فوتو: ءماجىلىس
پارلامەنت العاشقى كەزەكتە جاڭارتىلعان كونستيتۋتسيا اياسىندا ازىرلەنگەن «قازاقستان رەسپۋبليكاسىنىڭ پرەزيدەنتى تۋرالى» كونستيتۋتسيالىق زاڭدى ماقۇلدادى. قۇجاتتا پرەزيدەنت مەملەكەتتىڭ جوعارى لاۋازىمدى تۇلعاسى رەتىندە ايقىندالىپ, بيلىك تارماقتارىنىڭ ۇيلەسىمدى جۇمىسىن قامتاماسىز ەتەتىن, كونستيتۋتسيا مەن ازاماتتاردىڭ قۇقىقتارى مەن بوستاندىقتارىنىڭ كەپىلى رەتىندە بەلگىلەنگەن. زاڭدا كەزەكتەن تىس سايلاۋ ينستيتۋتىنىڭ جويىلۋىنا بايلانىستى پرەزيدەنتتى سايلاۋ ءتارتىبى, انت بەرۋ ءراسىمى جانە وكىلەتتىك مەرزىمى ناقتىلانعان.
بۇدان بولەك, پارلامەنت «قازاقستان رەسپۋبليكاسىنىڭ قۇرىلتايى جانە ونىڭ دەپۋتاتتارىنىڭ مارتەبەسى تۋرالى» جانە «قازاقستان حالىق كەڭەسى تۋرالى» كونستيتۋتسيالىق زاڭداردى دا ەكىنشى وقىلىمدا قابىلدادى. ءماجىلىستىڭ مالىمەتىنشە, جاڭا زاڭ ءبىر پالاتالى پارلامەنت – قۇرىلتايدىڭ كونستيتۋتسيالىق-قۇقىقتىق نەگىزدەرىن ايقىندايدى. قۇرىلتاي 5 جىل مەرزىمگە سايلاناتىن 145 دەپۋتاتتان تۇرادى.
قازاقستان حالىق كەڭەسىنە ىشكى ساياسات بويىنشا ۇسىنىستار ازىرلەۋ, قۇرىلتايعا زاڭ جوبالارىن ەنگىزۋ, رەفەرەندۋم وتكىزۋ باستاماسىن كوتەرۋ جانە مەملەكەت پەن ازاماتتىق قوعام اراسىنداعى ديالوگتى دامىتۋ وكىلەتتىكتەرى بەرىلەدى. سونداي-اق ورگانعا الەمدىك جانە ءداستۇرلى دىندەر كوشباسشىلارى سەزىن ۇيىمداستىرۋ مىندەتى جۇكتەلەدى. كەڭەستىڭ جوعارعى ورگانى – سەسسيا بولادى.
استانا مارتەبەسىن ايقىنداعان زاڭ جوباسىندا ەلوردا ءماسليحاتى شەتەلدىك جەرگىلىكتى وكىلدى ورگاندارمەن بايلانىس ورناتۋ, قالا قۇرىلىسى قۇجاتتارىن بەكىتۋ جانە جەر تەلىمدەرىن يەلىكتەن شىعارۋ سياقتى ماسەلەلەردى قارايدى. ال اكىمدىككە قالا قۇرىلىسى جوبالارىن باقىلاۋ, اپاتتىق تۇرعىن ۇيلەردى بۇزۋدى ۇيىمداستىرۋ, قالانىڭ ارحيتەكتۋرالىق كەلبەتىن قالىپتاستىرۋ جانە جول قوزعالىسىن ۇيىمداستىرۋ سحەمالارىن ازىرلەۋ سياقتى مىندەتتەر جۇكتەلەدى.
سونداي اق قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» زاڭ جوباسىندا وبلىستار, اۋداندار, قالالار, اۋىلدار جانە وزگە دە ەلدى مەكەندەردىڭ مارتەبەسى ايقىندالىپ, ولاردى قۇرۋ, قايتا ۇيىمداستىرۋ جانە تاراتۋ ءتارتىبى بەكىتىلگەن. زاڭعا سايكەس, اكىمشىلىك-اۋماقتىق وزگەرىستەر الەۋمەتتىك-ەكونوميكالىق كورسەتكىشتەر نەگىزىندە قارالادى. سونىمەن قاتار اكىمشىلىك بىرلىكتەر مەن ولاردىڭ شەكارالارىن «مەكەنجاي تىركەلىمى» جۇيەسىندە ەسەپكە الۋ جانە تىركەۋ ءتارتىبى ەنگىزىلەدى.
سوڭعى «بىرقاتار كونستيتۋتسيالىق زاڭداردى كونستيتۋتسياعا سايكەستەندىرۋ تۋرالى» زاڭ جوباسى سايلاۋ ناۋقاندارى كەزىندە انىقتالعان ماسەلەلەردى ەسكەرە وتىرىپ ازىرلەنگەن.
قۇجاتتا اكىمشىلىك-اۋماقتىق بىرلىكتەر قايتا قۇرىلعان جاعدايدا سايلاۋ كوميسسيالارىنىڭ وكىلەتتىكتەرىن ساقتاۋ جانە اۋىسۋ ءتارتىبىن رەتتەۋ كوزدەلگەن. سونىمەن قاتار اۋماقتىق سايلاۋ كوميسسياسى مۇشەلەرىنىڭ بالا كۇتىمىنە نەمەسە وقۋ دەمالىسىنا شىعۋىنا بايلانىستى ولاردىڭ وكىلەتتىكتەرىن ۋاقىتشا توقتاتىپ, ورنىنا ۋاقىتشا مۇشە تاعايىنداۋ تەتىگى ەنگىزىلەدى.
زاڭ جوباسىندا اكىمدىككە كانديداتتاردىڭ داۋىستارى تەڭ تۇسكەن جاعدايدا قايتا داۋىس بەرۋ ءتارتىبى دە ايقىندالعان. بۇدان بولەك, كانديداتتاردى ۇسىنۋ ءراسىمى جۇيەلەنىپ, ءبىر ازاماتتىڭ ءبىر ۋاقىتتا ءماسليحات دەپۋتاتتىعىنا جانە اكىم لاۋازىمىنا تۇسۋىنە, سونداي-اق بىرنەشە سايلاۋ وكرۋگى بويىنشا اكىمدىككە كانديدات بولۋىنا شەكتەۋ قويىلادى.
