سۋرەتتى تۇسىرگەن – ەرلان ومار, «EQ»
قازاقتىڭ ءدىلى مەن مادەنيەتىنە, تۇرمىسىنا, ءىشىپ-جەمىنە قاتىستى بارلىق ۇلتتىق ەرەكشەلىگى جارقىراتا كورىنىپ, قاي تۇسقا قاراساڭ دا قازاقى قۇندىلىقتارعا قانىعا تۇسەسىڭ. كەڭ دالا توسىندە ات شاپتىرىپ, بالۋان كۇرەستىرىپ, ارقان تارتىسىپ سايىسقان قازاق, سان ءتۇرلى ويۋى كوزدىڭ جاۋىن العان باۋ-باسقۇرمەن جاسانعان كيىز ءۇي ماڭىندا باۋىرساق ۇسىنىپ, كوجە ءپىسىرىپ, شاشۋ شاشقان قازاق, جىر-تەرمەسىن توگىلتىپ, اقىندارىن ايتىستىرىپ, مىڭ بۇرالا بيلەپ, ءسابيىنىڭ تۇساۋىن كەسكەن قازاق... شولپىسى سىلدىراپ, كۇلكىسى سىڭعىرلاپ, قوس ەتەك كويلەكتى باستىرا كيگەن قىزىل-جاسىل قامزول, بەشپەت, كاجەكەي, كۇمىسى جارقىراعان جاداعايلارىنان شاتتىقتىڭ لەبى ەسكەن انالار مەن قىز-كەلىنشەكتەر, دوڭگەلەك بورىك, كورىكتى شاپاندارىمەن ماڭعازدانا توپ جارعان ۇلكەن-كىشى ەرلەر... قازاقتىڭ قۋانىشىنا ءۇن قوسقانداي قورادا مال تولدەپ, دالادا جەر گۇلدەگەن ادەمى تابيعي كورىنىس... حالقىمىزدىڭ ۇلتتىق ءسان-سالتاناتى, رۋحاني بايلىق-مادەنيەتى اقتارىلا كورىنەتىندىكتەن ناۋرىزدى ءازىل-شىنى ارالاس «ۇلتتىق اي» دەپ يەمدەنەتىنىمىز بار.
قازاقتىڭ جوعارىدا ايتىلعان قۇندىلىقتارىن, اسىرەسە ۇلتتىق كيىمدەرىن جىل ون ەكى اي كيىپ جۇرۋگە, تۇتىنۋعا نە كەدەرگى؟ قازىر ءتۇرلى شەبەرلەر مەن ستيليست-ديزاينەرلەردىڭ قولىمەن ۇلتتىق كيىمدەرىمىز زاماناۋي تالاپقا ساي جاڭعىرا تىگىلۋدە. بىرقاتار شەبەرلەر الىس-جاقىن شەتەلدەرگە شىعىپ, ءتۇرلى كورمەلەر مەن بايقاۋلارعا قاتىسىپ, ۇلتتىق كيىمىمىزدى ءارى تانىتىپ, ءارى دامىتىپ, ءارى ساتىپ, تۇتىنۋشىسىن تاۋىپ تا ءجۇر. ءتىپتى ماڭعىستاۋداعى كەيبىر تىگىنشىلەرگە شەتەلدىكتەردەن ارنايى تاپسىرىس ءتۇسىپ, بىرنەشە جاداعاي, شاپان شەتەل استى. وسى ورايدا اقتاۋ قالاسىنداعى №19 مەكتەپ-گيمنازياسىنىڭ باستاماسى قۋانارلىق. مەكتەپتە باستاۋىش سىنىپ وقۋشىلارى اراسىندا تەك ناۋرىز ايىندا ەمەس, وقۋ جىلى باستالعالى ساباققا بىرىڭعاي تۇستەگى تاقيا مەن زاماناۋي ۇلگىدەگى كەۋدەشە كيىپ كەلىپ جۇرگەندەر بار. كيىم وقۋشىلارعا ۇنايدى, اتا-انالار قولداۋ كورسەتىپ وتىر, ال ۇستازدار ۇلتتىق يدەولوگيانى ناسيحاتتاۋدىڭ, بۇلدىرشىندەردى وتانسۇيگىشتىك سەزىمدە تاربيەلەۋدىڭ ءبىر باعىتى ساناپ قۋانۋدا. ءۇش مىڭنان اسا وقۋشى وقيتىن مەكتەپتە باستاۋىش سىنىپتارداعى ۇل-قىزداردىڭ كيىمى جوعارى سىنىپتاعى اعا-اپالارىنىڭ قىزىعۋشىلىعىن تۋدىرىپ, ولار دا ۇلتتىق كيىم كيۋگە ىقىلاس تانىتقان. مۇنداي جاعدايدىڭ وتكەن جىلدارى ناۋرىز ايى قارساڭىندا ەلىمىزدىڭ وزگە وڭىرلەرىندە دە باستاۋ العانىن بىلەمىز.
وقۋشىلاردىڭ باستاماسى ەرەسەكتەر تاراپىنان نەگە قولداۋ تاپپايدى؟ ۇلتتىق كيىمدى تەك توي-تومالاق, ناۋرىز ايىندا عانا ەمەس, ۇنەمى كيىپ ءجۇرۋدىڭ نەسى ابەس؟ داۋ-دامايى كوپ, اشىق-شاشىعى كوپ قازىرگى قوعامدا ۇرپاقتى اداستىرماي بابا جولىمەن تاربيەلەيمىن دەگەندەر ءۇشىن ۇلتتىق كيىم – باعا جەتپەس بايلىق, تاربيەنىڭ ءوزى. شەتەلدىكتەر قىزىققان قازاق كيىمىنىڭ قادىرىن ءوزىمىز ءبىلىپ, ءوزىمىز قولداپ, ءوزىمىز تۇتىنا جۇرەيىك...
ماڭعىستاۋ وبلىسى
