فوتو: اشىق دەرەككوز
«مەن تەلەفونمەن-اق سۋرەتكە ءتۇسىرىپ, 10 مينۋتتا ۆينەتكا جاساپ بەرە الامىن. وعان نە ءۇشىن ونداعان مىڭ تەڭگە تولەۋ كەرەك؟», دەدى دەپۋتات.
ا. ايماعامبەتوۆ مەكتەپ بىتىرۋشىلەر مەن اتا-انالاردىڭ 11 جىلدىق وقۋ اياقتالعان سوڭ ەستە قالارلىق ادەمى كەش وتكىزگىسى كەلەتىنىن تۇسىنەتىنىن جەتكىزدى. دەگەنمەن ول وقۋ-اعارتۋ مينيسترلىگى مەن ىشكى ىستەر مينيسترلىگىنىڭ ۇستانىمىن دا ەسكەرۋ قاجەت ەكەنىن اتاپ ءوتتى. ونىڭ ايتۋىنشا, قويىلعان شەكتەۋلەر ەڭ الدىمەن قاۋىپسىزدىك پەن الەۋمەتتىك ادىلدىك ماسەلەسىنە بايلانىستى.
دەپۋتات كەيبىر وتباسىلاردىڭ ءبىتىرۋ كەشىنە 1 ميلليون, 500 مىڭ, ءتىپتى 300 مىڭ تەڭگە كولەمىندە اقشا سۇرالاتىنىنا شاعىمداناتىنىن ايتتى.
سونىمەن قاتار دەپۋتات مەكتەپتەگى رەسمي ءىس-شارالار توقتاتىلمايتىنىن ەرەكشە اتاپ ءوتتى. سوڭعى قوڭىراۋ, سالتاناتتى جيىندار مەن مەكتەپپەن قوشتاسۋ راسىمدەرى ءداستۇرلى تۇردە وتكىزىلە بەرەدى.
«وسى اسەرلى ساتتەردىڭ ەشقايسىسى جويىلمايدى», دەدى ول.
سونىمەن بىرگە دەپۋتات ەرەسەكتەردىڭ باقىلاۋىنسىز كەيبىر تۇلەكتەردىڭ مەيرامحانا مەن كوتتەدجدەردە ءوز بەتىنشە تويلاۋعا بارۋى مۇمكىن ەكەنىن دە جاسىرمادى.
بۇعان دەيىن, تالدىقورعاندا مەكتەپ وقۋشىسى ستۋدەنتتى ءولتىردى دەگەن كۇدىككە ىلىنگەنى تۋرالى حابارلاعانبىز.
