كەشتىڭ شىمىلدىعى «سالتانات» مەملەكەتتىك بي ءانسامبلىنىڭ ىرگەتاسىن قالاعان بالەتمەيستەر, قازاقستاننىڭ حالىق ءارتىسى زاۋىربەك رايباەۆتىڭ ء«بيشى قايىڭ» بيىمەن اشىلدى.
ساحنانى سيقىرعا بولەپ, قازاق ءبيىنىڭ التىن قازىناسىنا اينالعان تانىمال ۇلتتىق بيلەرمەن قاتار, ورىس, ۇيعىر, وزبەك, تاجىك, موڭعول حالقىنىڭ بيلەرى ءتۇرلى اسپاپتىڭ سۇيەمەلدەۋىمەن كوپتىڭ نازارىنا ۇسىنىلدى. كاسىبي شەبەرلىكتىڭ بيىك ۇلگىسىمەن ورىندالعان ءار بيدەن الۋان ءتۇرلى ۇلت پەن ۇلىستىڭ مىنەزى تانىلىپ, مادەنيەتىنىڭ كورىنىسى ايشىقتالدى. كورەرمەندەر ادامزات تاريحىمەن بىرگە ورىلگەن بي ونەرىنىڭ ءتىلسىز قۇدىرەتىن تەرەڭ سەزىنىپ, قاراپايىم ءارى كۇردەلى قيمىل-قوزعالىس ورنەگىنەن ىزگىلىك پەن دوستىقتىڭ سىرىن ۇقتى.
رەپەرتۋارىندا 150-دەن اسا بي قويىلىمىن قامتىپ, تالاي تالانتتى قانات قاقتىرعان ىرگەلى ۇجىم بيىل 70 جىلدىق مەرەيتويىن رەسپۋبليكا اۋماعىندا كەڭ كولەمدە اتاپ وتەدى. بي ونەرىنىڭ مادەني مۇرا رەتىندەگى تاريحي ماڭىزىن ءتۇسىنىپ, ىرگەتاسىن بەرىك قالىپتاستىرۋعا كۇش سالعان اعا بۋىننىڭ اماناتىنا كەيىنگى تولقىن جاس ۇرپاق ادالدىق تانىتىپ, جاڭا كەزەڭگە ساي سونى سۇرلەۋ سالىپ, تىڭ باعىت-باعدار تاۋىپ وتىرعانىنا وسى كونتسەرت دالەل.
حالىقارالىق بي كۇنىنە ورايلاس وتكەن ءىس-شارانىڭ ەكىنشى كۇنى ۇلتتىق كىتاپحانادا «سالتانات» مەملەكەتتىك بي ءانسامبلىنىڭ فوتوكورمەسى اشىلدى. قازاقتىڭ قاسيەتتى قازىناسىن قيمىل قۇدىرەتىمەن حالىق نازارىنا ۇسىنىپ جۇرگەن بي ونەرىنىڭ ارداگەرلەرى مەن مايتالماندارى شاقىرىلعان شاراعا بي ءانسامبلىنىڭ 1955 جىلدان باستاپ بۇگىنگى كۇنگە دەيىنگى ساحنانى قىزىلدى-جاسىلدى شۋاققا شومىلدىرعان 50-دەن اسا تاريحي فوتوسۋرەتى مەن باسپا بەتتەرىندە جاريالانعان ماقالالار توپتاماسى ۇسىنىلدى. شارا جيەنقۇلوۆا تابانىنىڭ ءىزى قالعان ونەر ورداسىنىڭ ءار كەزەڭدە جەتكەن جەتىستىكتەرى جانە العىس حاتتارىمەن كوركەمدەلگەن كورمەنى بەكزات ونەردىڭ بارلىق جاناشىرلارى تاماشالادى. سىر شەرتكەن سۋرەتتەر شەجىرەسىنىڭ لەنتاسىن قازاق كسر ەڭبەك سىڭىرگەن ءارتىسى, بي ارداگەرى نۇرلىبەك الديبەكوۆ, ۇلتتىق كىتاپحانا ديرەكتورى عازيزا قۇدايبەرگەنقىزى جانە «سالتانات» مەملەكەتتىك بي ءانسامبلىنىڭ ديرەكتورى ەلۋباي كەنجاليەۆ قيدى.
الماتى
