ەگىن جيناۋدا «John Deere» كومباينىنا تەڭ كەلەر تەحنيكا از. بىلتىردىڭ وزىندە قوستانايداعى لوكاليزاتسيا زاۋىتىندا 300-دەن استام «John Deere» قۇراستىرىلدى. كۇزگى ناۋقانعا تاپتىرمايتىن قۋاتتى تەحنيكانىڭ قوستانايدا شىعا باستاعانى شارۋالاردى دا قۋانتىپ وتىر.
اتالعان كەلىسىمشارت اياسىندا «اگروماشحولدينگ KZ» كومپانياسىنىڭ ينجەنەرلەرى مەن جاس ماماندارى اقش-قا بارىپ, وندىرىستىك تاعىلىمدامادان ءوتىپ كەلدى. ساپار بارىسىندا ماماندار «John Deere» كومپانياسىنا قاراستى بىرنەشە زاۋىتتا بولىپ, حيميالىق ءدارى شاشاتىن تەحنيكا, تراكتور, كومباين جاساۋ وندىرىسىمەن تانىسقان.
«وتىز جىلعا جۋىق ءوندىرىس سالاسىندا ەڭبەك ەتەمىن. شەتەلگە ءبىرىنشى رەت شىعىپ تۇرمىن. ول جاقتاعى ءوندىرىس ورىندارىن ارالاپ, شيرەك عاسىردان كەيىن ءوزىمدى قايتادان ستۋدەنت رەتىندە سەزىندىم. بويىمدا جۇمىسىما دەگەن جاڭاشا قۇلشىنىس پايدا بولدى. امەريكا قاتتى تاڭعالدىردى. اسىرەسە اۋىل شارۋاشىلىعى سالاسى ەرەكشە دامىعان. وڭدەلمەگەن بىردە-ءبىر جەر جوق, بارلىق جەردە ءتارتىپ بار. ال زاۋىتتار تولىق تسيفرلاندىرىلعان, اۆتوماتتاندىرىلعان جۇيەدە جۇمىس ىستەپ تۇر», دەيدى ينجەنەر قايرات كارىباەۆ.
«Agromash» زاۋىتىنىڭ وندىرىستىك ديرەكتورى باحتيار بالعوجين «John Deere» كاسىپورىندارىنداعى تەحنولوگيا قۋاتى مەن ينجەنەرلىك مادەنيەت جونىندە ايتىپ بەردى.
«زاۋىت جۇمىسشىلارى ءوز ەلى مەن جۇمىسى تۋرالى ماقتانىشپەن ايتادى ەكەن. ول جاقتا وندىرىستە اعا بۋىن ماماندارى كوپ, ال جاستار جاعى ازداۋ. اسىرەسە دايىنداۋ ۋچاسكەلەرى عاجاپ, بارلىق ۇدەرىس تولىق اۆتوماتتاندىرىلعان. ايگىلى كومپانياعا قاراستى كاسىپورىندارمەن جان-جاقتى تانىسىپ, ءوندىرىس بارىسىن مەڭگەرىپ قايتتىق. مۇنداي تاجىريبەنى قۇجاتتان نەمەسە بەينەجازبادان الۋ مۇمكىن ەمەس. ەندى ءوزىمىز كورىپ-ءبىلىپ, ۇيرەنىپ كەلگەن جاڭا تاسىلدەردى وندىرىسكە ەنگىزۋدى كوزدەپ وتىرمىز», دەدى ب.بالعوجين.
كومپانيا باسشىسىنىڭ ايتۋىنشا, زاماناۋي ءوندىرىستىڭ نەگىزگى قوزعاۋشى كۇشى – ينجەنەر ماماندار. سوندىقتان تاعىلىمداما اياسىندا الىنعان ءبىلىم مەن تاجىريبە ءوندىرىس ۇدەرىسىنىڭ مازمۇنىن جاڭارتادى, ال جەكە مامانداردىڭ بەلسەندىلىگى جالپى ءوندىرىس جۇيەسىنىڭ دامۋىنا ىقپال ەتەدى.
