الەكساندر بلوكتىڭ: «كەۋدەمدە بار ءدۇر قازىنا, كىلتى ونىڭ مەندە عانا» دەگەن ولەڭ جولى بار-تىن. راسىندا, ءار ادامنىڭ كەۋدەسى ساندىق تولى ءزۇبارجات سىندى. تەك اشا بىلسەڭىز بولعانى. فرانتسۋز جازۋشىسى جان-پول سارتر ء«وزىڭدى تانىعىڭ كەلسە, ءوزىڭدى تاڭدا» دەگەن دانالىق ءسوز ايتادى. ءيا, ءار جاس اۋەل باستان ءوزىن تاڭداپ ءومىر سۇرگەنىمەن, كەيىن تاڭداۋى وزگەرەدى. قىزىققىش, ەلىككىش كۇيلەر سانا اۋانىن سان-ساققا بۇرادى. كونفۋتسي ىزدەنگەن ادامنىڭ ءۇش جولى بار ەكەنىن كورسەتەدى. ءبىرىنشى – ىزدەنىس جولى, ەكىنشى – ەلىكتەۋ, ءۇشىنشى – ءوز-ءوزىڭدى تابۋ جولى. شىعارماشىل تالانتتىڭ كوبى ەڭ وڭاي ەكىنشى جولعا ءتۇسىپ, قوس شىلبىردى قولىنا الىپ جۇرگەندە ءۇشىنشى جول الدىنا كەسە-كولدەنەڭ تۇرادى. بۇل ۇدەرىس جيىرما مەن وتىزدىڭ اراسىندا بولسا كەرەك.
ايتپاق وي بۇل ەمەس. ءبىز تاڭداۋدان شاتاسادى ەكەنبىز. ماسەلەن, ءسىز بالا كۇندە مۇقاعاليدى تاڭدادىڭىز. اقىندى جان-تانىڭىزبەن جاقسى كوردىڭىز. ادام كىمدى جاقسى كورسە, سوعان ەلىكتەمەي تۇرمايتىنى بەلگىلى. مۇقاعاليشا كۇلدىڭىز, مۇقاعاليشا جىلادىڭىز. بەرتىن كەلە تولەگەن ايبەرگەنوۆتى تاڭداپ, تولەگەنشە تولعاندىڭىز, تولەگەنشە عاشىقتىقتان باز كەشتىڭىز. شىعارماشىلىق ىزدەنىستىڭ بەلگىلى ءبىر مەجەسىنە جەتكەندە, ءوزىڭىزدىڭ قانداي قۇدىرەتتى جان ەكەنىڭىزدى سەزىنە باستارىڭىز انىق. اتا-تەگىڭىزدى, ۇلتىڭىزدى, الەمدەگى, ومىردەگى ورنىڭىزدى اڭعاراسىز. ءبىر ۋاقىتتا «مەن!» دەيسىز جان ۇشىرا. ءيا, ءسىز! ءسىز قۇدىرەتتى جانسىز! ءسىز بارىنەن مىقتىسىز! ءسىز ءوزىڭىزدى تاڭداڭىز! سوندا وزىڭىزشە كۇلۋدى, وزىڭىزشە سويلەۋدى, وزىڭىزشە جىندانۋدى باستايسىز.
...كوشەدە ءوزىن تاڭداعان جان اياڭداپ كەلەدى. ءجۇزى نۇرلى, ءسوزى مەيىربان, تولىق ءوز كەڭىستىگىندە, ءوز جالعىزدىعىندا. اقىندار ءجون ايتادى, «كىم سەزسە جالعىزدىعىن سول مەيىربان».
