قولىنداعى بالا كۇنىنەن جان سەرىگى بولعان جالت-جۇلت ەتكەن كۇمىس تۇستەس جىلتىر فلەيتاسىن توپىراقتان يلەنگەن قازدىڭ جۇمىرتقاسىنداي قوڭىر ءۇندى سازسىرنايعا الماستىرۋ ويىنا دا كەلمەگەن. كەڭەستىڭ بيلىگى ۇستەم تۇرعان زاماندا, مادەنيەت پەن ونەرگە قازاقى تانىمىمەن توڭكەرىس جاساعان وزبەكالى جانىبەكوۆ اعاسى كەلىپ: «مىنا فلەيتاڭمەن سەن كىمدى تاڭعالدىرام دەپ ءجۇرسىڭ؟ فلەيتانى ىزدەيتىن, جوقتايتىن ەۋروپادا ءوز ادامدارى بار. مىنە, سەنىڭ قولىڭا سازسىرناي بەرەمىن. كىمنەن ۇيرەنەسىڭ, قالاي ۇيرەنەسىڭ, بىلمەيمىن, بىراق مۇنى ۇيرەنۋىڭ ماڭىزدى. مەن ەندى فلەيتانىڭ دىبىسىن ەستىمەيتىن بولايىن», دەدى سالماقتاپ تۇرىپ.
قۇرمانعازى اتىنداعى ۇلتتىق كونسەرۆاتوريانىڭ حالىق مۋزىكاسى فاكۋلتەتى كونە اسپاپتار كافەدراسىنىڭ دوتسەنتى, مادەنيەت سالاسىنىڭ ۇزدىگى گۇلفايرۋز دالباعايدىڭ قولىنان قىرىق جىلدان بەرى سازسىرنايى تۇسپەي كەلە جاتسا, ول ەڭ الدىمەن, تۇتاس ۇلت ونەرى ءۇشىن قۇرباندىققا بارعان امانات الدىنداعى ادالدىقتان...
تابيعاتى كوزدىڭ جاۋىن الاتىن جەتىسۋ جاۋھارلارىنىڭ ءبىرى بورلىتوبە-لەپسى اۋماعىندا تۋعان مۋزىكا بايتەرەگى مۇقان تولەباەۆتىڭ اۋىلىندا دۇنيەگە كەلگەن گۇلفايرۋزدىڭ بالا كۇنىنەن ونەردەن قۇرالاقان قالۋعا حاقىسى جوقتاي. باياندى قۇلاشتاي تارتىپ, ءان باستايتىن اكەسىمەن بىرگە قوسىلا كەتىپ شىرقاي جونەلگەندى جانى سۇيەتىن. اسىرەسە ون ءبىر بالا وسكەن وتباسى جازدىڭ كەشكى تىمىرسىق اۋاسىن قاقىراتا ءتىلىپ, ەسىكتىڭ الدىنا شىعىپ ءان شىرقايتىن وسى ءبىر شاق مىناۋ دۇنيەنىڭ قايتا اينالىپ كەلمەيتىن شىرىندى شاعى بولىپ ماڭگى ەستە قالدى.
اۋىل مەكتەبىنىڭ 8-سىنىبىندا وقىپ جۇرگەن كەزىندە اناسى قولىنان جەتەكتەپ الماتىداعى پ.چايكوۆسكي اتىنداعى مۋزىكا ۋچيليششەسىنە وقۋعا الىپ كەلدى. بايان ويناپ جۇرگەن گۇلفايرۋزدى ۋچيليششە ماماندارى مۋزىكالىق قابىلەتىن, داۋىسىن مىڭ قايتارا تەكسەرىپ, ۇرمەلى اسپاپتار بولىمىنە, فلەيتا سىنىبىنا قابىلدايدى. ۋچيليششەنى تامامداعان سوڭ «اتا-اناما, باۋىرلارىما كومەكتەسۋىم كەرەك» دەگەن ويدى ارقالاپ تۋعان جەرىنە ورالادى. ومىردە دە, ونەردە دە جول كورسەتىپ, ونەرمەن اينالىسۋىنا ىقپال ەتكەن ۋچيليششەنىڭ حالىق اسپاپتار ءبولىمىنىڭ وقىتۋشىسى جاماعات تەمىرعاليەۆ اۋىل مۋزىكا مەكتەبىندە ساباق بەرىپ جۇرگەن گۇلفايرۋزدى كورىپ, الماتىدا ءسۇيىنباي اتىنداعى وبلىستىق فيلارمونيانىڭ جانىنان ءو.جانىبەكوۆتىڭ قولداۋىمەن «ادىرنا», «سازگەن», «التىناي» دەگەن انسامبلدەردىڭ قۇرىلىپ جاتقانىن ايتىپ, ء«بارىن تاستا دا, الماتىعا كەل» دەپ اقىل بەرەدى.
