فوتو: اقوردا
«بۇل مەملەكەتتەرىمىزدىڭ اراسىنداعى ىنتىماقتاستىقتى نىعايتۋعا نيەتتى ەكەنىڭىزدى كورسەتەدى. كەنيا – افريكاداعى وتە ماڭىزدى سەرىكتەسىمىز. ءسىزدىڭ ەلىڭىز قۇرلىقتا ساياسي جانە ەكونوميكالىق تۇرعىدان قارقىندى دامىپ كەلەدى. كوپتەگەن باعىتتا ىقپالداستىعىمىزدى كەڭەيتۋدىڭ تىڭ مۇمكىندىكتەرى بار. ءبىز بۇعان قۋانىشتىمىز. ونى تابىستى تۇردە ىلگەرىلەتە الاتىنىمىزعا سەنىمدىمىن. بۇگىن ەكىجاقتى ەكونوميكالىق جانە گۋمانيتارلىق ىنتىماقتاستىق پەرسپەكتيۆاسىن تالقىلايمىز. نايروبي افريكاداعى حالىقارالىق ورتالىق رەتىندە تانىلعانى ءمالىم. وندا بۇۇ جۇيەسىندەگى ۇيىمدار ورنالاسىپ, تۇراقتى جۇمىس ىستەپ كەلەدى. وسىعان بايلانىستى قازاقستان نايروبيدە ەلشىلىك اشۋ تۋرالى شەشىم قابىلداعان بولاتىن», دەدى قازاقستان پرەزيدەنتى.
ۋيليام رۋتو كەنيا قازاقستاندى ساۋدا مەن ينۆەستيتسيانى دامىتۋداعى ماڭىزدى لوگيستيكالىق حاب رەتىندە قاراستىراتىنىن اتاپ ءوتتى.
«قازىردىڭ وزىندە ەلدەرىمىز اراسىنداعى تاۋار اينالىمىندا ءوسىم بايقالادى. ءبىز قازاقستان ارقىلى نەگىزگى اۋىلشارۋاشىلىق ونىمدەرىمىزدى ەۋرازيا نارىعىنا ەكسپورتتاۋعا نيەت تانىتىپ وتىرمىز. ساپار اياسىندا ەلدەرىمىز اراسىنداعى ىنتىماقتاستىقتى تەرەڭدەتۋگە قاجەتتى قۇقىقتىق نەگىز قالاپ, تىڭ مۇمكىندىكتەرگە جول اشاتىن بىرقاتار قۇجاتقا قول قويامىز», دەدى كەنيا پرەزيدەنتى.
ايتا كەتەيىك, تاۋەلسىزدىك سارايىندا كەنيا پرەزيدەنتىن رەسمي قارسى الۋ ءراسىمى ءوتتى.
