تايپاق وڭىرىندە 1965 جىلى دۇنيەگە كەلگەن قايىرعالي جۇما ۇلىنىڭ ەڭبەك كىتاپشاسىندا كوپ جازبا جوق. 1991 جىلعى ساۋىردە باتىس قازاقستان ايماقتىق ەلەكترجەلىلىك كومپانياسىنىڭ مەحانيكالاندىرۋ جانە اۆتوموبيل كولىگى قىزمەتىنە جۇرگىزۋشى بولىپ ورنالاسقان. سودان بەرى اتتاي 35 جىل ءوتىپتى. وسى سالادا تابان اۋدارماي قىزمەت ەتىپ كەلە جاتقان كەيىپكەرىمىز 2006 جىلى «باتىس ەنەرگەتيكا ارداگەرى» اتاعىنا يە بولعان. تاجىريبەسى تولىسقان مامان رەتىندە ارىپتەستەرى ونى ايرىقشا قۇرمەتتەيدى.
«مەن مەكەمەگە جۇمىسقا كەلگەندە قايىرعالي اعا سان جىلعى ەڭبەك ءوتىلى بار تاجىريبەلى مامان ەدى. قازىر ءبىر سالادا, ءبىر بريگادادا قىزمەت ەتەمىز. ول «ەتل-35» اتالاتىن ەلەكتر-تەحنيكالىق زەرتحانامىزدىڭ كولىگىن تىزگىندەيدى. ۇنەمى ساپاردامىز, اۋىل-ايماقتى ارالاپ, قوسالقى ستانسالارعا بارامىز. جىلدىق كەستەگە سايكەس وبلىستىڭ تۇكپىر-تۇكپىرىن شارلاپ, ەلەكتر قۇرىلعىلارىن پروفيلاكتيكالىق سىناقتان وتكىزىپ, اقاۋلاردى انىقتايمىز.ۇنەمى جولدا جۇرەتىندىكتەن, كولىگىمىزدىڭ كىدىرمەۋى, دىتتەگەن جەرگە تەز جەتۋىمىز وتە ماڭىزدى. قايىرعالي اعا ەشقاشان جولدا قالدىرعان ەمەس. بۇل كىسىنىڭ «تەمىر تۇلپارى» جىلدىڭ قاي مەزگىلىندە دە ساقاداي ساي», دەيدى مەكەمەنىڭ وقشاۋلاۋ جانە كەرنەۋدەن قورعاۋ قىزمەتىنىڭ باسشىسى سانجار امىرەەۆ.
قازاقتا «مال يەسىنە تارتادى» دەگەن ءسوز بار. قايرەكەڭ قىزمەتتىك كولىگىن ءاردايىم بابىندا ۇستايدى: اي سايىنعى تەحنيكالىق كۇتىم, جوسپارلى جوندەۋ, قاۋىپسىزدىك, باقىلاۋ تەتىكتەرىن تەكسەرىپ وتىرۋ – بۇلجىماس داعدىعا اينالعان. «اۋىرىپ ەم ىزدەگەنشە, اۋىرمايتىن جول ىزدە» قاعيداسى ادامعا عانا ەمەس, تەحنيكاعا دا قاتىستى دەيدى ول. بۇل, ارينە, كوپ جىلعى تاجىريبە مەن جاۋاپكەرشىلىكتەن تۋىندايتىن قاسيەت.
ەنەرگەتيكتەردىڭ جۇمىسى اسكەري قىزمەتكە ۇقساس. تاۋلىكتىڭ كەز كەلگەن ۋاقىتىندا, اۋا رايىنىڭ قولايسىزدىعىنا قاراماستان جولعا شىعۋعا تۋرا كەلەدى. وسىنداي ساتتە قايىرعالي جۇما ۇلىنىڭ سابىرلى مىنەزى مەن سەنىمدى ءىس-ارەكەتى بۇكىل توپقا دەمەۋ بولادى.