الماتىعا كەلگەن بەتتە فيلارمونياعا جۇمىسقا قابىلدانىپ, ادەمى فلەيتاسىن ۇستاعان كۇيى جاڭادان قۇرىلعان «ادىرنانىڭ» ءبىر مۇشەسى رەتىندە ءانسامبلدىڭ قۇرامىنا جايعاسادى. بۇل – 80-جىلدار. قوبىز, سازسىرناي, سىبىزعى, شاڭقوبىز, جەتىگەن سىندى فولكلورلىق اسپاپتاردى جيناقتاپ انسامبل قۇرىپ, بۇرىن تاڭسىق بولىپ كەلگەن اسپاپتاردا وينايتىن ادامدى ءوزى تاۋىپ, وقىتىپ, انسامبلگە «ادىرنا» دەپ اتاۋ بەرىپ, توڭىرەگىنە تالانتتى مامانداردى توپتاستىرعان وزبەكالى جانىبەكوۆ ەدى. «ادىرناسىن الا وگىزدەي موڭىرەتكەن, اتقان وعى ەدىل-جايىقتى تەڭ وتكەن» دەگەن ماحامبەتتىڭ جىرىندا ايتىلعانداي, ادىرنا دەگەننىڭ ساداق تەكتەس اسپاپ ەكەنىن العاش سوندا وزاعاڭنىڭ اۋزىنان ەستيدى. جيىرمانىڭ ىشىندەگى جاس گۇلفايرۋزدىڭ قولىنداعى سۇيىكتى فلەيتاسىن ۇلتتىق ونەردىڭ جولىنا قۇربان ەتىپ, سازسىرنايعا ايىرباستاعانى دا وسى جىلدار ەدى.
14-15 جاسىنان فلەيتادا ويناپ, كلاسسيكالىق شىعارمالار ورىنداپ كەلە جاتقان گۇلفايرۋزعا سازسىرناي سالعان جەردەن ۇناي قويمادى. راس, دىبىسى ادەمى, قوڭىر, جەلمەن, جاڭبىرمەن ۇيلەسىم تاپقان تابيعاتقا ءتان دىبىس ەكەنىن جوققا شىعارمايدى. بىراق باستاپقىدا باسقا اسپاپتارمەن ۇيلەسۋى قيىنعا سوقتى. ۇيرەتەتىن ۇستاز دا جوق. وزىنشە ىزدەنىپ, «سازسىرناي قالاي پايدا بولعان, كىم تاپقان, قالاي تاپقان؟» دەپ تاريحىنا ۇڭىلە باستاعانى دا وسى كەز. بۇل كەزدە ن.تىلەنديەۆتىڭ باستاماسىمەن «وتىرار سازى» انسامبلىندە سازسىرناي ورنىعا باستاعان. مۇنداعى سازسىرنايشىنىڭ ءوزى دە ەندى ۇيرەنىپ جۇرگەندىكتەن, بىرەۋگە ۇيرەتەتىن حالدە ەمەس ەدى. ىزدەنىپ ءجۇرىپ, بولات سارىباەۆتىڭ «قازاقتىڭ مۋزىكالىق اسپاپتارى» دەگەن كىتابىن تاۋىپ الىپ, اسپاپتىڭ الىپبيىمەن تانىسادى. سوندىقتان گۇلفايرۋز «سازسىرناي ونەرىن مەڭگەرۋدەگى ۇستازىم» دەپ الدىمەن اسپاپتى قولىنا ۇستاتقان وزبەكالى جانىبەكوۆتى, ەكىنشى بولات سارىباەۆتى اتايدى.
