م.اشىمباەۆتىڭ سوزىنە قاراعاندا, تاۋەلسىزدىك جىلدارىندا قابىلدانعان ستراتەگيالىق ءمانى زور باستامالاردىڭ ءبىرى – ەلباسىنىڭ تىكەلەي تاپسىرماسىمەن قۇرىلعان «بولاشاق» باعدارلاماسى. سونىمەن قاتار ەل ءۇشىن ماڭىزدى, اۋقىمدى باعدارلامانىڭ ءبىرى – ەل ورتالىعىن استانا قالاسىنا اۋىستىرۋ. «بۇل سول كەزەڭدەگى وتە باتىل قادام بولدى. ويتكەنى تاۋەلسىزدىكتىڭ العاشقى جىلدارى ەل ءۇشىن اۋىر ءتيدى. ەكونوميكالىق, ساياسي, الەۋمەتتىك سالالاردا داعدارىستارعا تاپ بولدىق. جالاقى تولەنگەن جوق, جۇمىس ورىندارى قىسقارتىلىپ جاتتى.
وسىنداي جاعدايعا قاراماستان ەلباسى «بولاشاق» باعدارلاماسىمەن بىرگە ەل ورتالىعىن اقمولا قالاسىنا اۋىستىرۋ تۋرالى شەشىم قابىلدادى. 20 جىل وتكەن سوڭ وسى قادامنىڭ ەكونوميكالىق دامۋعا, الەۋمەتتىك جانە ساياسي ماسەلەلەرگە وڭ اسەر ەتىپ, ەلدىڭ اياققا تۇرۋىنا كوپ ۇلەس قوستى», دەدى م.اشىمباەۆ. سونداي-اق پارتيا توراعاسىنىڭ ءبىرىنشى ورىنباسارى ەلوردانى اۋىستىرۋ ەلىمىزدەگى سولتۇستىك وڭىرلەردىڭ دامۋىنا, ينفراقۇرىلىمنىڭ نىعايۋىنا جاعداي جاساپ, جاڭعىرۋ باعدارلاماسىنىڭ ارقاۋىنا اينالدى.
بۇدان بولەك استانا قالاسىنىڭ الەمدىك ماسەلەلەر تالقىلاناتىن حالىقارالىق الاڭعا اينالعانىن اتاپ ءوتىپ, كەيىنگى كەزدە اتقارىلىپ جاتقان شارالارعا توقتالدى. ونىڭ سوزىنە قاراعاندا, استانا مىسالىن مەملەكەتتىك باسقارۋداعى تاپتىرماس كەيس رەتىندە وقىتۋعا لايىق. م.اشىمباەۆ ءۇشىنشى ستراتەگيالىق قادام رەتىندە «رۋحاني جاڭعىرۋ» باعدارلاماسىن اتاپ كورسەتتى. ونىڭ ايتۋىنشا, قوعامدىق سانانى جاڭعىرتۋدىڭ مەملەكەت قالىپتاستىرۋداعى ماڭىزى زور.
اباي اسانكەلدى ۇلى,
«ەگەمەن قازاقستان»
