمالىس;
- 7 ماۋسىم (سەنبى) – دەمالىس;
- 8 ماۋسىم (جەكسەنبى) – دەمالىس.
التى كۇندىك جۇمىس اپتاسى ءۇشىن:
- 6 ماۋسىم (جۇما) – دەمالىس;
- 7 ماۋسىم (سەنبى) – جۇمىس كۇنى;
- 8 ماۋسىم (جەكسەنبى) – دەمالىس.
قۇربان ايت دەگەنىمىز نە؟
قۇربان ايت – مۇسىلمانداردىڭ ماڭىزدى مەرەكەلەرىنىڭ ءبىرى. ول قاسيەتتى رامازان ايىنان 70 كۇن وتكەن سوڭ اتاپ وتىلەدى. بۇل مەيرام – قۇرباندىق شالۋ, مەيىرىمدىلىك تانىتۋ, مۇقتاج جاندارعا كومەكتەسۋ سياقتى ىزگى امالداردى قامتيدى.
مەرەكە كۇنى:
- مەشىتتەردە ايت نامازى وقىلادى;
- قۇرباندىققا مال شالىنادى (قوشقار, سيىر نەمەسە تۇيە);
- قۇرباندىق ەتى وتباسى, كورشىلەر جانە مۇقتاج جاندار اراسىندا بولىنەدى.
قۇربان ايت مەرەكەسىن دەمالىس كۇنى رەتىندە بەلگىلەۋ تۋرالى شەشىمدى قازاقستاننىڭ ەڭبەك جانە حالىقتى الەۋمەتتىك قورعاۋ مينيسترلىگى قمدب ۇسىنعان كۇنتىزبەگە سايكەس قابىلدايدى.
ماۋسىمدا نەشە كۇن دەمالىس بولادى؟
بەس كۇندىك جۇمىس اپتاسىندا:
قازاقستاندىقتار ماۋسىم ايىندا 10 كۇن دەمالىپ, 20 كۇن جۇمىس ىستەيدى.
التى كۇندىك جۇمىس اپتاسىندا:
6 كۇن دەمالىس, 24 جۇمىس كۇنى بولادى.
ماۋسىم ايىنداعى كاسىبي مەرەكەلەر
ماۋسىم – ءتۇرلى سالا ماماندارى ءۇشىن كاسىبي مەرەكەلەرگە تولى اي. ولاردىڭ كوپشىلىگى رەسمي دەمالىس كۇنى بولماسا دا, اتاپ وتىلەدى:
- 5 ماۋسىم – ەكولوگتار كۇنى
- 7 ماۋسىم – مونوپولياعا قارسى ورگان قىزمەتكەرلەرىنىڭ كۇنى
- 9 ماۋسىم – اسكەري قىزمەتشىلەر مەن ارنايى بولىمشەلەر كۇنى
- 23 ماۋسىم – پوليتسيا جانە مەملەكەتتىك قىزمەتشىلەر كۇنى
- 24 ماۋسىم – سۋديالار مەن سوت قىزمەتكەرلەرى كۇنى
- ماۋسىمنىڭ ەكىنشى جەكسەنبىسى – جەڭىل ونەركاسىپ جانە مال شارۋاشىلىعى قىزمەتكەرلەرى كۇنى
- ماۋسىمنىڭ ءۇشىنشى جەكسەنبىسى – مەديتسينا قىزمەتكەرلەرىنىڭ كۇنى
- 28 ماۋسىم – بۇقارالىق اقپارات قۇرالدارى قىزمەتكەرلەرىنىڭ كۇنى
2024 جىلعى قاراشادا ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا 2025 جىلعا ارنالعان دەمالىس كۇندەرىن اۋىستىرۋ تۋرالى بۇيرىققا قول قويعان بولاتىن. قۇجاتقا سايكەس, 5 قاڭتارداعى (جەكسەنبى) دەمالىس كۇنى 3 قاڭتارعا (جۇما) اۋىستىرىلدى. بۇدان باسقا, 2025 جىلى دەمالىس كۇندەرىن اۋىستىرۋ جوسپارلانبايدى.
سونداي-اق, مينيسترلىك 2025 جىلدىڭ ناۋرىزىندا دەمالىس كۇندەرىن باسقا جۇمىس كۇندەرىنە اۋىستىرۋ ءار جاعدايعا بايلانىستى جەكە قاراستىرىلاتىنىن اتاپ ءوتتى.
ەسكە سالايىق, وتكەن جىلى قازاقستاندىقتار قۇربان ايت مەرەكەسى جەكسەنبىگە ءتۇسىپ, ءبىر كۇنگە از دەمالاتىنىنا نارازى بولعان ەدى. قمدب 2024 جىلعى قۇربان ايتتى 16 ماۋسىم, جەكسەنبىگە بەلگىلەگەن بولاتىن.
جاقىندا ءماجىلىس دەپۋتاتى كەنجەعۇل سەيتجان 1 ماۋسىم – بالالاردى قورعاۋ كۇنىن رەسمي مەملەكەتتىك مەرەكە رەتىندە بەكىتۋدى ۇسىندى. سونىمەن قاتار, ول دەمالىس كۇندەرىن اۋىستىرۋ ءتارتىبىن جەتىلدىرۋدى جانە الداعى ەكى جىلعا دەمالىس كەستەسىن الدىن الا بەكىتۋدى ۇسىندى.
جانەل تولەۋبەكوۆا, ەۇۋ ستۋدەنتى
