جارناما تاقتايى
جۇمىسىنان شارشاپ شىققان كەستەڭ جىگىت ايالداماعا كەپ توقتادى. ءدال سول جەردەگى ءبىر جاڭا ىلىنگەن قاعازعا كوزى ءتۇستى. تۇك جىرتىلماعان, جاڭا. تالعامى جوعارى كەستەڭ بۇل جارناماعا كوز جۇگىرتىپ, وقىماق بولىپ كوزىندەگى كوزىلدىرىگىن تومەندەۋ ءتۇسىردى. كەستەڭدى جوعارىداعى ۇلكەن شريفتتەگى ءسوز تاڭ قالدىردى. ءتىپتى شوشىتتى. «ميىمدى ساتامىن». كەستەڭدى بۇل ۇلكەن جازۋلار سوڭىنا دەيىن وقۋعا قىزىقتىردى.
«قوقىس ىسپەتتەس. ىشىندە كەرەك ەمەس ەستەلىكتەر كوپ, بىراق ولاردى لاقتىرۋدى قيانات دەپ ەسەپتەيدى.
كۇناھار. دەنەگە جامان ويدى جىبەرىپ, «ناپسىدەن عوي» دەپ ءوزىن كوپ جۇباتادى. جاماندىقتى دا اياماي جاساۋعا يتەرمەلەيدى.
قيالي. كوپ ويلانىپ كوپ ساۋالعا جاۋاپ تاپقان ءتالپىش مي دەپ ويلاماڭىز. كوپ ويلانعاننان, «قۇداي الەمدى جاراتتى, ال قۇدايدى كىم جاراتتى؟» دەگەن پاتۋاسىز سۇراقتى ويلاپ تاپتى.
جۇيەسىز. ءوزى ءبىرتۇرلى جۇيەمەن جۇمىس جاسايتىندىقتان, ومىرلىك پرينتسيپتەرى دە ءبىرتۇرلى. سول ءۇشىن ونىمەن جۇمىس جاساۋ اۋىر بولادى.
ەڭ باستىسى! «جۇرەككە باعىنۋ» دەگەن ۆيرۋس كىرگەندىكتەن, انتيۆيرۋس تابۋ قيىن بوپ تۇر. ەگەر سەزىمدى اقىلعا باعىندىرا الامىن دەگەن جان بولساڭىز, ساتىپ الۋىڭىزعا تۇك قارسى ەمەسپىن».
حابارلاندىرۋدىڭ باستى ءماتىنى اياقتالعان, ال تومەندە جارناما بەرۋشىنىڭ اتى-ءجونى مەن مەكەن-جايى جازىلعان:
«جەرمەن جەكسەن. №2 قالالىق جىندىحانا».
دانا اسىلبەكوۆا
