باسقوسۋدا جاقىپ اسانوۆ كاسىبي ءوسۋدىڭ نەگىزگى فاكتورى – ارتىق ءارى ءتيىمسىز ۇدەرىستەردەن ارىلا وتىرىپ, شىن مانىندە ماڭىزدى مىندەتتەرگە شوعىرلانا ءبىلۋ ەكەنىن اتاپ ءوتتى.
«كەز كەلگەن جۇيەدە سالدارمەن عانا كۇرەسىپ قويماي, تۇپكى سەبەپتى تاۋىپ, ولاردى جويۋ ماڭىزدى. ارتىق مىندەتتەر مەن شەكتەن تىس جۇكتەمە دامۋعا كەدەرگى كەلتىرەدى. نەگىزگى باعىتتارعا باسىمدىق بەرىپ, ناقتى ناتيجەگە قول جەتكىزۋ قاجەت», دەپ اتاپ ءوتتى ۆيتسە-سپيكەر.
كەزدەسۋ بارىسىندا جاقىپ اسانوۆ مىقتى كوماندانىڭ ماڭىزى مەن ساپالى كادرلىق ىرىكتەۋگە نازار اۋدارىپ, جاۋاپكەرشىلىك, موتيۆاتسيا جانە قىزمەتكەرلەردىڭ جەكە قاسيەتتەرى جەمىستى جۇمىستىڭ نەگىزى ەكەنىن باسا ايتتى.
«قازىرگى مەملەكەتتىك قىزمەت باسقارۋدىڭ جاڭا تاسىلدەرىن, سونىڭ ىشىندە ۇدەرىستەردى تسيفرلاندىرۋ مەن جوبالىق باسقارۋدى ەنگىزۋدى تالاپ ەتەدى. بۇل جۇمىس تيىمدىلىگىن ايتارلىقتاي ارتتىرىپ, شەشىم قابىلداۋدى جەدەلدەتۋگە مۇمكىندىك بەرەدى», دەدى جاقىپ اسانوۆ.
جاس مامانداردىڭ وڭىرلەردى جانە بۇكىل ەلدى دامىتۋداعى ءرولى ەرەكشە ەكەنى بولەك اتالدى. وسىعان بايلانىستى كەزدەسۋگە قاتىسۋشىلارعا كاسىبي داعدىلارىن ۇنەمى شىڭداپ, جاڭا بىلىمگە ۇمتىلۋ جانە ناتيجەگە باعىتتالعان بولۋ ۇسىنىلدى.
ءىس-شاراعا جەرگىلىكتى اتقارۋشى, مەملەكەتتىك ورگانداردىڭ اۋماقتىق بولىمشەلەرىنىڭ وكىلدەرى, سونداي-اق ءوڭىردىڭ مەملەكەتتىك جاس قىزمەتشىلەرى قاتىستى.
