فوتو: ادام قۇقىقتارى جونىندەگى ۋاكىل
«وتكەن جىلدىڭ كۇزىندە قىز الىپ قاشۋ ارەكەتى ءۇشىن قىلمىستىق جاۋاپتىلىقتى كوزدەيتىن زاڭ كۇشىنە ەندى.ء بىز بۇل ماسەلەنى 2023 جىلدان باستاپ كوتەرىپ كەلەمىز, سونداي-اق ساراپتامالىق جانە ءتۇسىندىرۋ جۇمىستارىن جۇيەلى تۇردە جۇرگىزدىك. ەڭ الدىمەن, ايقىن جايتتى اتاپ وتكەن ءجون. ادام ۇرلاۋدىڭ كەز كەلگەن ءتۇرى زاڭ تالاپتارىن ورەسكەل بۇزۋ بولىپ سانالادى. بۇل قۇقىققا قايشى ارەكەت مادەنيەتكە, ۇلتتىق داستۇرلەرگە, وتباسىلىق نەمەسە كەز كەلگەن وزگە دە ومىرلىك ءمان-جايلارعا سىلتەمە جاساۋ ارقىلى ەشقانداي ەرەكشەلىك رەتىندە تانىلمايدى جانە اقتاۋعا جاتپايدى», دەدى ارتۋر لاستاەۆ.
ادام قۇقىقتارى جونىندەگى ۋاكىل ادام ۇرلاۋ قىلمىستىق كودەكسىنىڭ 125-بابىنا سايكەس 15 جىلعا دەيىن باس بوستاندىعىنان ايىرۋ تۇرىندەگى قاتاڭ جازاعا اكەپ سوعاتىنىن ەسكە سالدى. سونداي-اق ول بۇل قىلمىستىڭ قازاق حالقىنىڭ داستۇرلەرىنە دە, ادەت-عۇرىپ قۇقىعىنا دا ەشقانداي قاتىسى جوق ەكەنىن ايتتى.
«نەكە ۇعىمى قازاقستان رەسپۋبليكاسىنىڭ كونستيتۋتسياسىندا «مەملەكەت بەلگىلەگەن تارتىپپەن تىركەلگەن ەر مەن ايەلدىڭ ەرىكتى جانە تەڭ قۇقىقتى وداعى» رەتىندە بەكىتىلگەن. بۇل نورمانىڭ وزگە تۇردە تۇسىندىرىلۋىنە جول بەرىلمەيدى. ەگەر ەكى كامەلەتكە تولعان ازامات وتباسى قۇرۋ تۋرالى شەشىم قابىلداپ, اتا-اناسىنىڭ ۇيىنەن بولەك شىقسا, زاڭ ولارعا بىرلەسكەن ءومىر ءسۇرۋ قۇقىعىن جۇزەگە اسىرۋدىڭ زاڭدى جولىن ۋاكىلەتتى ورگاندا قاتىناستارىن تىركەۋ ارقىلى ۇسىنادى», دەدى ول.
ارتۋر لاستاەۆ پىكىر سوڭىندا ەل ازاماتتارىن كونستيتۋتسيا مەن وزگە دە زاڭداردىڭ تالاپتارىن قاتاڭ ساقتاۋعا شاقىردى.
