بالالار ينتەرنەت-ماركەتينگ, ويىن ديزاينى, python ازىرلەۋ, ۆەب-ديزاين, ۆەب-ازىرلەۋ, ءموبيلدى ازىرلەۋ, دىبىستىق ديزاين, الەۋمەتتىك مەديانى باسقارۋ, تسيفرلى كوممۋنيكاتسيا جانە بەينە جاساۋ سياقتى سالالار بويىنشا 10 ونلاين كۋرسقا قول جەتكىزدى. ارنايى ازىرلەنگەن ينتەراكتيۆتى پلاتفورمادا كاسىپتىك باعدار بەرۋ تەستىلەرى, بەينە ساباقتارى بار بلوكتار, ترەنينگتەر جانە پراكتيكالىق تاپسىرمالار ورنالاستىرىلعان.
«بۇل جوباعا مەكتەبىمىزدەن 20 وقۋشى قاتىسىپ جاتىر. Digital Maman بولاشاقتىڭ ماماندىقتارىن ۇيرەتەتىندىكتەن, بالالار قىزىعۋشىلىق تانىتىپ, بەلسەندى قاتىسىپ ءجۇر. بۇل باعدارلامادان ۇلكەن ءۇمىت كۇتىلۋدە, بولاشاق ستۋدەنتتەرگە ماماندىق تاڭداۋدا كومەكتەسەدى دەپ ويلايمىن. ارينە, بالالار ءۇشىن ءبارى جاڭالىق, ولار مۇنداي ماماندىقتار تۋرالى ەستىپ قانا قويعان, ەندى تەرەڭىرەك ءۇڭىلىپ وقىپ, ءىس جۇزىندە جوبالار جاساي باستادى», دەيدى №78 مەكتەپ-گيمنازياسىنىڭ ديرەكتورى راۋشان قوجامبەتوۆا.
جوبانى ۇيىمداستىرۋشىلاردىڭ ايتۋىنشا, دۇنيە جۇزىندە تسيفرلى ماماندىقتاردى مەڭگەرۋگە دايىن ستۋدەنتتەر سانى جىل سايىن ارتىپ كەلەدى. قازاقستاندا تسيفرلى مادەنيەتتىڭ دامۋى, تسيفرلى قۇزىرەتتەرىن دامىتاتىن جانە جاڭا ستارتاپتار مەن جوبالاردى قۇرۋعا قۇشتار, جاس جىگىتتەر مەن قىزداردى بىرىكتىرەتىن قاۋىمداستىقتار قۇرۋ قاجەت.
«Digital Maman – جوعارى سىنىپ وقۋشىلارىنا 21 عاسىرعا ساي داعدىلاردى ۇيرەتۋگە باعىتتالعان قازاقستانداعى العاشقى باعدارلاما. ۆەب-ازىرلەۋدى ۇيرەتە وتىرىپ, باعدارلامالاۋدى مەكتەپتە مەڭگەرگەن وقۋشىلار باسەكەگە قابىلەتتى بولىپ, ۋنيۆەرسيتەت باعدارلاماسىنا دايىن بولادى دەپ ويلايمىن», دەپ ءبولىستى فرونتەند ازىرلەۋشىسى جانە Element باعدارلامالاۋ مەكتەبىنىڭ مۇعالىمى ايانبەك شىنار.
«2021 جىلدىڭ قاراشاسىندا Digital Maman باعدارلاماسى بويىنشا, الماتىداعى 50 مەكتەپتە وقۋدى باستاعان 1 مىڭ وقۋشى جەتەكشى ساراپشىلاردان تسيفرلى ءبىلىم مەن داعدىلار الدى. 6 مىڭ وقۋشىنىڭ ءوز بەتىمەن ءبىلىم الۋىنا مۇمكىندىك بەرىلدى. دەمو كۇنى مەكتەپ وقۋشىلارىنىڭ ناتيجەلەرىمەن كورنەكى تۇردە تانىسۋعا مۇمكىندىك بەرەدى جانە وقۋشىلارعا تسيفرلى قۇزىرەتتىلىكتەردى ۇيرەتۋدەن باسقا, ءوز جوبالارىن ۇلكەن اۋديتورياعا ۇسىنۋ ارقىلى soft skills دامىتۋعا, تسيفرلى تەحنولوگيالارعا قۇمار ادامداردى, جاڭا دوستار تابۋعا كومەكتەسەدى», دەيدى جوبانى ۇيىمداستىرۋشىلار.
