فوتو: بقو اكىمدىگى
قىتاي مەملەكەتىنە باتىسقازاقستاندىق دەلەگاتسيانى باستاپ بارعان ايماق باسشىسى ناريمان تورەعاليەۆ 50 مەملەكەتتىڭ وكىلدەرى باس قوسقان جيىندا قىتايدىڭ ءىرى ونەركاسىپتىك ورتالىعى سانالاتىن لياونين پروۆينتسياسىنىڭ الەۋەتىمەن تانىستى.
«باتىس قازاقستان وبلىسى – قىتاي حالىق رەسپۋبليكاسىنىڭ توراعاسى سي ءتسزينپيننىڭ استانا قالاسىندا جاريالاعان ء«بىر بەلدەۋ – ءبىر جول» باستاماسىنىڭ ماڭىزدى ترانزيتتىك تورابى. كەلىسسوزدەر مەن قولداۋدىڭ ناتيجەسىندە قىتايلىق كومپانيالار وبلىس اۋماعىندا سۇيىق مەتانول, تسەمەنت زاۋىتتارى, گازتۋربينالىق جانە جەل ەلەكتر ستانسالارىن سالۋعا كىرىستى. وزگە دە جوبا-جوسپار از ەمەس. بىلتىر بقو مەن قىتاي اراسىنداعى تاۋار اينالىمى 1,5 ەسە ءوسىپ, 175 ملن اقش دوللارىنا جەتتى. ءبىز لياونين پروۆينتسياسىمەن يننوۆاتسيالىق شەشىمدەر, جاساندى ينتەللەكت, وڭدەۋ ونەركاسىبى سالاسىندا ينۆەستيتسيالىق بايلانىستاردى ودان ءارى تەرەڭدەتۋگە دايىنبىز», دەگەن باتىس قازاقستان وبلىسىنىڭ اكىمى ناريمان تورەعاليەۆ كونفەرەنتسيانىڭ جالپى وتىرىسىندا وڭىرارالىق ىنتىماقتاستىقتى دامىتۋ بويىنشا ۇسىنىس-پىكىرىن جەتكىزدى.
قىتايلىق ينۆەستورلار بقو-دا جاڭا زاۋىتتار مەن ەلەكتر ستانسالارىن سالادى
لياونين پروۆينتسياسىنا قاراستى شاھارلار الەمنىڭ 96 قالاسىمەن باۋىرلاس. بۇگىن بۇل قاتارعا باتىس قازاقستان وبلىسىنىڭ ورتالىعى دا قوسىلدى. ورال مەن تسزينچجوۋ قالالارىنىڭ باسشىلىعى باۋىرلاستىق قاتىناس ورناتۋ تۋرالى نيەتتەستىك حاتتاماسىنا قول قويدى. ونىڭ اياسىندا تاراپتار ساۋدا-ەكونوميكالىق, عىلىمي-تەحنيكالىق, مادەني-سپورتتىق جانە وزگە دە ماڭىزدى باعىتتار بويىنشا تۇراقتى بايلانىس ورناتۋعا ۋاعدالاستى.
