ەلىمىزدە ونداعان جاڭا ءوندىرىس ىسكە قوسىلىپ, مىڭداعان جۇمىس ورنى اشىلادى

فارماتسەۆتيكا جانە بيوتەحنولوگيالار

ۇكىمەت قاراعاندى وبلىسىندا قۇنى 42,5 ملرد تەڭگە بولاتىن فارماتسەۆتيكالىق كەشەندى سالۋ جانە جاڭعىرتۋ جوباسىن ماقۇلدادى. كاسىپورىندا ونكولوگيالىق, اۋتويممۋندىق جانە ورفاندىق اۋرۋلاردى ەمدەۋگە ارنالعان دارىلىك زاتتاردى قوسا العاندا, 74 اتاۋداعى ءونىم وندىرىلەدى. سونداي-اق بەلسەندى فارماتسەۆتيكالىق سۋبستانتسيالار مەن يممۋنوبيولوگيالىق پرەپاراتتار شىعارىلادى. جوبا اياسىندا شامامەن 70 جۇمىس ورنى قۇرىلادى.

الماتى وبلىسىنداعى «الاتاۋ» ارنايى ەكونوميكالىق ايماعىندا قۇنى 32,5 ملرد تەڭگە بولاتىن تولىق تسيكلدى بيوفارماتسەۆتيكالىق كەشەن سالۋ جوسپارلانعان. ىسكە قوسۋ مەرزىمى — 2031 جىل. زاۋىت ونكولوگيالىق جانە ورفاندىق اۋرۋلاردى ەمدەۋگە ارنالعان پرەپاراتتاردى قوسا العاندا, 20 اتاۋداعى دارىلىك زات پەن يممۋنوبيولوگيالىق ءونىم شىعارادى.

ەنەرگەتيكا جانە جاسىل تەحنولوگيالار

قازاقستاندىق Baskan Irrigation كومپانياسى جەتىسۋ وبلىسىندا قۋاتى 30 مۆت بولاتىن پوكاتيلوۆ سۋ ەلەكتر ستانتسياسىن سالۋدى جوسپارلاپ وتىر. نىساندى پايدالانۋعا بەرۋ 2028 جىلعا كوزدەلگەن. جوبا اياسىندا كولەمى 80 ملن تەكشە مەترگە دەيىن جەتەتىن سۋ قويماسى سالىنىپ, 32 مىڭ گەكتارعا جۋىق اۋىل شارۋاشىلىعى جەرىن سۋارۋعا مۇمكىندىك بەرەدى. سونىمەن قاتار جىلىنا شامامەن 30 مىڭ مۆت/ساع ەلەكتر ەنەرگياسى وندىرىلەدى.

تۇركىستان وبلىسىندا قۇنى 307 ملن اقش دوللارىن قۇرايتىن كۇن ەلەكتر ستانتسياسىنىڭ قۇرىلىسى باستالدى. جوبانى China Energy Overseas Investment Co. Ltd. كومپانياسى Qazaq Green Power PLC كومپانياسىمەن بىرلەسىپ جانە «سامۇرىق-ەنەرگو» قولداۋىمەن جۇزەگە اسىرۋدا. ستانتسيا 2027 جىلى ىسكە قوسىلعاننان كەيىن جىل سايىن شامامەن 674 ملن كۆت/ساع ەلەكتر ەنەرگياسىن وندىرەدى.

مەتاللۋرگيا جانە تاۋ-كەن ءوندىرىسى

ەڭ اۋقىمدى جوبالاردىڭ ءبىرى — پاۆلودار وبلىسىندا سينگاپۋرلىق XINFA كومپانياسى سالاتىن اليۋميني كلاستەرى. ينۆەستيتسيا كولەمى — 15 ملرد اقش دوللارى. جوبا بوكسيتتەردى تەرەڭ وڭدەۋدى كوزدەيدى جانە جىل سايىن 4,8 ملن تونناعا دەيىن گلينوزەم, 2,4 ملن توننا ەلەكتروليتتىك اليۋميني جانە 1,2 ملن توننا تەرەڭ وڭدەلگەن ءونىم وندىرۋگە مۇمكىندىك بەرەدى. قۇرىلىس 2026 جىلى باستالىپ, ءبىرىنشى كەزەڭى 2028 جىلى ىسكە قوسىلادى. جوبا اياسىندا شامامەن 10 مىڭ جۇمىس ورنى اشىلادى.

قىتايلىق Sinolnvest Group Ltd. كومپانياسى قاراعاندى وبلىسىنداعى تەمىر كەن ورنىن يگەرۋگە كىرىسەدى. وندىرىستىك قۋاتى — جىلىنا 100 مىڭ توننا كەن. پايدالانۋ مەرزىمى 2027-2034 جىلدارعا جوسپارلانعان.