بۇگىندە قۇرمانعازى اتىنداعى ۇلتتىق كونسەرۆاتوريادا سازسىرنايدان ساباق بەرەتىن ونەرتانۋ دوتسەنتى گۇلفايرۋز دالباعاي سازسىرنايدىڭ «وكارينا» تەكتەس اسپاپتار قاتارىنا جاتاتىنىن ايتادى. مۇنداي اسپاپتار ارىعا بارماي-اق, بەرىدەگى كەڭەستىڭ قۇرامىندا بولعان كىشكەنتاي حالىقتاردىڭ ءبىرازىندا كەزدەسەدى: ماريلەر شۋن مۋشپىك, چۋۆاشتار تام چاحلىچا, تام شاحران, ەستوندار ساۆي پيلۋ, لاتىشتار سۆيلۋە, ليتۆالىقتار مولينۋكس, ارمياندار پەپۋك, گرۋزيندەر بۋلبۋل دەيدى. بۇل اسپاپتاردى سازدان جاساپ, كەيىن وتقا كۇيدىرەدى. سارىباەۆتىڭ سيپاتتاۋىنشا, كەيدە قۇستىڭ داۋىسىنا سالىپ ويناعان كەزدە, جان-جاقتان قاناتىن قاعىپ قۇستار ۇشىپ كەلەتىن بولعان. ءتىپتى «وتىرار سازى» ءانسامبلىنىڭ اتاۋى كونە قالادان تابىلعان سازسىرناي ۇنىنە بايلانىستى قويىلعان دەسەدى.
سەكسەنىنشى جىلدارى قولىنا العاش سازسىرنايدى العاندا بۇل اسپاپقا ارنالعان شىعارما جوق-تىن. كونە اسپاپ بولعاننان كەيىن, كونتسەرتتەردە سازسىرنايدى وينايتىن ءارتىستى ءانسامبلدىڭ الدىنا شىعارىپ, ءتول دىبىسىمەن تانىستىرۋ باستى ماقسات بولدى. بۇعان قوسا, رەپەرتۋار دا قات ەدى. ەڭ الدىمەن «قوڭىر» اتتى حالىق كۇيىن سازسىرنايعا ءتۇسىردى. العاش رەت جەكە ورىنداۋدا ەل الدىنا شىقتى. ءسويتىپ, سازسىرنايعا كوپتىڭ قۇلاعى ۇيرەنە باستادى. كومپوزيتورلار سازسىرنايعا ارناپ شىعارمالار جازۋدى قولعا الدى. مۋزىكانت ءۇشىن كورەرمەننىڭ الدىنا شىعىپ قولىنان نە كەلەتىنىن كورسەتۋدەن اسقان مۇرات بولماس. وركەستردىڭ سۇيەمەلدەۋىنە ارناپ جازىلعان ەرمۇرات ۇسەنوۆتىڭ «كوڭىلدى ارباكەشى» ومىرگە كەلدى. العاش ويناپ شىققاننان-اق تامىلجىعان تابيعات باۋرايىندا بوشكەلەرگە سۋ قۇيىپ الىپ, اربامەن اۋىلدارعا سۋ تاسىپ جۇرگەن ازىلگە اۋەس, كوڭىلدى ادامدى كورگەننەن كەيىنگى اسەرمەن جازىلعان شىعارماعا دا, ونى ورىنداعان گۇلفايرۋزعا دا جۇرتتىڭ قوشەمەتى جاۋىپ كەتتى. 1988 جىلى قازاق تەلەۆيزياسىنان ورالبەك سارىباسوۆ جازىپ العان «يگراەت گۋلفايرۋز دالباگاەۆا» اتتى 20 مينۋتتىق العاشقى فيلم كونتسەرت ءتۇسىرىلدى. بۇل ءبىر جاعى, كونەدەن جەتكەن سازسىرنايدى ەل ىشىنە كەڭىنەن ناسيحاتتاۋ ماقساتى بولسا, ەكىنشى قىرى, ونىڭ العاشقى ورىنداۋشىلارىنىڭ ونەرىن باعالاۋ, دارىپتەۋ ىسپەتتى ەدى.
