senate.parlam.kz
كوميتەت توراعاسى سۇيىندىك الداشەۆ جەتەكشىلىك ەتكەن كوشپەلى وتىرىستا پرەزيدەنتتىڭ «ادىلەتتى قازاقستاننىڭ ەكونوميكالىق باعدارى» قازاقستان حالقىنا جولداۋىن ىسكە اسىرۋ اياسىندا اتقارىلار شارۋا ايتىلدى. مەملەكەت كاسىپكەرلەرگە ەكونوميكاعا ينۆەستيتسيا سالۋعا, سالىقتاردى ادال تولەۋگە, جۇمىس ورىندارىن اشۋعا مۇمكىندىك بەرەتىن بيزنەستى دامىتۋ ءۇشىن نەعۇرلىم قولايلى جاعداي جاساۋدى كوزدەيتىنى ەسكەرتىلدى. كوميتەت مۇشەلەرى ماڭعىستاۋلىق كاسىپكەرلەرگە وسى جىلدىڭ قاراشا ايىندا شاعىن جانە ورتا كاسىپكەرلىكتى دامىتۋ تاقىرىبىندا ۇكىمەتتىك ساعات وتكىزۋدى جوسپارلاعانىن جەتكىزدى.
«بۇگىن وتىرىستا ورتالىق جانە جەرگىلىكتى اتقارۋشى ورگاندارمەن بىرلەسە وتىرىپ ماڭعىستاۋ وبلىسىنداعى شاعىن جانە ورتا بيزنەستىڭ جۇيەلى ماسەلەلەرى قارالدى. ءوز كەزەگىندە, بيزنەس وكىلدەرى تاراپىنان ناقتى ماسەلەلەر مەن ۇسىنىستار ايتىلادى. ولاردى كوميتەتتىڭ بۇدان بىلايعى زاڭنامالىق جۇمىسىندا قاراستىرۋ جانە ەسكەرۋ قاجەت دەپ سانايمىن. قاجەت بولعان جاعدايدا ورتالىق مەملەكەتتىك ورگاندارمەن بىرلەسىپ زاڭناماعا ءتيىستى تۇزەتۋلەر دايىنداۋ قاجەت», دەدى س.الداشەۆ.
«اتامەكەن» وڭىرلىك كاسىپكەرلەر پالاتاسىنىڭ وكىلى سەناتورلارعا وڭىردەگى احۋالدى باياندادى. ماڭعىستاۋ وبلىسى 7 ايدىڭ قورىتىندىسى بويىنشا سۋبسيديالاۋ بويىنشا قولداۋ العان جوبالار بويىنشا 1 ورىندى (560 جوبا) جانە كرەديتتەۋ سوماسى بويىنشا 5 ورىندى (23 ملرد تەڭگە) يەلەنگەنى ايتىلدى. سەنات دەپۋتاتتارى «اقتاۋ تەڭىز پورتى» اەا, اقتاۋ تەڭىز سولتۇستىك تەرمينالى, «سارجا» كولىك-لوگيستيكالىق ورتالىعى, قۇرىق پورتى جانە ءوڭىردىڭ باسقا دا بىرقاتار نىسانىن ارالادى.
