ەندى مىنە, ۇيالى بايلانىس ابونەنتتىك قۇرىلعىلارىن تىركەۋ ەرەجەلەرى بەكىتىلگەننەن كەيىن, ءىىم قۇرىلعىلاردى تىركەۋگە 2019 جىلدىڭ 1 قاڭتارىنا دەيىن ۇلگەرىپ قالۋدى ەسكەرتىپ وتىر.
– 2019 جىلدىڭ 1 قاڭتارىنان باستاپ IMEI-كود + SIM-كارتا + تۇلعا جسن سىزباسى بويىنشا ابونەنتتىك قۇرىلعىلاردى مىندەتتى تىركەۋ ەرەجەسى كۇشىنە ەنەدى. تىركەلمەگەن ابونەنتتەرگە بايلانىس قىزمەتى كورسەتىلمەيدى. وسىعان بايلانىستى ازاماتتار وسى جىلدىڭ سوڭىنا دەيىن وزدەرىنىڭ بايلانىس قۇرىلعىلارىن تىركەۋلەرى قاجەت, – دەدى ءىىم-ءنىڭ رەسمي وكىلى الماس سادۋباەۆ.
وسى رەتتە ءىىم-ءنىڭ رەسمي وكىلى ۇيالى بايلانىس وپەراتورلارىنىڭ فيليالدارىندا ۇلكەن كەزەك بولىپ, قوعامدا دۇربەلەڭ تۋماۋى ءۇشىن ازاماتتارعا قۇرىلعىلارىن دەر ۋاقىتىندا تىركەۋگە كەڭەس بەرەدى.
– بۇل ەڭ الدىمەن ازاماتتاردىڭ مۇددەسىن قورعاۋ ءۇشىن جاسالىپ وتىر. ەگەر ءبىر ادامنىڭ تەلەفونى تىركەگەننەن كەيىن ۇرلاناتىن بولسا, وندا بازا ارقىلى ونى كىم پايدالاناتىنىن انىقتاۋعا بولادى. بۇعان قوسا, بايلانىس وپەراتورلارى دا بازادا قۇرىلعىنىڭ IMEI-كودى ۇرلانعان رەتىندە كورسەتىلىپ تۇرسا, بايلانىسقا توسقاۋىل قويۋ مۇمكىندىگىن الادى, – دەدى رەسمي وكىل.
بۇعان دەيىن ەلىمىزدىڭ اقپارات جانە كوممۋنيكاتسيالار ءمينيسترى داۋرەن اباەۆ ۇيالى بايلانىستىڭ ابونەنتتىك قۇرىلعىلارىن تىركەۋدە حالىق اراسىندا دۇربەلەڭ بولماۋى ءۇشىن مينيسترلىك تىركەۋ پروتسەسىن بارىنشا جەڭىلدەتكەندىگىن, ءتىپتى ازاماتتار ونلاين رەجىمدە جانە SMS ارقىلى دا ۇيالى تەلەفونىن تىركەۋگە مۇمكىندىك الاتىندىعىن ايتقان بولاتىن.
«ۇيالى تەلەفونداردى تىركەۋ ءۇشىن ۇيالى بايلانىس وپەراتورلارىنىڭ ابونەنتتىك بولىمشەلەرىنە بارۋدىڭ قاجەتى جوق. ابونەنتتەر ونلاين نەمەسە SMS ارقىلى تىركەلە الادى», – دەگەن ەدى د.اباەۆ.
راسىندا, اقپارات جانە كوممۋنيكاتسيالار ءمينيسترىنىڭ ۇسىنىسى مەن الاڭداۋىنىڭ ءجونى بار. ويتكەنى ميلليونداعان ابونەنتتەرىمىز بار دەپ جار سالىپ, جاريا قىلۋدان شارشامايتىن ۇيالى بايلانىس وپەراتورلارى مولشەرلى ۋاقىتتىڭ مەرزىمى تاياعانىمەن, ازىرگە اسا ءبىر بەلسەندىلىك تانىتپاي وتىرعان سىڭايلى. ونى وپەراتورلاردىڭ رەسمي سايتىنا شولۋ جاساپ-اق بايقاۋعا بولادى. ولار ەرتەڭگى كۇنى ۋاقىت تاياعاندا قازىر ءالىپتىڭ ارتىن باعىپ وتىرعان حالىق نوپىرىنە قالاي توتەپ بەرمەكشى؟ ماسەلەن, قازىر ولاردىڭ رەسمي پاراقشالارىندا قاراپايىم تۇتىنۋشىعا ۇعىنىقتى اقپاراتتار جوقتىڭ قاسى.