1991 جىلى گ.دالباعاي پ.چايكوۆسكي اتىنداعى كوللەدجگە ۇستازدىققا شاقىرىلدى. 2006 جىلى ج.ەلەبەكوۆ اتىنداعى رەسپۋبليكالىق ەسترادا جانە تسيرك كوللەدجىندە سازسىرناي اسپابى دەربەس وقىتۋ باعدارلاماسىنا يە بولىپ, ءوز الدىنا جەكە ماماندىق اشىلدى. ال 2010 جىلى قۇرمانعازى اتىنداعى ۇلتتىق كونسەرۆاتوريادا جەكە ماماندىق رەتىندە وقىتىلا باستادى. كونسەرۆاتورياعا تۇسكەن العاشقى شاكىرتى 2014 جىلى ۇزدىك ءبىتىرىپ شىقتى. ماسكەۋدەن مەملەكەتتىك ەمتيحاننىڭ توراعاسى بولىپ گنەسيندەر اتىنداعى رەسەي مۋزىكا اكادەمياسى وسيپوۆ اتىنداعى حالىق اسپاپتار وركەسترىنىڭ ديريجەرى, پروفەسسور الەكساندر تسىگانكوۆ كەلدى. تسىگانكوۆ شاكىرتىنىڭ ورىنداۋىنداعى سازسىرنايدىڭ ءۇنىن ەستىپ: «قازاقتار, سەندەر مىنانداي قازىنانى ساقتاپ قالعان نە دەگەن مىقتى حالىقسىڭدار. مىناۋ اسپاپ دياپازونىنىڭ ىقشام بولعانىنا قاراماستان, قانداي كەرەمەت شىعارمالاردى ورىنداۋعا قاۋقارلى» دەپ تاڭعالىپ, باسىن شايقادى. مەملەكەتتىك سىناققا كىرمەي تۇرىپ قاناتتانىپ العان شاكىرتى ساحنادا ونەر كورسەتىپ, جوعارى باعا ادى.
«سازگەن» انسامبلىمەن فرانتسياعا, يتالياعا, تۇركياعا, قىتايعا باردى. مۇحيت اسىپ, مەكسيكاعا بارعان ساپارىندا جەكە سولوعا شىققاننان كەيىنگى ءسات ەشقاشان ۇمىتىلماق ەمەس. كىشكەنتاي مەكسيكالىق قىز قۋىرشاققا ارناپ توقىعان كيىمىن سىيلاپ تۇرىپ, «سازسىرنايدى ۇستاپ كورەيىنشى» دەگەندە, جۇرەك تۇبىنەن جىپ-جىلى اعىس جۇگىرىپ ءوتتى. ءتىلى دە, ءتۇرى دە باسقا تىڭداۋشىسىنا قازاقتىڭ قوڭىر دالاسىنىڭ ءۇنىن جەتكىزە العانىنا شەكسىز قۋاندى.
1974 جىلى ب.سارىباەۆتىڭ «لەنينشىل جاس» گازەتىندە: «شىركىن-اي, كورشى وزبەك ەلىنىڭ چانگيستەر ءانسامبلى, بەلورۋستاردىڭ باندۋريستەر ءانسامبلى, ۇيعىرلاردىڭ نايشىلەر ءانسامبلى بار. بىزدە قاشان جەتىگەنشىلەر ءانسامبلى, سازسىرنايشىلار ءانسامبلى, سىبىزعىشىلار ءانسامبلى بولار ەكەن؟» دەپ ارمانداپ جازىپ كەتكەن ماقالاسى بار. وسى ماقالا تۇرتكى بولىپ, ب.سارىباەۆتىڭ 90 جىلدىعىنا وراي گۇلفايرۋزدىڭ ۇيتقى بولۋىمەن 2017 جىلى كونسەرۆاتوريادا ورتا ازيادا العاش رەت «SazArt» اتتى سازسىرنايشىلار ءانسامبلى دۇنيەگە كەلدى. وعان ارنايى رەپەرتۋار ءتۇزىلىپ, ارقايسىنا قىشتان جاسالعان اسپاپتىڭ كونە اتاۋى قويىلدى: «باس سازسىرنايدى» ۋىلدەك, ودان كەيىنگى جوعارىلاۋ دىبىستى «تاستاۋىق», «سازسىرناي», سودان كەيىنگىنى «ۇسكىرىك», «قۇسسايراۋىق», ەڭ تومەنگىسىن «شىڭىراۋ» دەپ اتادى. دياپازوندى تولىعىمەن قامتىپ, انسامبلدە تەك وسى دىبىستار وينالعان كەزدە ادەمى اۋەن تۋدى. گ.دالباعاي ارىپتەس شاكىرتتەرىمەن بىرگە استانادا ءوزى كىندىگىن كەسكەن «SazArt» انسامبلىمەن, «سازگەن» انسامبلىمەن بىلتىر جازدا تۇركىتىلدەس مەملەكەتتەردىڭ 16 پرەزيدەنتىنىڭ الدىندا سازسىرنايمەن جەر-جاھان تاماشالاعان اۋقىمدى كونتسەرت بەردى.
