«يمپورتتى الماستىرۋ باعدارلاماسى بەكىتىلگەننەن كەيىن يمپورتتى الماستىرۋدىڭ وڭىرلىك باعدارلامالارى قابىلدانادى. باعدارلامالار يمپورت كولەمىن ازايتۋ جونىندەگى جوبالاردى مونيتورينگىلەپ, ولاردى ىسكە اسىرۋعا باعىتتالادى. باعدارلامانى ءتيىمدى ىسكە اسىرۋ ءۇشىن ءبىز بيزنەستى قولداۋدىڭ جۇيەلى شارالارىن قاتار جۇزەگە اسىرۋدى ۇسىنامىز», دەدى مينيستر.
وسى رەتتە قايىربەك وسكەنباەۆ نەگىزگى شارالارعا توقتالدى.
ء«بىرىنشى, جوبالاردى قولداۋ ءۇشىن ونەركاسىپتى دامىتۋ قورى مەن قازاقستاننىڭ دامۋ بانكىنىڭ قارجىلاندىرۋ تەتىكتەرىن پايدالانامىز. ەكىنشى دەڭگەيلى بانكتەر مەن جەرگىلىكتى اتقارۋشى ورگانداردىڭ قاراجاتىن تارتۋ مۇمكىندىكتەرىن قوسىمشا پىسىقتايمىز. ەكىنشى, بيزنەستىڭ جول كارتاسى باعدارلاماسىنداعى تەتىكتەر قايتا قارالادى. بۇل ونەركاسىپتىك كاسىپورىنداردىڭ ەنەرگيا رەسۋرستارى مەن ينجەنەرلىك-كوممۋنيكاتسيالىق ينفراقۇرىلىمعا تەڭ قول جەتكىزۋىن قامتاماسىز ەتۋ ءۇشىن جاسالادى. يمپورتتى الماستىراتىن جوبالار ءۇشىن اكىمدىكتەردىڭ قاجەتتى ينفراقۇرىلىممەن قامتاماسىز ەتۋلەرىن ۇسىنامىز», دەدى قايىربەك وسكەنباەۆ.
ونىڭ ايتۋىنشا, ۇشىنشىدەن, جوبالاردى ناتيجەلى ىسكە اسىرۋ ءۇشىن ءبىلىم جانە عىلىم مينيسترلىگىمەن بىرلەسىپ, مەملەكەتتىك ءبىلىم بەرۋ تاپسىرىسى اياسىندا ءوزىمىزدىڭ كادرلىق بازامىز قالىپتاستىرىلادى. سونىمەن قاتار كاسىپورىنداردىڭ ينجەنەرلىك-تەحنيكالىق ماماندارىن الدىڭعى قاتارلى شەتەلدىك كاسىپورىندار مەن ۇيىمدارعا تاعىلىمداماعا جىبەرۋ جوسپارلانىپ وتىر.
ء«تورتىنشى, وندىرىستىك كاسىپورىنداردى شيكىزاتپەن قامتاماسىز ەتۋ بويىنشا جەر قويناۋىن پايدالانۋشىلارعا مىندەتتەمەلەر بەكىتۋ. بۇگىنگى تاڭدا اليۋميني وندىرۋشىلەرىمەن قايتا وڭدەۋمەن اينالىساتىن 7 كاسىپورىنمەن كەلىسىمگە قول قويدى. مىس پەن قورعاسىن بويىنشا دا وسى باعىتتا جۇمىستار جۇرگىزىلىپ جاتىر», دەدى ول.
