فوتو: اقوردا
«كەنيا – قازاقستاننىڭ افريكا قۇرلىعىنداعى ەڭ ءىرى جانە سەنىمدى ساۋدا سەرىكتەسىنىڭ ءبىرى. ءبىز ەكى ەلدىڭ ىقپالداستىعىن ودان ءارى بەكەمدەي تۇسۋگە نيەتتىمىز. كەنيا رەسپۋبليكاسى سوڭعى جىلدارى دامۋدىڭ داڭعىل جولىنا شىقتى. شىعىس افريكانىڭ جاۋھارى سانالاتىن بۇل ەل قارجى, اۋىل شارۋاشىلىعى, كولىك-لوگيستيكا جانە باسقا دا سالالاردا ەلەۋلى جەتىستىككە قول جەتكىزدى. نايروبي قالاسى ماڭىزدى حالىقارالىق ديپلوماتيا ورتالىعى سانالادى. مۇندا بىرىككەن ۇلتتار ۇيىمىنىڭ بىرنەشە قۇرىلىمى ءتيىمدى جۇمىس ىستەپ تۇر. جالپى العاندا, كەنيانىڭ الەمدىك ساحناداعى بەدەلى ارتىپ كەلەدى. بۇل پرەزيدەنت رۋتونىڭ سارابدال ساياساتى مەن كورەگەن كوشباسشىلىعىنىڭ ناتيجەسى دەپ بىلەمىز. ءبىز بىلتىر نايروبيدە ءوز ەلشىلىگىمىزدى اشتىق. بۇل شەشىم قازاقستاننىڭ كەنياعا شىنايى ىقىلاسى مەن دوستىعىن اڭعارتادى. جالپى, بۇل – قازاقستاننىڭ افريكا قۇرلىعىنداعى التىنشى ديپلوماتيالىق وكىلدىگى. ەلىمىز افريكا مەملەكەتتەرىمەن بايلانىسىن بەكەمدەۋگە باسا ءمان بەرەدى», دەدى قازاقستان پرەزيدەنتى.
قاسىم-جومارت توقاەۆتىڭ ايتۋىنشا, تاراپتار بىرقاتار ماڭىزدى ماسەلە بويىنشا مازمۇندى كەلىسسوز جۇرگىزگەن.
«اسىرەسە, ساۋدا-ەكونوميكالىق ىقپالداستىقتى كەڭەيتۋگە نازار اۋداردىق. كولىك, اۋىل شارۋاشىلىعى, اقپاراتتىق تەحنولوگيالار, تۋريزم, ونەركاسىپ جانە باسقا دا سالادا بىرلەسكەن جوبالاردى ىسكە اسىرۋعا ۋاعدالاستىق. ەلدەرىمىزدىڭ اراسىندا تۇراقتى تۇردە تىكەلەي اۋە رەيستەرىن اشۋ مۇمكىندىگى تۋرالى دا پىكىر الماستىق. ءبىز اۋىل شارۋاشىلىعى ونىمدەرىن, ەڭ الدىمەن, بيدايدى جانە وزگە دە تاۋارلاردى افريكا نارىعىنا جەتكىزۋگە مۇددەلىمىز. وسى ماقساتپەن مومباسا پورتىن پايدالانۋ ماسەلەسىن قاراستىردىق. بۇل – وسى ايماقتىڭ سەگىز مەملەكەتىنە جول اشاتىن شىعىس افريكاداعى ەڭ ءىرى لوگيستيكا ورتالىعىنىڭ ءبىرى. بۇگىندە قازاقستان نارىعىندا كەنيانىڭ بىرقاتار تاۋارى, سونىڭ ىشىندە ءشاي جانە كوفە ونىمدەرى بار. مۇنى ەكى ەل اراسىندا ورنىققان تۇراقتى ساۋدا قاتىناسىنىڭ كورىنىسى دەۋگە بولادى. سونىمەن قاتار ءبىز كەنيا ونىمدەرىن قازاقستان ارقىلى ەۋرازيا ەلدەرىنە جەتكىزۋ ماسەلەسىن تالقىلادىق. ساۋدا-ەكونوميكالىق ىقپالداستىقتى جاڭا دەڭگەيگە كوتەرۋ قاجەت ەكەنىن ايتتىق. قازاقستان-كەنيا ىسكەرلىك كەڭەسىن قۇرۋ تۋرالى باستاما كوتەردىك. بۇل كەڭەس ناقتى جوبالاردى ىلگەرىلەتۋگە, ءوزارا الىس-بەرىستى ارتتىرۋعا مۇمكىندىك بەرەدى», دەدى مەملەكەت باسشىسى.
