تۇساۋكەسەرگە قازاقستاننىڭ تۇركياداعى وكىلەتتى جانە توتەنشە ەلشىسى ابزال ساپاربەك ۇلى, كىتاپحانالار جانە باسىلىمدار باس ديرەكتورىنىڭ ورىنباسارى ياحيا وزەن, پروف. در. حۋليا كاساپوگلۋ چەنگەل, پروف. در. ابدۋاقاپ قارا, دوتس. در. دجەميلە كىنادجى, تۇرىكسويداعى قازاقستان وكىلى اسقار تۇرعانباەۆ, تۇرىك زيالىلارى, قازاقستاندىق ستۋدەنتتەر قاتىستى.
العى سوزىندە قازاقستان ەلشىسى ابزال ساپاربەك ۇلى جەلتوقسان ايىنىڭ قازاق ۇلتى ءۇشىن ەرەكشە ماڭىزى بار ەكەنىن ايتا كەلە الاش قوزعالىسى جونىندە تۇسىرىلگەن ەڭ اۋقىمدى ءفيلمدى دايىنداپ, تۇركيادا كورسەتكەن كوكتۋ قوعامىنا العىسىن جەتكىزدى. "ۇلت ازاتتىق كۇرەس جولىندا مىرجاقىپ دۋلاتوۆ "ويان, قازاق! دەگەن بولسا, ەلباسى نۇرسۇلتان نازارباەۆ«رۋحاني جاڭعىرۋ», « ۇلى دالانىڭ جەتى قىرى» ۇندەۋلەرى ارقىلى "ويان, تۇركى الەمى!" دەپ شاقىرادى" دەگەن ەلشى ەندى تۇركى حالىقتارىنىڭ تاريحى تەرەڭ تۇركى مادەنيەتى مەن وركەنيەتىن جانداندىرۋكەرەكتىگىن باسا ايتتى.
“الاش ۇلتتىق قوزعالىسىن باستاعان زيالىلار تەك قازاق دالاسىن ويلاپ قانا قويعان جوق, ولار بۇكىل ورتالىق ازيانىڭ بولاشاعىن ويلادى. تاۋەلسىز مەملەكەت قۇرا الماسا دا, تاۋەلسىز مەملەكەتتە بولۋى قاجەت بارلىق شەشىمدەردى قابىلدادى" دەدى ول.
پروف. در. حۋليا كاساپوگلۋ چەنگەل بولسا ءسوز كەزەگىندە قازاق ۇلت ازاتتىق كۇرەسى وكىلدەرى مەن تۇرىكتىڭ ۇلت ازاتتىق كۇرەسىن جۇرگىزگەن تۇلعالار اراسىندا وتە جاقىن ۇقساستىق بار ەكەنىن اتاپ كورسەتتى." ولار - بىردەي رۋح, بىردەي تەبىرەنىستىڭ تۇلعالارى. قازىرگى كۇنى ستالين ءوز تۋعان جەرىندە ۇمىتىلعان كەزدە, الاش زيالىلارىن بۇكىل تۇركى ەلدەرى اسپەتتەپ ەسكە الادى" دەدى ول.
پروف. در. ابدۋاقاپ قارا بولسا ءوز سوزىندە الاش قوزعالىسىنىڭ ءمانى مەن ماڭىزىنىڭ تەرەڭدە جاتقانىن باسا ايتتى." ارادان 100 جىل وتسە دە, بولاشاك ۇرپاق ولاردى تولىق تۇسىنۋگە ءالى دە تالپىنۋدا" دەدى ول.
دەرەكتى فيلم كورسەتىلىمى انكارا تۇرعىندارى, زيالى قاۋىم وكىلدەر جانە جاس زەرتتەۋشىلەردىڭ كوڭىلىنەن شىقتى.
ايتا كەتەلىك, قر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» اق «ەل» پروديۋسەرلىك ورتالىعىمەن بىرلەسە تۇسىرگەن ۇلت-ازاتتىق الاش قوزعالىسى تۋرالى سىر شەرتەتىن «الاش تۋى استىندا» دەرەكتى ءفيلمى «ويان, قازاق!», «جاريالانباعان اۆتونوميا» جانە «قاتەرلى وتكەل» دەپ اتالاتىن ءۇش بولىمنەن تۇرادى.
1918 جىلدىڭ 8-23 قىركۇيەگى ارالىعىندا رەسەيدىڭ ۋفا قالاسىندا مەملەكەتتىك ءماجىلىس ءوتتى. سول ماجىلىستە الاش قايراتكەرلەرى ۇلت-ازاتتىق كۇرەس مۇددەسىن زاڭدى تۇردە قورعاۋدىڭ ۇلگىسىن كورسەتتى. بۇل دەرەكتى ءفيلمنىڭ كورسەتىلىمى الاشوردانىڭ 100 جىلدىعىنا وراي ارنايى ۇيىمداستىرىلعان.
ءفيلمدى ءتۇسىرۋ توبى الاش قايراتكەرلەرىنىڭ ىزىمەن سەمەيدىڭ الاش قالاسى اتالعان اۋماعىندا, ماسكەۋدەگى كرەمل, سانكت-پەتەربۋرگتەگى دۋما وتىرىستارى وتكەن تاۆريا سارايىندا, سمولنىيدا, سانكت-پەتەربۋرگ, قازان ۋنيۆەرسيتەتىندە, ۋفاداعى مەملەكەتتىك ءماجىلىس وتكەن بۇرىنعى ء«سىبىر» قوناقۇيىندە ءتۇسىرۋ جۇمىستارىن جۇرگىزدى.