ء«بىز ونەركاسىپتى سوزبەن ەمەس, ناقتى قۇزىرەتتەر ارقىلى دامىتامىز. بۇگىنگە دەيىن 530-دان استام تەحنيكا شىعاردىق. «John Deere» زاۋىتتارىنداعى وقۋ-تاجىريبە بىزگە اسا ماڭىزدى. ول جاقتا وقىپ كەلگەن ماماندار ءوز تاجىريبەسىن ءبولىسىپ جاتىر. زاۋىتتا كەلەشەگىنەن زور ءۇمىت كۇتتىرەتىن جاس ينجەنەرلەر كوپ. تاريحتى جاستار جاسايدى. سوندىقتان الەم ءبىزدىڭ ينجەنەرلەردى تانىسىن, ال ءبىز الەمدى تانيىق دەگەن قاعيدانى ۇستانىپ كەلەمىز», دەيدى «Agromash» زاۋىتىنىڭ پرەزيدەنتى دينارا شۇكىجانوۆا.
«Agromash» ۇجىمىمەن بىرگە تاعىلىمدامادان ءوتىپ كەلگەن «Eurasia Group AG» كومپانياسىنىڭ باس وپەراتسيالىق ديرەكتورى سەرگەي گلوك قوستاناي ينجەنەرلەرىنىڭ اقش-قا ساپارىن وتاندىق ماشينا جاساۋ سالاسىنا سالىنعان ستراتەگيالىق ينۆەستيتسيا رەتىندە باعالادى.
«ماشينا جاساۋ سالاسى تاجىريبە جيناقتاۋ ارقىلى عانا دامىمايدى. سالانىڭ جەتكىلىكتى تۇردە دامۋىنا تسيفرلىق تەحنولوگيالار, جۇيەلى ءبىلىم ترانسفەرى, جاساندى ينتەللەكت نەگىزىندە قابىلداناتىن ءتيىمدى شەشىمدەر قاجەت. الداعى ۋاقىتتا تەحنيكا, اقپارات جانە اگرونوميا دەپ اتالاتىن ماڭىزدى ءۇش سالانىڭ سينەرگياسى وتاندىق اگروبيزنەستى ىلگەرى دامىتاتىن نەگىزگى فاكتورعا اينالادى. يكەمدى, ءدال ءارى ءتيىمدى بۇل ءۇش قۇرال ماشينا جاساۋدىڭ جاڭا مودەلىن قالىپتاستىرادى. بىزگە تەحنولوگيالاردى ەنگىزۋ ەمەس, ولاردى جەرگىلىكتى جاعدايعا بەيىمدەي وتىرىپ دامىتۋ ماڭىزدى. ساپار بارىسىندا ءبىزدىڭ ينجەنەرلەر «John Deere» وندىرىسىنە تەرەڭىرەك بويلاپ, سول جاقتاعى ماماندارمەن ەلىمىزدىڭ تابيعي-كليماتتىق جاعدايىنا بارىنشا سايكەس كەلەتىن تەحنيكا جاساپ شىعارۋ جونىندە كەڭەستى», دەدى ول.
بۇگىندە قوس تاراپ قوستانايداعى ءوندىرىس كولەمىن 3000 تەحنيكاعا دەيىن ۇلعايتۋ, قوسالقى بولشەكتەردى شىعارۋ, ونى جەتكىزۋ ماسەلەسىن رەتتەۋدى كوزدەپ وتىر. سونداي-اق تەحنولوگيالىق ينفراقۇرىلىمدى دامىتۋ, جاڭا جۇمىس ورىندارىن قۇرۋ, ءوندىرىستىڭ جەرگىلىكتى ۇلەسىن ەسەلەۋ جوسپاردا بار.
مۇنىڭ سىرتىندا, ينجەنەر كادرلاردى دايارلاۋ ماقساتىندا جەرگىلىكتى ماماندارعا ارنالعان تۇراقتى ءبىلىم باعدارلاماسى ىسكە قوسىلادى. باعدارلاما اياسىندا اقش پەن ەۋروپاداعى «John Deere» زاۋىتتارىندا تاعىلىمداما ۇيىمداستىرىلىپ, ماشينا جاساۋ, اۆتوماتتاندىرۋ جانە تسيفرلىق جوبالاۋ بويىنشا زاماناۋي تەحنولوگيالاردى مەڭگەرۋ قاراستىرىلعان. سونىمەن قاتار الداعى ۋاقىتتا قوستانايدا تسيفرلىق ينجەنەر, اۆتونومدى تەحنيكا وپەراتورى, جاساندى ينتەللەكت جانە دەرەكتەردى وڭدەۋ مامانى, تسيفرلىق اگرونوم ءتارىزدى جاڭا ينجەنەرلىك قۇزىرەتتەردى دامىتۋعا ارنالعان ءبىلىم ورتالىعى اشىلماق.
قوستاناي وبلىسى
