فوتو: اشىق دەرەككوز
وقيعا اتىراۋ حالىقارالىق اۋەجايى اۋماعىندا «اتىراۋ – شىمكەنت» رەيسىنە تىركەلۋ كەزىندە بولعان.
كولىكتەگى پوليتسيانىڭ مالىمەتىنشە, تۇركىستان وبلىسىنىڭ 34 جاستاعى تۇرعىنى تەكسەرۋ بارىسىندا اۋەجاي قىزمەتكەرلەرىنە سومكەسىندە تاپانشا بار ەكەنىن ايتقان. وسىدان كەيىن ەر ادام №788 رەيسىنەن شۇعىل تۇردە ءتۇسىرىلىپ, تەكسەرۋدەن وتكىزىلدى.
الايدا اقپارات راستالمادى. سوعان قاراماستان, جولاۋشىعا قاتىستى قر اكىمشىلىك قۇقىق بۇزۋشىلىق تۋرالى كودەكسىنىڭ 434-بابى بويىنشا اكىمشىلىك حاتتاما تولتىرىلدى. ءىس ماتەريالدارى اتىراۋ قالاسىنىڭ مامانداندىرىلعان اكىمشىلىك سوتىنا جولداندى.
كولىكتەگى پوليتسيا دەپارتامەنتى اۋەجايدا قارۋ, جارىلعىش زات نەمەسە باسقا دا قاۋىپتى زاتتاردىڭ بار ەكەنى تۋرالى كەز كەلگەن مالىمدەمە قاۋىپسىزدىككە تونگەن قاتەر رەتىندە باعالاناتىنىن جانە ونىڭ اۋىر سالدارعا اكەلۋى مۇمكىن ەكەنىن ەسكە سالدى.
ايتا كەتەيىك, الماتى قالاسىندا قىلمىستىق ءىس اياسىندا قوعام بەلسەندىسى سانجار بوقاەۆ ۇستالدى. تەرگەۋ ورگاندارى ونى جالعان اقپارات تاراتۋ جانە زاڭسىز ارەكەتتەردى ۇيىمداستىرۋ دەرەگى بويىنشا كۇدىكتى دەپ تانىپ وتىر.