قازاقستان پرەزيدەنتى كەنيا ەلىمىزدىڭ Egov جۇيەسىندەگى, عارىش جانە اقپاراتتىق تەحنولوگيا سالالارىنداعى جەتىستىگىنە قىزىعۋشىلىق تانىتىپ وتىرعانىن ايتتى
«ساپار اياسىندا پرەزيدەنت رۋتو مىرزا AlemاI حالىقارالىق جاساندى ينتەللەكت ورتالىعىنىڭ جانە قازاقستاننىڭ ۇلتتىق عارىش ورتالىعىنىڭ جۇمىسىمەن تانىسادى. كەلىسسوزدەر بارىسىندا مادەنيەت, تۋريزم, ءبىلىم جانە عىلىم سالالارىنداعى بايلانىستارعا دا كوڭىل بولدىك. كەنيا تابيعاتتى قورعاۋ جانە بيوالۋاندىقتى ساقتاۋ ماسەلەسىنە ايرىقشا ءمان بەرەدى. بۇل ۇستانىم ءبىزدىڭ ەلىمىزدەگى «تازا قازاقستان» يدەولوگياسىمەن ۇندەس ەكەنىن ەرەكشە اتاپ وتكىم كەلەدى. سونداي-اق بۇگىن ەلوردامىزدا قازاقستان-كەنيا بيزنەس-فورۋمى ءوتىپ جاتىر. وسى ماڭىزدى جيىنعا ەكى ەلدىڭ ىسكەر ازاماتتارى قاتىسۋدا. بۇل ءىس-شارا قوس تاراپتىڭ الىس-بەرىسىن ودان ءارى تەرەڭدەتۋگە مۇمكىندىك بەرەرى ءسوزسىز. ءبىز ۇكىمەتتەرىمىزگە جان-جاقتى سەرىكتەستىكتى جانداندىرۋ ءۇشىن ناقتى شارالار قابىلداۋ جونىندە تاپسىرما بەرۋگە ۋاعدالاستىق», دەدى قاسىم-جومارت توقاەۆ.
مەملەكەت باسشىسى كەنيا پرەزيدەنتىن ءى دارەجەلى «دوستىق» وردەنىمەن ماراپاتتادى
پرەزيدەنتتەر كەلىسسوز بارىسىندا حالىقارالىق ماسەلەلەر جونىندە پىكىر الماسقان
«افريكا قۇرلىعىنداعى جانە تاياۋ شىعىستاعى احۋالدى تالقىلادىق. نايروبي ايماقتىق قاقتىعىستاردى رەتتەۋدى كوزدەيتىن بىتىمگەرلىك باستامالارعا بەلسەندى قولداۋ كورسەتۋدە. سونداي-اق كەنيا افريكاداعى بەيبىتشىلىك پەن تۇراقتىلىقتى نىعايتۋ ءۇشىن جۇيەلى جۇمىس جۇرگىزىپ كەلەدى. ءبىز مۇنى جوعارى باعالايمىز. الەمدەگى كوپتەگەن تۇيتكىلگە قاتىستى قازاقستان مەن كەنيانىڭ ۇستانىمدارى – ۇقساس. ەكى ەل دە حالىقارالىق ماسەلەلەردى تەك بەيبىت, ديپلوماتيالىق جولمەن, ياعني, كەلىسسوزدەر ارقىلى شەشۋ كەرەك دەپ ەسەپتەيدى. ءبىز بىرىككەن ۇلتتار ۇيىمى جانە باسقا دا حالىقارالىق قۇرىلىمدار اياسىنداعى ىقپالداستىعىمىزدى كۇشەيتۋگە كەلىستىك. جالپى, بۇگىنگى كەلىسسوزدەر ناتيجەلى ءارى مازمۇندى بولدى دەۋگە تولىق نەگىز بار. ءبىز قازاقستان مەن كەنيا اراسىنداعى بايلانىستى نىعايتۋعا, ءوزارا ءتيىمدى سەرىكتەستىكتى كەڭەيتۋگە جانە ءتۇرلى سالاداعى ناقتى جوبالاردى بىرلەسىپ جۇزەگە اسىرۋعا دايىنبىز. بۇل ەكى ەلدىڭ دە مۇددەسىنە ساي كەلەدى», دەدى مەملەكەت باسشىسى.
كەنيا پرەزيدەنتى مەملەكەت باسشىسىمەن كوپتەگەن سالاداعى ىنتىماقتاستىقتى تەرەڭدەتۋگە باعىتتالعان سىندارلى جانە ناتيجەلى كەلىسسوز جۇرگىزگەنىنە نازار اۋداردى.
ء«بىز ەكىجاقتى قارىم-قاتىناستىڭ قازىرگى جاي-كۇيىن قاراستىرىپ, ساۋدا, ينۆەستيتسيا, يننوۆاتسيا جانە وڭىرلىك ءوزارا ىقپالداستىق باعىتتارىنداعى ناقتى شارالاردى ىسكە اسىرۋ جايىندا ۋاعدالاستىق. كەنيا قازاقستاندى ماڭىزدى ستراتەگيالىق سەرىكتەس جانە ورتالىق ازياعا, تۇتاس ەۋرازيا ايماعىنا نەگىزگى قاقپا سانايدى. ءبىز قازاقستاننىڭ شىعىس جانە ورتالىق افريكا ەلدەرىمەن بايلانىسىنا دانەكەر بولۋعا دايىنبىز. قازاقستان تاراپىنا نايروبي قالاسىندا قۇرلىقتاعى قىزمەتىن ۇيىمداستىرۋدىڭ ستراتەگيالىق بازاسىن جاساقتاۋدى, ال مومباسا جانە لامۋ پورتتارىن وڭىرلىك نارىققا شىعۋ ءۇشىن نەگىزگى لوگيستيكالىق حاب رەتىندە قاراستىرۋدى ۇسىندىق», دەدى ۋيليام رۋتو.
بۇعان دەيىن قازاقستان مەن كەنيا بىرلەسكەن مالىمدەمە قابىلداعانى تۋرالى حابارلاعانبىز.
