ءو.جولداسبەكوۆ اتىنداعى ستۋدەنتتەر سارايىندا وڭتۇستىك استاناداعى فيزيكا-ماتەماتيكا باعىتىنداعى NIS-ءتىڭ 140 تۇلەگىنە سالتاناتتى تۇردە اتتەستاتتار تابىستالدى. بۇل ءبىلىم ورداسى ەل جانە الەمدەگى ەڭ تابىستى مەكتەپتەردىڭ ءبىرى رەتىندە تانىمال, وقۋشىلار مەن تۇلەكتەردىڭ بىرەگەي جەتىستىكتەرى قازاقستاندى جاھاندىق ءبىلىم بەرۋ كەڭىستىگىنە بەلسەندى تۇردە ينتەگراتسيالاپ كەلەدى.
2021-2022 وقۋ جىلىندا NIS جوعارى اكادەميالىق ستاندارتتاردى تاعى دا راستادى. كەمبريدجدىڭ حالىقارالىق ەمتيحان كەڭەسىنە تاپسىرىلاتىن سىرتقى جيىنتىق باعالاۋدىڭ قورىتىندىلارى بويىنشا ءبىلىم ساپاسى 99,3 بالدى قۇرادى; ءاربىر ەكىنشى وقۋشى A* جانە A باعالارىن الدى, IELTS حالىقارالىق سەرتيفيكاتىنىڭ ورتاشا بالى 7,1 بالدى قۇرادى.
الماتىداعى فيزيكا-ماتەماتيكا باعىتىنداعى NIS ءۇشىنشى جىل قاتارىنان جالپى ءبىلىم بەرەتىن پاندەردەن رەسپۋبليكالىق وليمپيادانىڭ قورىتىندىسى بويىنشا «ەلدىڭ ۇزدىك وليمپيادالىق كومانداسى» بولىپ تانىلدى.
2022 جىلعى تۇلەكتەر اراسىندا تاير ساتۋبالدين, تاميرلان بەكتەمىسوۆ, نۇراسىل ابدىرازاق جانە باسقا دا حالىقارالىق جانە رەسپۋبليكالىق وليمپيادالاردىڭ, سونىڭ ىشىندە IMO حالىقارالىق ماتەماتيكا وليمپياداسى, جاۋتىكوۆ وليمپياداسى, جىبەك جولى حالىقارالىق وليمپياداسى سياقتى بەدەلدى ءبىلىم بايگەسىنىڭ جەڭىمپازدارى بار.
مەكتەپ ديرەكتورى ەرمەك پايزوۆ جاقىندا عانا وزدەرىنىڭ اكادەميالىق جەتىستىكتەرىن تاعى ءبىر مارتە راستاعان وقۋشىلارعا اتتەستاتتاردى ءبىرىنشى بولىپ تابىس ەتتى. «التىن بەلگىگە» ۇمىتكەر 9 زياتكەر جانە ۇزدىك اتتەستاتقا ۇمىتكەر 29 وقۋشى ءوز بىلىمدەرىن دالەلدەدى.
اتتەستاتتاردى سالتاناتتى تۇردە تابىستاۋ ءراسىمى ءو.جولداسبەكوۆ اتىنداعى ستۋدەنتتەر سارايىندا وتكەنىنىڭ سيمۆولدىق ءمانى بار. بۇگىندە تۇلەكتەردىڭ ۇشتەن ءبىر بولىگىنەن استامى وزدەرىن ستۋدەنت دەپ سەنىمدى تۇردە ايتا الادى. ولاردىڭ بارلىعى وتاندىق جانە شەتەلدىك بەدەلدى ۋنيۆەرسيتەتتەردىڭ گرانتتارىنا يە بولدى. وسى مەكتەپ تۇلەكتەرىنىڭ شىرماۋىق ليگاسىنا ءتۇسۋ ءداستۇرىن دانا ەرالي مەن اليما تۇياقاەۆا جالعاستىردى.
دانا پرەزيدەنتتەر مەن نوبەل سىيلىعى لاۋرەاتتارىنىڭ الما-ماتەرى رەتىندە بەلگىلى يەل ۋنيۆەرسيتەتىنىڭ تولىق قارجىلاندىرۋ گرانتى يەگەرى اتاندى. ول Ethics, Politics, and Economics سالاسىندا ءبىلىم الۋدى جوسپارلاپ وتىر. اليما تۇياقاەۆا اقش-تاعى بيزنەس مەكتەپتەرى اراسىندا كوشباسشى بولىپ تابىلاتىن پەنسيلۆانيا ۋنيۆەرسيتەتىنەن رەسمي شاقىرتۋ الدى.
– بىرنەشە جىل بويى ۋنيۆەرسيتەتىمنىڭ وقۋعا تۇسكەن ستۋدەنتتەرگە جىبەرگەن حاتتارىن وقىپ كەلەمىن. ءتىپتى جاتقا بىلەم. بىراق بۇگىنگى حاتتىڭ مازمۇنى مۇلدە باسقا. «It’s time to celebrate» («تويلايتىن ۋاقىتى كەلدى») دەگەن جازۋدى كورىپ, جىلاپ جىبەردىم.
«التىن بەلگى» يەگەرى اتانعان ەليكاي اتاباەۆا سالتاناتتى جيىندا مەكتەپ تۇلەكتەرىنىڭ اتىنان سۇيىكتى ءبىلىم ورداسىنا العىسىن جەتكىزدى:
– مەكتەپ بىزگە ۇلكەن مۇمكىندىكتەر بەرىپ, تاعدىردىڭ كەز كەلگەن سوققىسىنا توتەپ بەرۋدى ۇيرەتتى, – دەدى ول.
