ءىس-شارادا قادىر نۇسىپاقىن ۇلىنىڭ شىعارماشىلىعىن ناسيحاتتاۋ, مۇرالارىن ۇلتتىق ارحيۆ قورىنا جيناقتاۋ جانە قۇندىلىعىن تانىتۋ جايى ءسوز بولدى. ۇلتتىق ءارحيۆتىڭ ديرەكتورى ساعيلا ەسىمسەيىتقىزى قالامگەر جونىندە پىكىر ءبىلدىرىپ, جەكە قور يەسىنىڭ №291 سەرتيفيكاتىن تابىستادى.
ءارحيۆتىڭ جەكە تەك قورىنا اقىننىڭ كوپ جىلعى ەڭبەكتەرى, شىعارماشىلىق الەۋەتىن كورسەتەتىن 5 تومدىق «ماڭگىلىك مۇرا» قولجازبالار جيناعى, گازەت-جۋرنالدارعا جاريالانعان ماقالالارى, مەرەكەلىك مەدالدارىنىڭ كۋالىكتەرى, قازاقستان رەسپۋبليكاسى ءتىل تۋرالى زاڭى مەن ۇكىمەت باعدارلاماسىنىڭ ورىندالۋ بارىسىندا قور يەسىنىڭ ساراپتاما جاساعان قۇجاتتارى, «اۆتورلىق ءان» اتالىمى بويىنشا بەرىلگەن جەڭىمپاز ديپلومى, «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى بەرىلگەندىگى تۋرالى جارلىعىنىڭ ءۇزىندىسى سەكىلدى قۇندى قۇجاتتار, سونىمەن قاتار «جان تۇڭعيىعىنداعى جاۋھارلار», «قازاق دەيتىن حالقىم بار», «اياۋلىم», «قىس», «سەنىم» اتتى ولەڭ جيناقتارى تابىستالدى.
جيىنعا اكادەميك شەرۋباي قۇرمانباي ۇلى, پروفەسسور, ل.ن.گۋميلەۆ اتىنداعى ەۇۋ-دىڭ كافەدرا مەڭگەرۋشىسى مۇراتبەك ارپابەكوۆ, ماتەماتيكا عىلىمدارىنىڭ دوكتورى, پروفەسسور ءابىلماجىن اداموۆ, سۋرەتشى, ونەر زەرتتەۋشى جەڭىس كاكەن ۇلى, اقىن, حالىقارالىق «الاش» ادەبي سىيلىعىنىڭ لاۋرەاتى نۇرلان قالقا جانە ارحيۆ قىزمەتكەرلەرى قاتىستى.
قادىر نۇسىپاقىن ۇلىنىڭ كوپشىلىككە بەلگىلى «تۋعان اۋىل», «ارمان بوپ قالقىدىڭ», «كوكەگىم» اندەرى رەسپۋبليكالىق راديولاردا تۇراقتى شىرقالسا, «تاعدىر كوزىندەگى تامشى», «جان تۇڭعيىعىنداعى جاۋھارلار», «عاشىقتىق عۇمىر», «تاۋەلسىزدىك», «سارتاپ ساعىنىشىم ساعىمدانعان» ولەڭ جيناقتارى وقىرماننىڭ ىستىق ىقىلاسىنا بولەنگەن. سونىمەن قاتار قالامگەردىڭ «سۇزگە سۇلۋ», «جۇگىنىس ءتۇنى جەتكەندە» دراماسى جەرگىلىكتى تەاتر ساحناسىندا قويىلىپ كەلەدى.
