سۋرەت: aikyn.kz
ءماجىلىس دەپۋتاتى, جۇمىس توبىنىڭ جەتەكشىسى نۇرجان اشىمبەتوۆ تۇزەتۋلەر ۇكىمەت تاراپىنان مەملەكەت باسشىسىنىڭ 2025 جىلعى 8 قىركۇيەكتەگى قازاقستان حالقىنا جولداۋىندا ايتىلعان تاپسىرمانى ورىنداۋ اياسىندا ازىرلەنگەنىن ەسكە سالدى.
وتىرىس كەزىندە ۇكىمەتتىك تۇزەتۋلەردى اۋىل شارۋاشىلىعى ۆيتسە-ءمينيسترى ازات سۇلتانوۆ تانىستىردى. ونىڭ ايتۋىنشا, ۇسىنىلىپ وتىرعان وزگەرىستەر اۋىل شارۋاشىلىعى جەرلەرىن بەرۋ تەتىگىن تسيفرلىق فورماتقا كوشىرۋدى كوزدەيدى جانە راسىمدەردىڭ اشىقتىعىن ارتتىرۋعا باعىتتالعان. اتاپ ايتقاندا, جەر كودەكسىنىڭ بىرقاتار نورمالارى جاڭا رەداكتسيادا ۇسىنىلادى.
«تۇزەتۋلەردىڭ نەگىزگى ماقساتى – جەر كوميسسيالارىنىڭ فۋنكتسيالارىن جويۋ جانە تولىقتاي ەلەكتروندىق فورماتقا كوشۋ ارقىلى اۋىل شارۋاشىلىعى جەرلەرىن ءبولۋدىڭ اشىقتىعىن قامتاماسىز ەتۋ. بۇل رەتتە كودەكستىڭ نەگىزگى نورمالارى ساقتالادى. كودەكستە بۇرىنعىسىنشا جەر پايدالانۋشىلاردىڭ بازالىق مىندەتتەرى قاراستىرىلادى, ول سونداي-اق بالل تۇرىندەگى قوسىمشا ارتىقشىلىقتاردىڭ بەرىلۋىنە كەپىل بولادى», دەدى ۆيتسە-مينيستر.
كونكۋرستاردى مەملەكەتتىك م ۇلىك ءتىزىلىمىنىڭ ۆەب-پورتالىندا وتكىزۋ جوسپارلانىپ وتىر. بارلىق ءراسىم ءوتىنىم بەرۋدەن باستاپ, جەڭىمپازدى ايقىنداۋعا دەيىن تولىق اۆتوماتتاندىرىلادى.
جاڭا تەتىك كونكۋرستاردى وتكىزۋ مەرزىمىن 90 كۇننەن 45 كۇنتىزبەلىك كۇنگە دەيىن قىسقارتۋدى, كونكۋرسقا بيزنەس-جوسپار مەن ۇسىنىس ازىرلەمەي-اق پرواكتيۆتى فورماتتا قاتىسۋدى, سونداي-اق جەڭىمپازدى اۆتوماتتاندىرىلعان جۇيە ارقىلى ايقىنداۋدى كوزدەيدى. بۇدان بولەك, «قوسىمشا جەڭىمپاز» تەتىگى ەنگىزىلىپ, جالعا الۋ شارتىن جاساسۋدان جالتارعان تۇلعالارعا شەكتەۋلەر بەلگىلەنەدى.
تالقىلاۋ بارىسىندا دەپۋتاتتار ۇسىنىلىپ وتىرعان نورمالاردى ىسكە اسىرۋعا قاتىستى بىرقاتار تاجىريبەلىك ماسەلەنى كوتەردى. اتاپ ايتقاندا, زاڭ جوباسىنداعى تەرمينولوگيانى ناقتىلاۋ, جەر ساناتتارىن باعالاۋ, ۋچاسكەلەردىڭ كاداسترلىق قۇنىن وزگەرتۋ ماسەلەلەرى قارالدى. سونداي-اق جەرگىلىكتى اتقارۋشى ورگانداردىڭ كونكۋرستار وتكىزۋگە دايىندىعى, ونىڭ ىشىندە ينفراقۇرىلىمنىڭ, كادرلىق الەۋەتتىڭ جانە تسيفرلىق پلاتفورمانىڭ ازىرلىك دەڭگەيى, سونداي-اق جاڭا تەتىكتى ەنگىزۋ كەزىندەگى ىقتيمال سىن-قاتەرلەر مەن شەكتەۋلەر تالقىلاندى. بۇدان بولەك, اۋىل شارۋاشىلىعىنىڭ ماۋسىمدىق جۇمىسى ەسكەرىلە وتىرىپ, كونكۋرس مەرزىمىن قىسقارتۋ, بالل بەرۋ ءتارتىبى جانە «باستاۋشى كاسىپكەر» ۇعىمىن ايقىنداۋ ماسەلەلەرىنە ەرەكشە نازار اۋدارىلدى.
وتىرىسقا ءماجىلىس دەپۋتاتتارى, ورتالىق مەملەكەتتىك ورگاندار, «اتامەكەن» ۇلتتىق كاسىپكەرلەر پالاتاسى, سالالىق ۇيىمدارى جانە جەرگىلىكتى اتقارۋشى ورگانداردىڭ وكىلدەرى قاتىستى.
