فورۋمعا قازاقستان, قىتاي, تۇرىكمەنستان جانە قىرعىزستاننان كەلگەن ەنەرگەتيكا سالاسىنىڭ ماماندارى, مەملەكەتتىك ورگانداردىڭ وكىلدەرى, حالىقارالىق ساراپشىلار, عالىمدار, جاس ينجەنەرلەر مەن ستۋدەنتتەر قاتىستى. ءىس-شارانىڭ باستى ماقساتى – قىتاي مەن ورتالىق ازيا اراسىنداعى كاسىبي جانە مادەني ديالوگتى نىعايتىپ, جاستاردىڭ حالىقارالىق ىنتىماقتاستىقتاعى ءرولىن ارتتىرۋ.
CNPC Central Asia Ltd. مەن CNPC Kazakhstan بىرلەسە ۇيىمداستىرعان فەستيۆال قازاقستانداعى قىتاي حالىق رەسپۋبليكاسىنىڭ ەلشىلىگىنىڭ, قىتاي ساۋدا پالاتاسىنىڭ جانە قازاق ۇلتتىق حورەوگرافيا اكادەمياسىنىڭ قولداۋىمەن ءوتتى.
ءىس-شارانىڭ اشىلۋىندا قاتىسۋشىلار «جىبەك جولىنىڭ ەنەرگەتيكالىق ىزدەرى» اتتى كورمەنى تاماشالادى. كورمەدە قازاقستان مەن قىتاي اراسىنداعى ەنەرگەتيكالىق ىنتىماقتاستىقتىڭ دامۋ كەزەڭدەرى, ينفراقۇرىلىمدىق جوبالار جانە تسيفرلىق تەحنولوگيالاردىڭ سالاعا ەنگىزىلۋى تانىستىرىلدى.
فورۋمنىڭ مادەني باعدارلاماسى ەرەكشە فورماتتا ۇيىمداستىرىلدى. «دومبىرا ساۋردەنمەن كەزدەسكەندە» اتتى مۋزىكالىق قويىلىمدا قازاق جانە قىتاي مادەنيەتىنىڭ ۇندەستىگى كورسەتىلدى. ساحنادا كۇيشى ەرجان الىمبەتوۆ, قىتايلىق ورىنداۋشى ليۋ حۋەي جانە باسقا دا ونەرپازدار ونەر كورسەتتى.
ەنەرگەتيكاداعى وڭ وزگەرىس: قازاقستان پروفيتسيتكە قول جەتكىزدى
سالتاناتتى اشىلۋ راسىمىندە قازاقستانداعى قىتاي حالىق رەسپۋبليكاسى ەلشىلىگىنىڭ, CNPC كومپانياسىنىڭ, «سامۇرىق-قازىنا», «قازمۇنايگاز» جانە «QazaqGaz» ۇلتتىق كومپانيالارىنىڭ وكىلدەرى ءسوز سويلەدى. ولار ەنەرگەتيكا سالاسىنداعى حالىقارالىق سەرىكتەستىكتىڭ ماڭىزىن اتاپ ءوتىپ, جاستاردىڭ كاسىبي الەۋەتىن دامىتۋ ماسەلەسىنە توقتالدى.
فورۋم اياسىندا بەس پانەلدىك سەسسيا ۇيىمداستىرىلدى. العاشقى سەسسيادا ء«بىر بەلدەۋ – ءبىر جول» باستاماسىنىڭ الەۋەتى مەن جاڭا بۋىننىڭ جاۋاپكەرشىلىگى تالقىلاندى. قاتىسۋشىلار وڭىرلىك ىنتىماقتاستىقتى دامىتۋدىڭ جاڭا مۇمكىندىكتەرىنە نازار اۋداردى.
ء«بىلىم مەن تاجىريبە بىرلىگى: جاستاردىڭ دامۋى» اتتى ەكىنشى سەسسيادا ماماندار كادر دايارلاۋ, تاجىريبە الماسۋ جانە كاسىبي ءوسۋ ماسەلەلەرىن كوتەردى. ەڭبەك نارىعىندا تەوريالىق بىلىممەن قاتار پراكتيكالىق داعدىلاردىڭ ماڭىزى ارتىپ كەلە جاتقانى ايتىلدى.
ءۇشىنشى پانەلدىك سەسسيا عىلىمي-تەحنيكالىق يننوۆاتسيالارعا ارنالدى. تسيفرلاندىرۋ, جاساندى ينتەللەكت جانە زاماناۋي تەحنولوگيالاردىڭ ءوندىرىس پەن ەنەرگەتيكا سالاسىنا اسەرىن ءسوز ەتتى. سونداي-اق ەنەرگەتيكا سەكتورىن جاڭعىرتۋداعى يننوۆاتسيالىق شەشىمدەردىڭ ءرولى تالقىلاندى.
فورۋم جۇمىسى «ەنەرگەتيكالىق جىبەك جولى: جاھاندىق تۇراقتىلىق» تاقىرىبىنداعى ءتورتىنشى پانەلدىك سەسسيامەن جالعاستى. سەسسيا بارىسىندا قاتىسۋشىلار وڭىرلىك ىنتىماقتاستىقتى تەرەڭدەتۋ, ەنەرگەتيكا سالاسىنىڭ تۇراقتى دامۋىن قامتاماسىز ەتۋ جانە حالىقارالىق سەرىكتەستىكتى نىعايتۋ ماسەلەلەرىن تالقىلادى.
فورۋمنىڭ قورىتىندى پانەلدىك سەسسياسى «تسيفرلىق شىعارماشىلىق: مادەني بىرەگەيلىك» تاقىرىبىنا ارنالدى. تسيفرلىق ءداۋىردىڭ مۇمكىندىكتەرىن پايدالانا وتىرىپ, ۇلتتىق قۇندىلىقتاردى ساقتاۋ, مادەني مۇرانى دارىپتەۋ جانە جاستار اراسىندا مادەني سايكەستىكتى نىعايتۋ ماسەلەلەرى ايتىلدى.
E-LIGHT 2026 الاڭى ەنەرگەتيكا, يننوۆاتسيا جانە مادەنيەت باعىتىنداعى حالىقارالىق ىنتىماقتاستىقتى دامىتۋعا جاڭا سەرپىن بەردى. E-LIGHT 2026 حالىقارالىق فورۋم-فەستيۆالى قىتاي مەن ورتالىق ازيا ەلدەرىنىڭ جاستارى اراسىنداعى بايلانىستى نىعايتىپ, ەنەرگەتيكا, عىلىم جانە مادەنيەت سالالارىنداعى جاڭا جوبالارعا جول اشادى.
جانبوتا باحىتبەك,
ەۇۋ ستۋدەنتى
