«جاھاندىق الەمدەگى زاماناۋي قازاقستاندىق مادەنيەت» اتتى كىتاپ سەرياسىمەن جارىق كورگەن شىعارمالارعا اۋدارما جاسالماس بۇرىن كىتاپحانا باسشىلىعى وقىرماندار تاپسىرىسى مەن تالعامىنا ءبىر جىل بويى جۇيەلى تۇردە ساراپتاما جۇرگىزگەن. وقىرمان سۇرانىسىنا سايكەس ولجاس سۇلەيمەنوۆتىڭ «يازىك پيسما», دۋلات يسابەكوۆتىڭ «قارعىن», قويشىعارا سالعارانىڭ «قازاقتار», سماعۇل ەلۋبايدىڭ «اق بوز ءۇي», شەرحان مۇرتازانىڭ «بويتۇمار», مۇرات اۋەزوۆتىڭ «گلاۆپوچتامت», بەكسۇلتان نۇرجەكە ۇلىنىڭ ء«اي, دۇنيە-اي», شاكەن كۇمىسباي ۇلىنىڭ «بالالىق شاق-بالداۋرەن» اتتى شىعارمالارىنا كوبىرەك تاپسىرىس بەرىلگەن. وقىرمان ءوزى انىقتاپ, ءوزى سۇرىپتاعان شىعارمالار اعىلشىن, يسپان, فرانتسۋز, اراب, قىتاي تىلدەرىنە ءتارجىمالانىپ, الماتىداعى ۇلتتىق كىتاپحانادا اتالعان كىتاپتاردىڭ تۇساۋكەسەرى بولىپ ءوتتى.
شىعارمالارى شەت تىلىندە سويلەگەن قالامگەرلەردىڭ ءبارى دە بۇل تۇساۋكەسەردىڭ پرەزيدەنت ن.نازارباەۆتىڭ ەل تاريحى مەن حالىقتىڭ جاھاندىق تاريحتاعى ورنىنا تىڭ كوزقاراسپەن قاراۋ مۇمكىندىگى نازاردا بولاتىن جاڭا « ۇلى دالانىڭ جەتى قىرى» اتتى ماقالاسىمەن ۇندەستىك تاۋىپ وتىرعانىن ءبىر اۋىزدان اتاپ ءوتتى.
– « ۇلى دالانىڭ جەتى قىرى» اتتى پرەزيدەنتتىڭ ماقالاسىن وقىپ شىقتىم. ەكى جىل بۇرىن «رۋحاني جاڭعىرۋ» جوباسىن باستادىق. ول جوبادا دا ەلباسى تاريح تۋرالى كەڭىنەن تولعانىپ ايتقان ەدى. ال ءبىز ءالى كۇنگە «اقتابان شۇبىرىندىدان» باسقا ەشقانداي تاريحتى بىلمەيمىز. «سەندەردىڭ ناقتى ىسپەن اينالىساتىن ۋاقىتتارىڭ بولدى عوي» دەگەندى مەڭزەگەن ەكەن پرەزيدەنت تاريحشىلارىمىزعا. عالىمداردىڭ عىلىممەن اينالىسۋى ءۇشىن, بالكىم سەنات زاڭ شىعارىپ, پرەزيدەنت ارنايى جارلىقپەن بەكىتۋ كەرەك شىعار؟ نە سەبەپتى حالىقتاردىڭ اراسىنا جىك تۇسەدى, مەملەكەتتەردىڭ ارازداسۋىنا نە سەبەپ بولادى, عاسىرلار بويى سول حالىقتار نەگە ءبىرىن-ءبىرى كەسكىلەپ, ءبىر-بىرىمەن ۇزدىكسىز جاۋلاسادى؟ مۇنىڭ سەبەبىن تەك عالىمدار عانا ايتا الادى. ال ءبىزدىڭ عالىمدارىمىزدىڭ مۇنى انىقتاۋعا ۋاقىتى جوق. ءوزىنىڭ تۋعان تاريحىن, مادەنيەتىن قورعاۋدىڭ ورنىنا, ولار عىلىممەن ەمەس, كانديداتتىق, دوكتورلىق ديسسەرتاتسيا قورعاۋمەن اينالىسادى. مىنە, پرەزيدەنت ماقالاسىنىڭ ءمانى قايدا جاتىر, – دەدى ولجاس سۇلەيمەنوۆ.
ۇلتتىق كىتاپحانا باسشىلىعى باستاماشى بولعان جوبانى جۇزەگە اسىرۋ تەتىگى رەتىندە قازاقستاننىڭ سىرتقى ىستەر مينيسترلىگىمەن ءوزارا ارەكەتتەستىك پەن ىنتىماقتاستىق ارقىلى, سونداي-اق سەريالىق باسىلىمدى شەتەلدىك كىتاپحانالارعا, 24 مەملەكەتتە اشىلعان قازاقستاندىق ادەبيەت پەن مادەنيەت ورتالىقتارىنا, ساۋدا جەلىلەرىنە سىيعا بەرۋ ارقىلى قازاقستاندىق ادەبيەتتى تانىستىرۋدى ۇسىنىپ وتىر.
ايگۇل احانبايقىزى,
«ەگەمەن قازاقستان»
الماتى
