«تاۋەلسىزدىك تاريحىندا ءبىز العاش رەت اسا كۇردەلى جانە قاتەرلى كەزەڭگە تاپ بولدىق. ەل باسىنا تۇسكەن وسىنداي سىناقتى قايىسپاي ءبىرتۇتاس ەل بولىپ ەڭسەرە بىلدىك. ەندى ءبىز مۇنداي جاعدايعا ەشقاشان جول بەرمەۋىمىز قاجەت. سوندىقتان ەلىمىز دۋشار بولعان اۋىر قاسىرەتتىڭ سەبەپتەرىن سارالاپ, ونىڭ سالدارىنا ناقتى باعا بەرۋ – الدىمىزدا تۇرعان وتە ماڭىزدى مىندەت», دەپ اتاپ ءوتتى پرەزيدەنت ءماجىلىس وتىرىسىندا.
پرەزيدەنت بۇگىندە حالىق اراسىندا وسى وقيعاعا بايلانىستى ءتۇرلى قاراما-قايشى, شىندىققا جاناسپايتىن جالعان اقپاراتتار تاراپ كەتكەنىن ايتتى.
«مۇنىڭ, ارينە, بىرنەشە سەبەبى بار. كەي ازاماتتارىمىز احۋالدى ەگجەي-تەگجەيلى بىلمەي تۇرىپ قاتە پىكىردە بولسا, كەيبىرى ادەيى اقپاراتتى بۇرمالاپ, جاعدايدى ودان بەتەر ۋشىقتىرادى. بىراق, بىزگە كەرەگى تەك اقيقات قانا. سول سەبەپتى, وقيعالاردى مۇقيات زەرتتەي وتىرىپ ايتارىم – جىل باسىنان بەرى بولعان بارلىق جاعدايلار ءبىر تىزبەكتىڭ تارماقتارى دەۋگە تولىق نەگىز بار. اشىعىن ايتساق, بۇل بىرنەشە جىل بويى الدىن الا ويلاستىرىلعان ز ۇلىمدىقتىڭ كورىنىسى. ولاردىڭ كوزدەگەنى – وزدەرىنىڭ قاتىگەز پيعىلدارىن ىسكە اسىرۋ بولعانى ايدان انىق», دەدى ق. توقاەۆ.