قازىرگى ۋاقىتتا ەلىمىزدەگى قىلمىستىڭ دەنىن – ۇرلىق قۇرايدى, ال ۇرلىقتىڭ باسىم بولىگى بايلانىس قۇرىلعىلارىنا قاتىستى ەكەندىگى انىق.
سوندىقتان دا اقپارات جانە كوممۋنيكاتسيالار مينيسترلىگى ۇيالى بايلانىستىڭ ابونەنتتىك قۇرىلعىلارىن تىركەۋ ءتارتىبىن بەكىتىپ بەردى, بۇل ءتارتىپ ىشكى ىستەر مينيسترلىگىنىڭ دە وڭ جامباسىنا كەلىپ وتىر. پوليتسەيلەر ەلىمىزدە ۇرلانىپ, قحر, رەسەي, وزبەكستان مەن قىرعىزستانعا اسىرىلاتىن بايلانىس قۇرىلعىلارىن دا قايتارۋعا قۇلشىنىپ وتىر. جالپى, ۇيالى بايلانىس قۇرىلعىسىن تىركەۋ جۇيەسىن قالپىنا كەلتىرۋدىڭ ۇلتتىق قاۋىپسىزدىك ماسەلەلەرىمەن دە ۇشتاستىعى بار.
ەندىگى مىندەت, مينيسترلىك وكىلى ايتقانداي, بوس دۇرلىگۋگە جول بەرمەستەن, تەلەفون اپپاراتتارىن ۋاقتىلى تىركەۋدە جاتىر.
البەتتە, ەرتەرەك تىركەلگەننىڭ ءبىر ءىسى ارتىق بولاتىنى راس. وسى ورايدا ورتاق ءتارتىپتى تاعى ءبىر مارتە ەستەرىڭىزگە سالامىز. بايلانىس قىزمەتىن پايدالانۋشىلار ءۇشىن قۇرىلعىنى تىركەۋ قيىندىق تۋدىرمايدى. اقپارات جانە كوممۋنيكاتسيالار مينيسترلىگىنىڭ مالىمەتى بويىنشا, جەكە تۇلعالار بايلانىس قۇرىلعىلارىن ءوتىنىش بەرىلگەن ساتتەن باستاپ 4 ساعاتتا, زاڭدى تۇلعالار – 8 ساعاتتا اقىسىز نەگىزدە تىركەي الادى. ون ءتورت پەن ون سەگىز جاس ارالىعىنداعى كامەلەتكە تولماعان ازاماتتار بايلانىس قۇرىلعىلارىن زاڭدى وكىلدەرىنىڭ كەلىسىمىمەن تىركەيدى, ال 14 جاسقا دەيىنگى كامەلەتكە تولماعاندار ءۇشىن زاڭدى وكىلدەرى نەمەسە اتا-انالارى تاراپىنان جۇزەگە اسىرىلادى. ۇيالى بايلانىس قۇرىلعىلارىن تىركەۋ جانە قايتا تىركەۋ ءۇشىن قۇرىلعىنىڭ يەسى قىزمەت كورسەتۋدىڭ اۆتوماتتاندىرىلعان قىزمەت كورسەتۋ جۇيەسى ارقىلى نەمەسە ۇيالى بايلانىس وپەراتورلارىنىڭ كەڭسەلەرىنە تومەندەگى تىزىمدەگى قۇجاتتاردى ۇسىنۋى ءتيىس: 1) جسن (جەكە تۇلعالار ءۇشىن) نەمەسە بين (زاڭدى تۇلعالار ءۇشىن); 2) ابونەنتتىك ۇيالى بايلانىس قۇرىلعىسىنىڭ يدەنتيفيكاتسيالىق (IMEI) كودى; 3) ابونەنتتىك ۇيالى بايلانىس قۇرىلعىسىندا قولدانىلاتىن ابونەنتتىك ءنومىرى.
سەرىك ابدىبەك,
«ەگەمەن قازاقستان»
