زەينەتكەر بۇل ساپاردى التى جىل ارمانداعان. 2022-ءنىڭ كوكتەمىندە ويى جۇزەگە استى. ءبىر قىزىعى, ول تەك ساياحاتتامايدى. تۋعان جەرى تۋرالى اڭگىمەلەپ, قولونەرشىلەرمەن تانىسادى. ءتىپتى شەبەرلەردىڭ ارنايى كاتالوگىن جيناپ, حالىقارالىق يۋنەسكو ۇيىمىنا تاپسىرعان. الداعى ۋاقىتتا ەل ءتۋريزمىن دارىپتەۋ ءۇشىن جەر شارىن ارالاپ شىقپاق ويى بار.
حارريسوننىڭ ەرلىگى
عالامدا ەرلىكتىڭ ءتۇرى كوپ. سونىڭ ءبىرى – حارريسوننىڭ باستاماسى. ونىڭ قانىندا مەيىرىم تۇنىپ تۇر. سەبەبى ول 2 ميلليوننان استام جاڭا تۋعان نارەستەنى قۇتقارعان.
اۋستراليالىق ازامات دجەيمس حارريسون 1000-نان كوپ رەت قان تاپسىردى. ونىڭ سيرەك كەزدەسەتىن قان توبىنداعى انتيدەنەلەر گەموليتيكالىق اۋرۋى بار جاڭا تۋعان نارەستەلەردىڭ دەرتتەن ايىعىپ, ءارى قاراي ءومىر سۇرۋىنە كومەكتەسەدى. حارريسوننىڭ دونورلىعىنىڭ ارقاسىندا شامامەن 2 ميلليوننان استام نارەستە امان قالدى. ءبىر قىزىعى, ونىڭ ىشىندە دجەيمستىڭ ءوز نەمەرەسى دە بار. مىنە, عاجاپ!
جەۋگە جارامدى روبوت
جاڭالىقتاردان ء«ۇي سالاتىن, وپەراتسيا جاسايتىن, سوعىساتىن روبوت شىعىپتى» دەگەندەردى ءجيى ەستيمىز. وعان قازىر تاڭ قالمايمىز دا. جەۋگە جارامدى روبوت شىعىپتى.
شۆەيتساريا تەحنولوگيالىق ينستيتۋتىنىڭ عالىمدارى ادامنىڭ نەمەسە جانۋارلاردىڭ اسقازانىنا ەنەتىن روبوت جاساپ جاتىر. ونى اۋرۋلاردى دياگنوستيكالاۋ, اعزاعا دارىلەردى ءدال جەتكىزۋ ءۇشىن قولدانباق. ياعني روبوتتى جەيسىز, ول ءسىزدىڭ اسقازانىڭىزعا بارادى. بارادى دا, وزىنە تاپسىرىلعان مىندەتتى ورىندايدى. عالىمدار جەۋگە جارامدى روبوتتاردى جەلاتين-گليتسەرين ماتەريالىنان جاسادى. «روبوتتار مەن تاعامداردى بىرىكتىرۋ – قىزىقتى ءارى قيىن. سەبەبى شەكتەۋ كوپ, مۇمكىندىك از. ونىڭ ءبارىن قولدان جاسايمىن», دەدى زەرتحانا ديرەكتورى داريو فلورەانو.