2024 جىلعى كوكتەمدە باتىس قازاقستان وبلىسىندا الاپات سۋ تاسقىنى بولدى. ءتىلسىز جاۋ كوپتەگەن ەلدى مەكەنگە قاۋىپ ءتوندىردى. بىرنەشە شاقىرىمدىق ەلەكتر جەلىسى سۋ استىندا قالىپ, باعانالار قۇلادى. ءبورلى اۋدانىنىڭ اقساي قالاسىندا, پۋگاچەۆ اۋىلىندا ەنەرگەتيكتەر قۇتقارۋشىلارمەن بىرگە كۇنى-ءتۇنى قىزمەتتە ءجۇردى. قۋاتى 35/10 كۆ «ارالتال» قوسالقى ستانساسىن قالپىنا كەلتىرۋ وڭايعا سوقپادى. قۇلاعان تىرەۋلەردى قايتا ورناتۋ, تىرەكتەر مەن سىمداردى اۋىستىرۋ ءۇشىن «باتىس قازاقستان اەجك» جشس-نىڭ جەدەل توبى سول جەردەن تابىلدى. ارناسىنان اسقان شىڭعىرلاۋ وزەنىنىڭ جاعاسىندا, سارقىراعان سۋ مەن كۇركىرەگەن سەڭمەن الىسىپ ءجۇرىپ, قايىرعالي جۇما ۇلى 1 شاقىرىم قاشىقتىقتاعى ەلەكتر وتكىزگىشىن اۋىستىرىپ, بۇزىلعان 10 كۆ ەلەكتر جەلىسىن قالپىنا كەلتىرىپ جاتقان ماماندارعا ەرەكشە كومەك كورسەتتى. سونداي-اق ءتۇن ىشىندە «اقسايجىلقۋات» مەملەكەتتىك كاسىپورنىنىڭ 600 مەترلىك تىرەكتەرىن, وقشاۋلاعىشتار مەن وتكىزگىشتەردى اۋىستىرعانى دا ارىپتەستەرىنىڭ ەسىندە.
«ەنەرگەتيكا سالاسى – ەكونوميكانىڭ كۇرەتامىرى. جارىق پەن جىلۋدى ۇزدىكسىز جەتكىزىپ وتىرعان ماماندار ەلدىڭ تۇراقتى دامۋى مەن حالىقتىڭ تۇرمىس ساپاسىنا تىكەلەي ۇلەس قوسىپ كەلەدى. قىستىڭ قاقاعان ايازىندا دا, جازدىڭ اپتاپ ىستىعىندا دا ءبىز تاۋلىك بويى تىنىمسىز ەڭبەك ەتەمىز. اسىرەسە كەيىنگى كەزدە سالادا ينفراقۇرىلىمدى جاڭعىرتۋ, تسيفرلاندىرۋ مەن بالامالى ەنەرگيا كوزدەرىن دامىتۋ باعىتىندا ماڭىزدى جوبالار جۇزەگە اسىرىلىپ جاتىر. ەلىمىز ەڭبەگىمىزدى ەلەپ, وتكەن جىلدىڭ سوڭىندا پرەزيدەنت III دارەجەلى «ەڭبەك داڭقى» وردەنىن ءوز قولىمەن كەۋدەمىزگە تاقتى. قاراپايىم جۇمىسشىنىڭ ەڭبەگى ەسكەرىلىپ, مەرەيى وسكەنى – ۇلكەن مارتەبە. ءبىزدىڭ جەتىستىك – ۇجىمدىق ەڭبەكتىڭ ناتيجەسى. ماسەلەن, مەن ءوز ارىپتەستەرىم – ۋچاسكە باسشىسى سانجار امىرەەۆ پەن ينجەنەر التىنبەك كەرەەۆتىڭ كوپتەگەن جۇمىسشى-ەڭبەككەردى باۋلىپ, تاربيەلەپ جۇرگەن ەڭبەگى ەسكەرىلسە, كەلەشەكتە ولاردىڭ دا قاجىرلى ءىسى ءوز باعاسىن السا دەپ تىلەيمىن», دەيدى ەڭبەك ارداگەرى.
ەنەرگەتيكا – قولعا ۇستالمايتىن, كوزگە كورىنبەيتىن, بىراق قازىرگى ەكونوميكانىڭ ەڭ قاجەتتى شەشۋشى كۇشى. اعزانى تۇگەل تورلاپ, تىرناقتىڭ ۇشىنان توبە قۇيقاعا دەيىن تارالاتىن جۇيكە تامىرلارى سەكىلدى, ەنەرگەتيكا دا بۇكىل سالانى قامتىپ جاتىر. مۇنى قاراپايىم ادام بار كەزىندە بايقاماس, بىراق وشكەن ساتتە بىردەن ىزدەيتىنى انىق. ەندەشە, وسىنداي ماڭىزدى سالانىڭ ۇزدىكسىز جۇمىس ىستەپ تۇرۋىنا ۇلەس قوسقان ءار ادامنىڭ ەڭبەگى قادىرلى.
باتىس قازاقستان وبلىسى
