الەۋمەتتىك جەلىدە تاراعان بەينەجازبادا ايەل مەن دارىگەر اراسىنداعى داۋدىڭ سوڭى مەديتسينا قىزمەتكەرىنە كۇش قولدانۋمەن اياقتالعانى بايقالادى.
اۋرۋحانا اكىمشىلىگىنىڭ مالىمەتىنشە, 31 مامىر كۇنى تۇنگى ساعات 00:07-دە ەكى جاسار بالا قابىلداۋ بولىمىنە جەتكىزىلگەن. دارىگەر تەكسەرۋدەن كەيىن بالانى اۋرۋحاناعا جاتقىزۋ قاجەت دەگەن شەشىم قابىلداعان. الايدا سول كەزدە بالانىڭ قاسىندا زاڭدى وكىلى ەمەس, كامەلەتكە تولماعان اپكەسى بولعان.
قازاقستان زاڭناماسىنا سايكەس, كامەلەتكە تولماعان بالانى اۋرۋحاناعا جاتقىزۋ ءۇشىن زاڭدى وكىلىنىڭ كەلىسىمى قاجەت بولعاندىقتان, مەديتسينا قىزمەتكەرلەرى اناسىنىڭ كەلۋىن كۇتكەن.
اۋرۋحاناعا كەلگەننەن كەيىن بالانىڭ اناسى مەن مەديتسينا قىزمەتكەرى اراسىندا تۇسىنىسپەۋشىلىك تۋىنداپ, جانجالعا ۇلاسقان. بەينەباقىلاۋ جازبالارى مەن كۋاگەرلەردىڭ ايتۋىنشا, دارىگەرگە قاتىستى كۇش قولدانۋ ارەكەتى بولعان.
وقيعا ورنىنا پوليتسيا شاقىرىلىپ, ءتيىستى ارىز قابىلدانعان. اۋرۋحانانىڭ ىشكى تەكسەرۋى ناتيجەسىندە دارىگەردىڭ ارەكەتى قولدانىستاعى زاڭ تالاپتارى مەن مەديتسينالىق مەكەمەنىڭ ىشكى ءتارتىپ ەرەجەلەرىنە سايكەس بولعانى انىقتالعان. سونداي-اق بالانى اۋرۋحاناعا جاتقىزۋدان باس تارتۋ نەمەسە مەديتسينالىق كومەك كورسەتپەۋ فاكتىلەرى تىركەلمەگەن.
ەرلىكپەن قازا تاپقان فەلدشەرگە تۋعان جەرىندە ەسكەرتكىش تاقتا ورناتىلدى
الماتى قالالىق پوليتسيا دەپارتامەنتىنىڭ حابارلاۋىنشا, اتالعان وقيعا بويىنشا الاتاۋ اۋداندىق پوليتسيا باسقارماسى جان-جاقتى تەكسەرۋ جۇرگىزىپ جاتىر. قازىرگى ۋاقىتتا ەكى تاراپ تا پوليتسياعا ارىز بەرگەن.
قۇقىق قورعاۋ ورگاندارى وقيعانىڭ بارلىق ءمان-جايىن انىقتاپ, ءار تاراپتىڭ ارەكەتىنە زاڭ اياسىندا باعا بەرىلەتىنىن مالىمدەدى.
