پاريجدە حالقىمىزدىڭ ۇلى اقىنى اباي شىعارماسىنا ارنالعان انيماتسيالىق بەينەبايان جارىققا شىقتى. قازاقستاندىق دومينيكا قىدىرباەۆا باستاعان 12 انيماتور 8 اي بويى ابايدىڭ «جەلسىز تۇندە جارىق اي» انىنە انيماتسيالىق بەينەبايان ءتۇسىردى.
ءاننىڭ مۋلتيپليكاتسيالىق نۇسقاسىمەن جۇمىس ىستەگەن ەۋروپاداعى باس انيماتسيا ورتالىعىنىڭ تۇلەكتەرى ءۇشىن, بۇل – العاشقى اۋقىمدى جوبا.
انيماتسيا جوباسىنىڭ مۇشەسى نوەمي بونت اتالعان فيلم تۋرالى ويىن جەتكىزدى.
– دايىندىق كەزەڭى ۇزاق بولدى, بىراق ءوندىرىستىڭ ءوزى, فيلم ءتۇسىرۋ ۇدەرىسى, دەكور, انيماتسيالار سالۋ كەزىندە ۋاقىت زىر ەتىپ وتە شىقتى. سەبەبى, وتە قارقىندى, قىزىقتى ۇدەرىس بولدى, – دەدى ول.
– بۇرىن مەن اباي تۋرالى ماردىمدى ەشنارسە بىلگەن جوقپىن. الايدا وسى جوبانىڭ ارقاسىندا قازاق مادەنيەتىمەن جاقىن تانىستىم. بۇل يدەيانى مەتسەنات لاريسا يندجۋدجيان قولداپ, جوباعا قازاقستاننان كاسىبي مۋزىكانتتاردى شاقىردى. 1,5 عاسىرعا جۋىق تاريحى بار ءان بەينەباياندا قازاق تىلىندە شىرقالدى. الايدا جوبا ماماندارى ءۇشىن فرانتسۋز تىلىنە اۆتورلىق اۋدارما دا جاسالدى, – دەدى انيماتسيا جوباسىنىڭ مۇشەسى كلوە بەنامي.
جوبا ارقىلى ۇلى اقىنعا دەگەن ماحاببات ۇلعايىپ, شەتەل تۇرعىندارى ۇلتىمىزدىڭ مادەنيەتىن جاقىننان تانۋعا ىقىلاستارى ويانعان.
وتاندىق مۋزىكانت عازيزا عابدراحيموۆا جوبا تۋرالى: «مەن ءوزىم قازاقتىڭ ۇلتتىق ونەرىن ناسيحاتتايتىن مۋزىكانت بولعاندىقتان, جوباعا قاتىسقانىما وتە قۋانىشتىمىن. بۇل قىزىقتى جۇمىس. ويتكەنى ابايدىڭ شىعارماشىلىعى, ونىڭ اندەرى, مادەنيەتىمىز باسقا ەلدەردە, شەتەلدە ناسيحاتتالۋدا. قازاقستان ەلشىلىگىندە وتكەن تۇساۋكەسەردە تۋىندى جيىلعان جۇرتتىڭ كوڭىلىنەن شىقتى», – دەدى.
سونىمەن قاتار بەينەباياننىڭ رۋحاني قىر-سىرىن اشۋعا شەتەلدىك اقىندار دا ءوز ۇلەسىن قوسقان.
– مادەنيەت – بۇل ۇلتتاردى بىرىكتىرۋشى كوپىر. ال پوەزيا – حالىقتىڭ جانى, جانە ونىڭ قۇندىلىقتارىن وزگە تىلدە جەتكىزۋ ەرەكشە قۇبىلىس. قازاق-فرانتسۋز كومانداسى ءساتتى شىققان تۋىندىدان كەيىن, بىرىككەن جوبالار جاساۋدى الداعى ۋاقىتتا تاعى دا جالعاستىرماق نيەتتە, – دەدى اقىن تاۋرا تاباتاباي – ۆەرنە.
