«Ranking.kz» جازۋىنشا, بۇل ماسەلە ەل ازاماتتارىنىڭ قاۋىپسىزدىگىنە بايلانىستى بولعاندىقتان, بۇگىندە وتە وزەكتى. بىلتىر اپاتتى ۇيلەر سانى جونىنەن اتىراۋ وبلىسى كوش باسىندا بولعان. وندا 705 اپاتتى ءۇي ەسەپتە تۇر. ال اقمولا وبلىسىندا توزىعى جەتكەن 270 ءۇي, باتىس قازاقستاندا 262 ءۇي بار. ەسكەرە كەتەتىن ءبىر جايت, تۇرعىن ءۇي قورىنىڭ شىنايى جاعدايى ستاتيستيكالىق دەرەكتەردەن الشاقتاۋ بولۋى مۇمكىن. ياعني بۇل تۇجىرىم ناقتى رەسمي دەرەكتەرگە قاراي جاسالىپ وتىر. وڭ ناتيجە دە جوق ەمەس. بىلتىر الماتى وبلىسىندا اپاتتى ءۇي سانى 30-عا, قاراعاندى وبلىسىندا 12-گە, استانا قالاسىندا 10-عا, سولتۇستىك قازاقستاندا 7-گە ازايعان.
«Ranking.kz» ساراپشىلارى بۇل ۇردىستەن ەكى ءتۇرلى جاعدايدى اڭعارعانىن ايتادى.
«مۇنداي نىسانداردىڭ ارتۋى تۇرعىن ءۇي قورىنىڭ جاعدايى ناشارلاعانىن كورسەتەدى. ەكىنشى جاعىنان, ۋاكىلەتتى ورگانداردىڭ تەكسەرىستى كۇشەيتۋىنە دە بايلانىستى. ءىس جۇزىندە قاۋىپتى, بىراق رەسمي مارتەبەسى جوق ۇيلەر كوپ. رەسمي اپاتتى مارتەبەنى الۋ ماسەلەنىڭ شەشۋ مۇمكىندىگىن ارتتىرادى», دەيدى ساراپشىلار.
