فوتو: gov.kz
مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس ەلىمىزدە ءتورتىنشى ءىرى مۇناي وڭدەۋ زاۋىتىن سالۋ جوباسىن ىسكە اسىرۋعا دايىندىق باستالدى.
قازىرگى ۋاقىتتا جوبا تاجىريبەلىك ىسكە اسىرۋدىڭ كەزەڭىندە تۇر. جوبا بويىنشا الدىن الا تەحنيكالىق-ەكونوميكالىق نەگىزدەمەنى ازىرلەۋ جۇرگىزىلۋدە. قازاقستاندا بولاشاقتا مۇناي-حيميا كلاستەرىنىڭ ورتالىعىنا اينالۋى مۇمكىن ءىرى مۇناي وڭدەۋ كەشەنىن سالۋعا دايىندىق قىزۋ جۇرگىزىلىپ جاتىر.
ەنەرگەتيكا مينيسترلىگى مۇناي وڭدەۋ جانە مۇناي-حيميا سالاسىنداعى ۋاكىلەتتى مەملەكەتتىك ورگان رەتىندە جوبانى ۆەدومستۆوارالىق دەڭگەيدە ۇيلەستىرۋدى جۇزەگە اسىرادى. جوبانىڭ تاپسىرىس بەرۋشىسى — SK Ondeu («سامۇرىق-قازىنا» قورىنىڭ ەنشىلەس ۇيىمى). التى اي ىشىندە حالىقارالىق ينجينيرينگتىك كوماندا كەشەنگە الدىن الا زەرتتەۋلەر جۇرگىزىپ, ونىڭ قورىتىندىسى بويىنشا ۇكىمەتكە بولاشاق زاۋىتتىڭ تەحنيكالىق جانە ەكونوميكالىق پارامەترلەرى ۇسىنىلادى.
الدىن الا تەن شەڭبەرىندە بىرقاتار نەگىزگى باعىتتار پىسىقتالادى. ءبىرىنشى كەزەكتە شيكىزاتپەن قامتاماسىز ەتۋدىڭ ەڭ ءتيىمدى سحەماسى ايقىندالادى. قاشاعان مەن تەڭىز كەن ورىندارىنىڭ مۇنايىن وڭدەۋ, سونداي-اق قولدانىستاعى قۇبىر ينفراقۇرىلىمى ارقىلى ارالاس شيكىزاتتى پايدالانۋ نۇسقالارى قاراستىرىلادى.
سونىمەن قاتار زاۋىت سالىناتىن ورىندى تاڭداۋ ماسەلەسىنە ەرەكشە نازار اۋدارىلادى. ساراپشىلار كولىك لوگيستيكاسىن, تەمىرجول ينفراقۇرىلىمىنا قولجەتىمدىلىكتى, ءونىم وتكىزۋ نارىقتارىنا جاقىندىعىن, ەكولوگيالىق تالاپتاردى جانە ينجەنەرلىك كوممۋنيكاتسيالاردىڭ بولۋىن باعالايدى.
قر ەنەرگەتيكا ءمينيسترى ەرلان اقكەنجەنوۆ اتاپ وتكەندەي, جاڭا كەشەننىڭ قۇرىلىسى ۇزاق مەرزىمدى ەنەرگەتيكالىق تۇراقتىلىق ءۇشىن پراگماتيكالىق ءارى ستراتەگيالىق تۇرعىدان ماڭىزدى قادام بولىپ سانالادى. ونىڭ ايتۋىنشا, جوبانىڭ ورنالاسۋى مەن كونفيگۋراتسياسىنا قاتىستى بارلىق شەشىمدەر تەك ەكونوميكالىق تيىمدىلىك پەن تەحنيكالىق ەسەپتەۋلەر نەگىزىندە قابىلداناتىن بولادى.
جوباعا عالىمدار قاجەتتىلىگى بويىنشا وتاندىق عىلىمي-زەرتتەۋ ورتالىقتارى مەن بەيىندى جوعارى وقۋ ورىندارىن تارتۋ ارقىلى قامتاماسىز ەتىلەدى. R&D قۇرىلىمدارى وتىن ستاندارتتارىن, تەحنولوگيالاردى جانە كاتاليزاتورلاردى جەتىلدىرۋمەن اينالىسادى. ال ۋنيۆەرسيتەتتەر بولاشاق ءوندىرىس ءۇشىن كادرلار دايارلايدى.
الدىن الا قۇجاتتاما نەگىزىندە ۇكىمەت جوبانى جوبالىق-سمەتالىق قۇجاتتاما ازىرلەۋ ساتىسىنا كوشىرۋ, حالىقارالىق ينۆەستورلاردى تارتۋ جانە زاۋىت قۇرىلىسىن باستاۋ تۋرالى شەشىم قابىلدايدى.
جۇرگىزىلىپ جاتقان جۇمىستار مۇناي وڭدەۋ سالاسىن 2025–2040 جىلدارعا دامىتۋ تۇجىرىمداماسىنا سايكەس جۇزەگە اسىرىلۋدا جانە ەكونوميكانى شيكىزاتتىق مودەلدەن تەرەڭ وڭدەۋگە كەزەڭ-كەزەڭىمەن كوشىرۋگە باعىتتالعان.
