فوتو: شقو تجد ءباسپاسوز قىزمەتى
ولار «شالقار» شارۋا قوجالىعىنان قاراعاش اۋىلىنا قاراي بەت العان. جول بويىندا ەر ادامدار توتە جولدى كەسىپ وتپەك بولىپ, وزەننىڭ ورتاسىندا قالىپ قويعان. كۋاگەرلەردىڭ ايتۋىنشا, وقيعا ورنىنا جەتكەن قۇتقارۋشىلار ادامداردى تاپپاعان.
سونداي-اق 23 ناۋرىزدان بەرى اياگوز وزەنىنەن وتپەك بولىپ, اتتان قۇلاپ, سۋعا باتىپ كەتتى دەگەن 1977 جىلى تۋعان ەر ادامدى ىزدەستىرۋ جۇمىستارى جۇرگىزىلىپ جاتىر. ەر ادامنىڭ «شىعىس» شارۋا قوجالىعىنا بارماق بولعانى انىقتالدى.
ايتا كەتەيىك, زارداپ شەككەندەر كوكتەمگى سۋ تاسقىنىنىڭ الدىن الۋ جۇمىستارىنا قاتىسقان ازاماتتار ەمەس.
27 ناۋرىزدا ساعات 18:26-دا سەمەي قورعانىس مينيسترلىگىنىڭ مي-17 تىكۇشاعى بورلى وزەنى بويىمەن اەروۆيزۋالدى ۇشۋدى جۇزەگە اسىردى.
ىزدەستىرۋ جۇمىستارىنا بارلىعى 82 ادام تجد كۇشتەرى مەن قۇرالدارىنان 4 سۋ كولىگى, 9 تەحنيكا, 4 ۇشقىشسىز ۇشۋ اپپاراتى, سونداي-اق جەرگىلىكتى تۇرعىنداردان ازاماتتار جۇمىلدىرىلدى.
حابار-وشارسىز كەتكەن ازاماتتاردىڭ وتباسىلارىنا تجد پسيحولوگتارى كومەك كورسەتىپ جاتىر.
