فوتو: polisia.kz
وسكەمەن قالالىق اكىمدىگى كريمينالدىق پوليتسيا ءبولىمىنىڭ قىزمەتكەرلەرى جەدەل-ىزدەستىرۋ ءىس-شارالارىن جۇرگىزۋ بارىسىندا 28 كەلىدەن استام تىيىم سالىنعان زاتتاردى تاركىلەدى. ماسەلەن, 6 قاڭتاردا قالاداعى ۇيلەردىڭ ءبىرىنىڭ اۋلاسىندا ءتارتىپ ساقشىلارى مەملەكەتارالىق ىزدەۋدە جۇرگەن 39 جاستاعى ازاماتتى ۇستادى.
كۇدىكتىنىڭ تۇرعىلىقتى جەرىن ءتىنتۋ بارىسىندا 790 دانا قوڭىر-جاسىل ءتۇستى, ەرەكشە ءيىسى بار وسىمدىك زاتى بار بۋمالاردى تاپتى.
ساراپتاما قورىتىندىسىنا سايكەس, كۇدىكتى ءوز پاتەرىندە 28,3 كەلى كەپتىرىلگەن ماريحۋانا ساقتاعان. قازىرگى ۋاقىتتا ەر ادام ۋاقىتشا ۇستاۋ يزولياتورىنا قامالدى. قازاقستان رەسپۋبليكاسى قىلمىستىق كودەكسىنىڭ 297-بابى 3-بولىگى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. قىلمىسكەر 10 جىلدان 15 جىلعا دەيىن باس بوستاندىعىنان ايىرىلۋى مۇمكىن.