ب.سارىباەۆتان كەيىن سازسىرناي اسپابى تولىققاندى زەرتتەلمەگەن ەدى, ارنايى ەڭبەكتەر دە جازىلمادى. ونى زەرتتەپ-زەردەلەۋ ءۇشىن ماگيستراتۋراعا ءتۇسىپ, بار سانالى عۇمىرىن شاكىرت دايارلاۋعا ارناپ كەلە جاتقان ۇستازدىق جولىن عىلىممەن ۇشتاستىرۋعا دەن قويدى. بۇگىندە گۇلفايرۋز دالباعاي – سازسىرناي تاريحىن جۇيەلەگەن «سازسىرناي اسپابىنا ارنالعان حرەستوماتيا», «سازدى مۇرا», تاعى باسقا ءتورت-بەس عىلىمي ەڭبەكتىڭ اۆتورى.
– مەنىڭ ءبىر كىتابىم «قازاقتىڭ سازسىرنايى جانە وكارينا تەكتەس اسپاپتار» دەپ اتالادى. وكارينا تەكتەس اسپاپتاردىڭ ىشىندەگى ەڭ كونەسى 8000 جىلدان اسا تاريحى بار قىتايدىڭ ءتسۇن اسپابى. كولەمى قازدىڭ جۇمىرتقاسىنداي عانا كونە اسپاپتىڭ قانداي ماتەريالدان جاسالعانىن, قۇمىن, توپىراعىن زەرتتەپ قاراعان كەزدە, ارحەولوگتەر ونى V-VI عاسىرلارعا اپارىپ تىرەگەن. ەرميتاجدىڭ عىلىمي قىزمەتكەرى, مۋزىكاتانۋشى تامارا ۆىزگو «مۋزىكالنىە ينسترۋمەنتى سرەدنەي ازي» دەگەن كىتابىندا سازسىرناي تاريحىن ودان ارعى عاسىرلارعا اپارىپ تىرەيدى. كونە اسپاپتارىمىزدىڭ تاريحىن وتىراردان تابىلدى دەپ, ءبىز ورتا عاسىرلارمەن عانا شەكتەلىپ ءجۇرمىز, ال تەرەڭىنە ۇڭىلەتىن بولساق, افروسيابقا بارامىز. 1905 جىلى نەمىس عالىمى ءارى ساياحاتشىسى ريحارد كارۋتتستىڭ «ماڭعىشلاقتاعى قىرعىزدار مەن تۇرىكمەندەر اراسىندا» اتتى عىلىمي تانىمدىق ەڭبەگىندە «ەكسپەديتسيادا جۇرگەن كەزىمدە مال باعىپ جۇرگەن بالانىڭ دورباسىندا قۇران كىتابى, قامىستان جاسالعان سىبىزعى, بالشىقتان جاسالعان وكارينا تەكتەس اسپاپ جاتاتىنىن كوردىم» دەپ سازسىرنايدى تۇسپالدايدى. سازسىرناي ءبىرتالاي مەملەكەتتىڭ ونەرىندە بار, بىراق جەلدىڭ ءۋىلى, جاندىكتىڭ ىزىڭى سەكىلدى تابيعي سازىن ساقتاپ قالعان قازاق اسپابى عانا, – دەپ كاسىبي مۋزىكانت قازاق سازسىرنايىنىڭ ەرەكشەلىگىن اتاپ كورسەتەدى.
ۇستازدىڭ ۇزدىك شاكىرتتەرىنىڭ قاتارىندا ايسۇلۋ نيازوۆا, ايگەرىم وتەگەن بار. شاكىرتتەرىنىڭ ءبىرى سازسىرنايدىڭ رەپەرتۋارىن زەرتتەسە, ءبىرى سازسىرنايدىڭ جاسالۋ تەحنيكاسىن, ەندى ءبىرى سازسىرنايدىڭ اكۋستيكاسىن, تەمبرىن زەرتتەپ ءجۇر. قالاي بولعاندا دا, كونە اسپاپتىڭ مۋزىكالىق مۇمكىندىگى جان-جاقتى اشىلىپ, دارىپتەلىپ, ونەر رەتىندە وركەندەپ كەلە جاتسا, بۇل ىزگى ماقساتتى جۇزەگە اسىرۋدا گۇلفايرۋز دالباعاي سياقتى كاسىبي مامانداردىڭ سىڭىرگەن ەڭبەگى ۇشان تەڭىز.
