قاسىم-جومارت توقاەۆ جاڭا سپورت كەشەنىنىڭ جاتتىعۋ زالدارى مەن ينفراقۇرىلىمىن ارالاپ كوردى. ەلوردانىڭ وزگە عيماراتتارى سەكىلدى بۇل نىسان دا ەرەكشە. «Jekpe-Jek» سارايىندا بالالارمەن قاتار, ەرەسەكتەر دە جاتتىعا الادى. بۇعان قوسا «Jekpe-Jek» سارايى سپورتشىلاردى دايىنداۋعا بوكس, كۇرەس, دزيۋدو, اۋىر اتلەتيكا جانە سپورتتىڭ باسقا دا تۇرلەرىنەن سايىستار وتكىزۋگە ارنالعان. ال سپورت زالىنا 5 مىڭ كورەرمەن سىيادى. سپورت كەشەنىندە 25 مەترلىك باسسەين, فيتنەس-ورتالىعى, قوناقۇي مەن ميني-فۋتبول الاڭى دا بار.
سونداي-اق قازاقستان پرەزيدەنتى جاستار جىلىن اتاپ ءوتۋ اياسىندا «Jekpe-Jek» سارايىندا ەلوردا كۇنىنە ارنالعان جەكپە-جەك ونەرىنىڭ گالا-فەستيۆالىنە قاتىستى. قازاقستاننىڭ جەكپە-جەك ونەرى قاۋىمداستىعىنىڭ ۇيىمداستىرۋىمەن وتكەن فەستيۆال بارىسىندا جاس سپورتشىلار كاسىبي جەكپە-جەك ونەرىنەن قويىلىمدار كورسەتتى.
جارىستىڭ اشىلۋ سالتاناتىندا مادەنيەت جانە سپورت ءمينيسترى اقتوتى رايىمقۇلوۆا جاڭا نىساننىڭ ەل سپورتىن دامىتۋداعى ماڭىزىنا توقتالدى. «Jekpe-Jek» سارايى مەملەكەتىمىزدىڭ تىكەلەي قولداۋىمەن قامقورلىعىنىڭ ارقاسىندا اشىلدى. ەلىمىزدە دەنەشىنىقتىرۋ جانە سپورتتىڭ دامۋىنا بارلىق جاعداي جاسالعانىن ايتتى. «بۇل سالا بۇگىنگى تاڭدا ماڭىزدى الەۋمەتتىك-ەكونوميكالىق سالا رەتىندە اياعىنان نىق تۇردى دەپ ايتۋعا بولادى. وسى ءسوزىمنىڭ ايقىن دالەلى – ەلباسى نۇرسۇلتان نازارباەۆتىڭ باستاماسىمەن سالىنعان بۇگىندە ەسىگىن ءبىرىنشى رەت ايقارا اشىپ وتىرعان «Jekpe-Jek» سارايى قۇتتى بولسىن!», دەدى مينيستر.
«Jekpe-Jek» سپورت كەشەنى حالىقارالىق سپورت فەدەراتسيالارىنىڭ تالاپتارىنا ساي سالىنىپ, قۇرىلىس كەزىندە قۋات ۇنەمدەۋ جۇيەسى, جەلدەتۋ مەن جارىق ءتۇسىرۋ ماسەلەلەرى ەسكەرىلىپ, تىڭ يننوۆاتسيالىق ينجەنەرلىك شەشىمدەر قابىلدانعان. عيماراتتىڭ ءۇشبۇرىشتى ءپىشىمى قازاقستاننىڭ ەركىندىگى مەن قۋاتىنىڭ سيمۆولىنا اينالعان بۇركىتتىڭ كوككە قانات قاققان ءساتىن بەينەلەيدى.
