قوجا احمەت ءياساۋيدىڭ «ديۋاني حيكمەت», «پاقىرناما», «ميراتۋل-قۋلۋب», «دار-ريسالاي ادابۋت-تاريقات» اتتى ەڭبەكتەرى كوپكە ءمالىم. جاقىندا م.اۋەزوۆ اتىنداعى ادەبيەت جانە ونەر ينستيتۋتىنىڭ عىلىمي قىزمەتكەرى, PhD دوكتورانتى باۋىرجان مىرزاقۇلدىڭ زەرتتەۋى ناتيجەسىندە اۋليە اقىننىڭ «قۇدىرەتناما» اتتى قولجازباسى تابىلىپ وتىر.
«قۇدىرەتناما» شىعارماسىمەن 2024 جىلدىڭ باسىندا تاشكەنتكە بارعان عىلىمي ءىسساپارىمىزدا تانىسقان ەدىك. سوندا قوجا احمەت ياساۋي تۋرالى ەكى ەڭبەك قولىمىزعا ءتۇستى. ءبىرىنشىسى «ريسولاي سۋلتون حوجا احماد» شىعارماسى بولسا, ەكىنشىسى – ءبىز توقتالىپ وتىرعان «قۇدىرەتناما» ەڭبەگى. «قۇدىرەتنامانىڭ» تۇپنۇسقاسى ءابۋ رايحان بيرۋني اتىنداعى شىعىستانۋ ينستيتۋتىنىڭ سيرەك قورىندا ساقتالعان», دەيدى جاس عالىم باۋىرجان مىرزاقۇل.
«قۇدىرەتناما» شىعارماسى – دۇنيەنىڭ وتكىنشى قىزىق ءھام ءومىردىڭ فانيلىگى حاقىنداعى تۋىندى. اقىن: «مىسكىن احمەت, كەل ەندى, تاۋبە قىلىپ جولعا كىر», دەپ ءوزىن-ءوزى قامشىلاسا, يگى جاقسىلاردى سۇيىنشىلەپ, «تاۋبە قىلعان پەندەسىن ءجانناتتا سۇلتان ەتپەكشى» دەپ جىرلايدى.
