وتىرىسقا قر پرەزيدەنتى اكىمشىلىگىنىڭ وكىلدەرى, قر پارلامەنتى ءماجىلىسىنىڭ دەپۋتاتتارى, ۇكىمەتتىك ەمەس جانە ءدىني ۇيىمداردىڭ, ەتنومادەني بىرلەستىكتەر مەن باق وكىلدەرى قاتىستى. مينيستر اسقار ۋماروۆ 2021 جىلدىڭ نەگىزگى قورىتىندىلارى مەن ۆەدومستۆونىڭ 2022 جىلعا مىندەتتەرى تۋرالى ايتىپ بەردى.
«اقپارات جانە قوعامدىق دامۋ مينيسترلىگى 2021 جىلى اۋقىمدى جۇمىس اتقاردى. سونىمەن بىرگە, زامان وزگەرىسىنە ساي مەملەكەت باسشىسى مەن ۇكىمەت مينيسترلىكتىڭ باسىم باعىتتارىن جاڭا فورماتتا ىسكە اسىرۋدى تاپسىردى», دەپ اتاپ ءوتتى اسقار ۋماروۆ.
مينيستر ءوز بايانداماسىندا 2022 جىلى مينيسترلىكتىڭ بارلىق باعىتتارى بويىنشا جۇمىس اقپارات سالاسىن دامىتۋ جانە ازاماتتىق قوعاممەن ءوزارا ءىس-قيمىل تەتىكتەرىن جەتىلدىرۋگە باعىتتالاتىنىن اتاپ ءوتتى. وسىلايشا ول 2021 جىلى وتكەن قازاقستاننىڭ X ازاماتتىق فورۋمىنىڭ قورىتىندىسى بويىنشا ۇەۇ, باق, بيزنەس جانە جالپى ازاماتتىق سەكتور وكىلدەرىنەن 1000-نان استام ۇسىنىستار مەن ۇسىنىمدار كەلىپ تۇسكەنىن اتاپ ءوتتى. ءمينيستردىڭ ايتۋىنشا, قوعامنان كەلىپ تۇسەتىن بارلىق سىندارلى ۇسىنىستار نازاردان تىس قالمايدى جانە مينيسترلىك پەن باسقا دا مۇددەلى مەملەكەتتىك ورگاندار تاراپىنان ەگجەي-تەگجەيلى زەردەلەنەدى.
ۆيتسە-مينيستر الەكساندر دانيلوۆ مەملەكەتتىك جاستار ساياساتىن ىسكە اسىرۋدىڭ جاڭا تاسىلدەرى تۋرالى ايتىپ بەردى. ول اۋىل جاستارىن جانە الەۋمەتتىك وسال جاستاردى الەۋمەتتەندىرۋ, كاسىبي باعدارلاۋ, جۇمىسقا ورنالاستىرۋ بويىنشا ۇسىنىلعان شارالار تۋرالى مالىمدەدى. سونىمەن قاتار, «قوعامدىق كەلىسىم» رمم قىزمەتى تۋرالى عالىمجان قۇسمانعاليدىڭ بايانداماسىمەن ەتنوسارالىق قاتىناستاردى دامىتۋ سالاسىندا اتقارىلىپ جاتقان جۇمىستار تۋرالى باياندالدى.
سونداي-اق, نەگىزگى سپيكەرلەر اراسىندا ازاماتتىق قوعام وكىلدەرى: قازاقستان ازاماتتىق اليانسىنىڭ پرەزيدەنتى بانۋ نۇرعازيەۆا, قازاقستان ينتەرنەت اسسوتسياتسياسىنىڭ پرەزيدەنتى شاۆكات سابيروۆ ءسوز سويلەدى. ولار اقپارات جانە قوعامدىق دامۋ سالاسىنداعى وزەكتى ماسەلەلەرگە توقتالىپ, وزدەرىنىڭ ناقتى ۇسىنىستارىن ايتتى.
