شقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە, كەشە ريددەر ورمان شارۋاشىلىعىندا شىققان ءتىلسىز جاۋمەن كۇرەسۋگە 300-دەن استام پوليتسەي جۇمىلدىرىلعان.
«قر ىشكى ىستەر ءمينيسترى ەرلان تۇرعىمباەۆتىڭ بۇيرىعى بويىنشا ءوڭىردىڭ ءتارتىپ ساقشىلارى وقيعا ورنىندا تاۋلىك بويى كەزەكشىلىك ۇيىمداستىرىپ, حالىققا كومەك كورسەتتى. قۇتقارۋشىلارمەن بىرگە قىزىل جالىندى اۋىزدىقتاۋعا كىرىسىپ, لەسحوز كەنتىنىڭ تۇرعىندارىن ەۆاكۋاتسيالادا», دەلىنگەن حابارلامادا.
ريددەر قالالىق پوليتسيا ءبولىمىنىڭ جەكە قۇرامى تۇگەلدەي كۇشەيتىلگەن جۇمىس رەجيمىنە كوشكەن. سونداي-اق ءورت وشاقتارىندا 40-قا جۋىق ارنايى تەحنيكا جۇمىس ىستەۋدە.
«قازىرگى ۋاقىتتا اتالعان ءورت فاكتىسى بويىنشا كۇدىكتى ۇستالدى. قازاقستان رەسپۋبليكاسى قىلمىستىق كودەكسىنىڭ 204-بابى 2-بولىگىنە سايكەس تەرگەۋ امالدارى جۇرگىزىلۋدە», دەلىنگەن اقپاراتتا.
ەستەرىڭىزگە سالا كەتسەك, 10 مامىر كۇنى شقو-داعى ريددەر ورمان شارۋاشىلىعىندا ءورت شىقتى. دالا ءورتى 310 گەكتار اۋماقتى شارپىپ, 1 ادام قازا تاپتى. ورتكە بايلانىستى شۇعىل جەلى ىسكە قوسىلدى.
مەملەكەت باسشىسى ۇكىمەت پەن شىعىس قازاقستان وبلىسىنىڭ اكىمدىگىنە ورتتەن زارداپ شەككەن لەسحوز كەنتىنىڭ تۇرعىندارىنا كومەك كورسەتىپ, باسپانامەن قامتاماسىز ەتۋدى تاپسىردى.