– قايبىر جىلى ء«بىر ەل, ءبىر جول» جوباسى اياسىندا كونسەرۆاتوريانىڭ قىلقوبىز, دومبىرا, سازسىرنايدى ۇيرەتەتىن ءۇش وقىتۋشىسى بەيجىڭگە باردىق. قىتاي حالقى ەڭبەكقورلىعىنىڭ ارقاسىندا ۇلتتىق ونەرىن بيىك دارەجەگە كوتەرىپ وتىر. سكريپكاشىلار, فلەيتا, گابوي, كونتراباس سياقتى كلاسسيكالىق اسپاپتاردىڭ باسىن قوسقان 120 مۋزىكانت وتىرعان سيمفونيالىق وركەستردە ءبىزدىڭ قىلقوبىزعا ۇقساس ۇلتتىق احۋ دەگەن اسپابىنا اككومپونەنت جاساتىپ, ارنايى باعدارلاما تۇزگەن. بۇدان ارتىق مەملەكەتتىك قولداۋ بولا ما؟ ءبىزدىڭ ۇلتتىق اسپاپتارىمىز مۇنداي قولداۋدى سەزىنۋ ءۇشىن ءالى قانشا ۋاقىت كەرەك؟ الگى احۋدى ويناعان مۋزىكانتتىڭ ونەرى, تالانتى, ونىڭ احۋمەن ۇيلەسىمى, بىتە قايناسقان اسپاپقا ىڭكارلىگى ەسىمىزدەن تاندىرىپ تاستادى. ال ەلىمىزدە سازسىرنايدىڭ دۇرىس شەبەرحاناسى دا جوق. بۇل ۇلكەن ماسەلە. اسپاپ جاسايتىن ادامنىڭ مۋزىكانت بولۋى وتە ماڭىزدى. ايتپەسە قۇلاقكۇيىن كەلتىرۋى قيىنعا سوعادى. استانانىڭ تۇبىندەگى قوسشى قالاسىنان كونسەرۆاتوريانى بىتىرگەن تۇلەگىمىز ازامات باقيا ءوزى جاساعان ۇلت اسپاپتارىنىڭ مۋزەيىن اشتى, قازىر ازاماتتىڭ جاساعان اسپابىمەن ويناپ ءجۇرمىز. ال قىتايدا ۇلتتىق اسپاپتار ۇكىمەتتىڭ قولداۋىمەن ارنايى فابريكادا جاسالادى. مەملەكەتتەن قولداۋ سەزىنسە, اينالاسىندا اسپاپقا دەگەن قاستەرلى كوزقاراس بولسا, بولات سارىباەۆ اعامىز دا سونشاما مەزگىلسىز بۇل دۇنيەنى تارك ەتىپ كەتىپ قالماس پا ەدى؟ – دەيدى سازسىرناي ونەرىنىڭ كوشباسىندا كەلە جاتقان كاسىبي مۋزىكانت قامىققان ۇنمەن.
دالانى بۋساندىرىپ, تابيعاتپەن بىرگە تۇلەپ, ۇلتتىق سالت-ءداستۇر ۇلىقتالاتىن ناۋرىز ايى تۋعاندا, دومبىرا ءدۇبىرى, قوبىز سارىنىمەن بىرگە قۇلاققا سازسىرناي سازى كەلىپ, تۇركىلىكپەن تامىرلاسقان تاعدىردىڭ ماڭگىلىك ەكەنىنە مەڭزەيدى. مۇندا جۇمىر جەردىڭ تىنىسىن جۇدىرىقتاي سازسىرنايىنا سىيعىزىپ, كۇمبىرلەگەن كۇي مەن ساز توككەن گۇلفايرۋز دالباعايدىڭ قايتالانباس مۋزىكالىق مانەرى دارالانىپ ەرەكشە ەستىلەتىنىنە بۇل كۇندە ەشكىم داۋ تۋدىرا المايدى. ويتكەنى ونەردى ءومىرىنىڭ تەمىرقازىعى ەتكەن اسقاق بيىكتىككە تىلسىم كوكتەن تىنىشتىق بەرمەگەن ادالدىق پەن امانات قوس قاناتىنا قوندىرىپ الىپ جەتكىزگەن...
الماتى