اقتوبە قالاسىندا قۇنى 100 ملن اقش دوللارى بولاتىن ەۋرازيالىق ينتەگراتسيالانعان جاسىل مىس ونەركاسىبى زاۋىتىنىڭ قۇرىلىسى باستالدى. جوبا قىتايلىق Beijing Jinvi Yuanfang Group ينۆەستيتسيالارى ەسەبىنەن قازاقستاندىق Phoenix Industrial Group كومپانياسىمەن بىرلەسىپ جۇزەگە اسىرىلۋدا. زاۋىت مىس سىنىقتارىنان جىلىنا 25 مىڭ تونناعا دەيىن تازارتىلعان مىس وندىرەدى. ىسكە قوسۋ 2027 جىلعا جوسپارلانعان. ءونىم ىشكى نارىققا جانە ەاەو مەن ەو ەلدەرىنە ەكسپورتتالادى.

تۋريزم جانە ينفراقۇرىلىم

Almaty SuperSki تاۋ شاڭعىسى كۋرورتى جوباسىن جۇزەگە اسىرۋعا فرانتسيا, كانادا جانە اقش كومپانيالارى تارتىلدى. فرانتسۋز تاراپى 11 اسپالى جول سالادى, كانادالىق كومپانيالار ينجەنەرلىك جوبالاۋمەن اينالىسادى, ال امەريكالىق تاراپ قۇرىلىستى باسقارۋ جانە ۇيلەستىرۋ جۇمىستارىن جۇرگىزەدى. كۋرورتتى ىسكە قوسۋ 2028 جىلعا جوسپارلانعان.

باكۋ كەمە جاساۋ زاۋىتىندا كاسپي تەڭىزىندە جۇمىس ىستەيتىن العاشقى كونتەينەرلىك كەمەنىڭ قۇرىلىسى باستالدى. جوبا «قازمورترانسفلوت» پەن Abu Dhabi Ports سەرىكتەستىگى اياسىندا جۇزەگە اسىرىلۋدا. 2027 جىلدىڭ سوڭىنا دەيىن سىيىمدىلىعى ارقايسىسى 780 TEU بولاتىن ەكى كەمە سالۋ جوسپارلانعان.

اتالعان جوبالاردى ىسكە اسىرۋ قازاقستانعا:

- مىڭداعان جاڭا جۇمىس ورىندارىن قۇرۋعا;
- جوعارى قوسىلعان قۇنى بار وڭدەۋشى وندىرىستەردى دامىتۋعا;
- ەكسپورتتىق الەۋەتتى ارتتىرۋعا;
- جاسىل ەنەرگەتيكا مەن فارماتسەۆتيكا سالالارىن ىلگەرىلەتۋگە;
- وڭىرلەرگە ءىرى شەتەلدىك ينۆەستيتسيالار تارتۋعا جانە ولاردىڭ دامۋىنا سەرپىن بەرۋگە مۇمكىندىك بەرەدى.

جوعارىدا اتالعان بارلىق جوبالاردىڭ جۇزەگە اسىرىلۋى — پرەزيدەنت قاسىم-جومارت توقاەۆتىڭ ادىلەتتى قازاقستاندى قۇرۋ جانە اۋقىمدى ەكونوميكالىق ترانسفورماتسيا جۇرگىزۋ جونىندەگى دايەكتى ساياساتىنىڭ ناقتى ناتيجەسى.

مەملەكەت باسشىسى ەكونوميكانى ءارتاراپتاندىرۋ, وڭدەۋشى وندىرىستەردى دامىتۋ جانە ساپالى شەتەلدىك ينۆەستيتسيالار تارتۋ مىندەتىن قويعان بولاتىن. بۇگىندە بۇل ساياسات ناقتى ناتيجەلەر بەرۋدە: وڭىرلەردە زاماناۋي كاسىپورىندار اشىلىپ, مىڭداعان جۇمىس ورىندارى قۇرىلۋدا, ەكسپورتتىق الەۋەت ارتىپ, ەلدىڭ ونەركاسىپتىك تاۋەلسىزدىگى نىعايۋدا.

مەتاللۋرگيا, فارماتسەۆتيكا, جاسىل ەنەرگەتيكا جانە اۋىل شارۋاشىلىعى سالالارىنداعى ءىرى جوبالار قازاقستاننىڭ پرەزيدەنت ايقىنداعان باعىت بويىنشا جوعارى تەحنولوگيالى, ارتاراپتاندىرىلعان جانە باسەكەگە قابىلەتتى ەكونوميكانى قالىپتاستىرۋ جولىندا سەنىمدى قادام جاساپ كەلە جاتقانىن كورسەتەدى.