جىل باسى بولۋعا تالاسقانداردىڭ اراسىنان تۇيەنىڭ ۇستىنە ورمەلەپ شىعىپ, جاڭا جىلدى ءبىرىنشى بولىپ كورەتىن ايلاكەر تىشقاننىڭ اقىلى مەن قۋلىعىنا قۇرىلعان ادەپكى ەرتەگىدەن الشاق كەتىپ, جاڭا پىشىنگە بوي ۇرعان بۇل قويىلىم شىم-شىتىرىق وقيعالار مەن تاڭعالارلىق ءتۇرلى كەيىپكەرلەر ارقىلى عاسىرلاردان مۇرا بولىپ ساقتالعان رۋحاني قۇندىلىقتار, قازاقى تانىم-تۇسىنىك, ۇلتتىق سالت-ءداستۇر, نانىم-سەنىمدەردى دارىپتەيدى. كوكتەم مەرەكەسىنىڭ شىرايىن كەلتىرىپ, ماڭىزىن ارتتىراتىن مەرەكەدە اڭىزعا اينالعان كەيىپكەرلەر – قىدىر اتا, كۇن مەن ءتۇن, تىشقاننان باستاپ دوڭىزعا دەيىنگى جىل يەلەرى كورەرمەندەرگە ۇلتتىق ويىندار مەن بيلەر ۇسىنىپ, ناۋرىز مەيرامىنىڭ ءمانىن اشىپ كورسەتەدى.
– ناۋرىزدىڭ باستى قۇپياسى كۇن مەن ءتۇننىڭ تەڭەسۋى بولسا, ءبىر-بىرىمەن كەڭەسىپ جىل باسىن تاڭداۋىندا ءار جىلدىڭ ايتار ويى, جۇرەككە جەتكىزەر سىرى, جادىدان وشپەيتىن عيبراتى بولعان. ينستسەنيروۆكا اۆتورى جازيرا احمەتوۆامەن كەڭەسە وتىرىپ, ەرتەگىنى جاڭاشا شەشىممەن ۇسىنۋدى ءجون كوردىك. جىل ون ەكى ايدىڭ ءبارى ساحناعا ۇلتتىق كيىممەن شىعادى. سپەكتاكل + 5 جاستان جوعارى كورەرمەنگە ارنالعان. «ادام جەتى جىل ءومىر سۇرەدى, قالعان ۋاقىتتا بالالىق شاعىن ىزدەۋمەن وتەدى» دەيتىن ءتامسىل بار ەمەس پە؟ الماتى قۋىرشاق تەاترى – ادامعا ساعىنىش سىيلايتىن تەاتر. ءان مەن كۇيگە باي ۇلتىمىزدىڭ ونەرىن مەيلىنشە جارقىراتا وتىرىپ, قۇلاققا سىڭگەن بەلگىلى كۇيلەردى زاماناۋي وڭدەۋمەن قايتا جاڭعىرتىپ, قويىلىمدى قىزىقتى جاساۋدىڭ تاسىلدەرىن تابۋعا تىرىستىق. ينتەراكتيۆتى ساۋالدار قويىپ, كورەرمەندى سپەكتاكل وقيعاسىنا تىكەلەي ارالاستىرىپ وتىرامىز. سونداي-اق قىلىشتاسۋ, اتەشتىڭ تاڭعى شاقىرۋى, وگىزدىڭ سوقا تارتۋى, قويدىڭ جۇنىنەن كيىز باسۋدى پلاستيكالىق شەشىمدەرمەن كورسەتە وتىرىپ, جان-جانۋاردىڭ ميفولوگيالىق ماڭىزى مەن تۇرمىستاعى كول-كوسىر پايداسىن, وزگە دە ەرەكشەلىگىن بالالاردىڭ ساناسىنا ءسىڭىرۋدى ماقسات ەتتىك, – دەيدى «ناۋرىز قۇپياسىنىڭ» رەجيسسەرى شوقان قۇلنازاروۆ.
جاڭا جىل يەسى اتانۋعا تالاسقان جانۋارلار ارتىقشىلىقتارى مەن جاقسى قاسيەتتەرىن العا تارتىپ, شاپشاڭدىعى مەن تاپقىرلىعى سىنعا تۇسەتىن ونەر سايىسىن ۇيىمداستىرادى. ءادىل شەشىم شىعارۋعا بەل بايلاعان كۇن مەن ءتۇن بايقاۋ جاريالاپ, جانۋارلاردىڭ اقىلدىلىق, ايلاكەرلىك, شاپشاڭدىق, تاپقىرلىق قاسيەتتەرىن ساراپقا سالادى. تارتىستى بايگەنىڭ جەڭىمپازىن بىرگە انىقتاۋعا شاقىرادى. بۇل سپەكتاكل مەرەكەلىك باعدارلامانىڭ كوركىن كىرگىزىپ, كورەرمەنگە ۇمىتىلماس اسەر سىيلايدى. سپەكتاكل كىشكەنتاي كورەرمەندەردى دوستىققا, ادالدىققا, بىرلىككە, ۇلتجاندىلىققا ۇندەيدى.
الماتى
