ال ماراپاتتالعاندارعا كەلەر بولساق, ولاردىڭ قاي-قايسىسى دا كوپكە تانىمال قايراتكەرلەر. بارلىعىنىڭ اتى-ءجونىن اتاپ شىعۋ ءبىراز ورىن الار ەدى, سول سەبەپتى قىسقاشا عانا توقتالايىق. ماسەلەن, «رودينا» اگروفيرماسى» جشس-ءنىڭ باس ديرەكتورى ي.ساۋەردى, مۇناي-گاز ءوندىرۋ سالاسىنىڭ ارداگەرى ۇ.قاراباليندى نەمەسە كارديوحيرۋرگ يۋ.پيانى بىلمەيتىن جان كەمدە-كەم. ادەبيەت پەن ونەر جانە سپورت سالالارى دا نازاردان تىس قالماپتى: ءا.كەكىلباەۆ, و.سۇلەيمەنوۆ, ا.مۇساحودجاەۆا, يۋ.پومەرانتسەۆ, ا.ءاشىموۆ, ج.ۇشكەمپىروۆ جانە تاعى باسقالارى.
جوعارى مارتەبەلى اتاققا لايىق دەپ تانىلعانداردىڭ ىشىندە اگرارلىق سەكتوردىڭ وكىلدەرى باسىمداۋ ەكەن (9 ادام), ونەركاسىپ سالاسىنان بەس ادام (ىشىندە بولات بالقىتۋشى دا بار) وزىپ شىققان, مادەنيەت وكىلدەرى تورتەۋ, دارىگەر ەكەۋ. بىلاي الىپ قاراعاندا, ءوندىرىس سالاسى, ءسوز جوق, ءبىرشاما قامتىلعان. دەگەنمەن دە, كەيبىر سالالاردىڭ وكىلدەرى جوقتىڭ قاسى. مىسالعا, تەمىر جولدى الايىقشى. بارشامىزعا بەلگىلى, ەلباسى بۇل سالانى قازاقستان ەكونوميكاسىنىڭ قالىپتاسۋىنداعى, مەملەكەت تاۋەلسىزدىگىن, ەلدىڭ اۋماقتىق تۇتاستىعىن جانە الەۋمەتتىك تۇراقتىلىعىن نىعايتۋداعى ءرولىن جوعارى باعالايدى. اتقارىلعان يگى ىستەر دە بارشىلىق. ەلىمىز تاۋەلسىزدىك العان سوڭ تەمىر جولدىڭ وڭتايلى ۇلتتىق جەلىسىن قۇرۋ قولعا الىندى, ويتكەنى كەيبىر وڭىرلەر مەن وبلىستار اراسىنداعى كولىك بايلانىسى كورشى مەملەكەتتىڭ ۋچاسكەلەرى بويىنشا جۇزەگە اسىرىلاتىن. جاڭا جەلىلەردىڭ ىسكە قوسىلۋى وڭىرلەر اراسىنداعى ىشكى كوممۋنيكاتسيالاردى, قازاقستاننىڭ ترانزيتتىك جانە ەكسپورتتىق الەۋەتىنىڭ ءوسۋىن قامتاماسىز ەتتى. قازىرگى ۋاقىتتا قازاقستاندا 5 حالىقارالىق تەمىر جول كولىك ءدالىزى جۇمىس ىستەيدى.تاماشا جەتىستىك! سول يگى ىستەردى اتقارۋشىلار كىم؟ ارينە, تەمىرجولشىلار, قۇرىلىسشىلار!
مەنىڭ پايىمداۋىمشا, قاراپايىم جول بريگاديرى, توعىز جولدىڭ تورابىنان شىققان قاندىاعاشتىق مولداش جاڭابەرگەنوۆتان سوڭ (و دا وداق كەزىندە بولعان جاعداي) بىردە-ءبىر تەمىرجولشى مۇنداي جوعارى اتاققا ۇسىنىلماعان ەكەن. لايىقتى ادامدار جوق ەمەس, بار عوي! باسقاسىن ايتپاعاندا, تاۋەلسىزدىك جىلدارى زامانا تالابىنا ساي تەمىر جول قۇرىلىسىن جۇرگىزۋدى جەتىك مەڭگەرگەن وتاندىق كاسىپقوي مەنەدجەرلەر توبى قالىپتاستى. سولاردىڭ ىشىنەن بوريس الەكساندروۆيچ يسينامانوۆتى ايرىقشا اتار ەدىم. جالپى بۇل ازاماتتىڭ ەسىمى قازاقستان تەمىرجولشىلارىنا جاقسى تانىس. ول بۇل تىڭ سالاعا مول تاجىريبە جيناقتاپ بارىپ كەلدى. كەزىندە باتىس قازاقستان تەمىر جولى باستىعىنىڭ ورىنباسارى, اقتوبە تەمىر جول بولىمشەسىنىڭ باستىعى بولىپ قىزمەت ەتكەن. تەمىر جول سالۋ جونىندە جاڭا جوبا قولعا الىنسا بولدى, ينۆەستورلار بوريس الەكساندروۆيچتىڭ كومەگىنە جۇگىنەدى. ويتكەنى ول بىلىكتىلىگى مەن باسقارۋشىلىق قابىلەتىنىڭ ارقاسىندا كەز كەلگەن قيىندىقتى جەڭۋگە ءازىر, وتە سەنىمدى ادام.
قورىتا ايتقاندا, بوريس الەكساندروۆيچ يسينامانوۆ تاجىريبەلى جولشى-ينجەنەر, ىسكەر ۇيىمداستىرۋشى رەتىندە قازاقستان تەمىر جولىنداعى جاڭا جول قۇرىلىستارىنىڭ كوپشىلىگىنە جەتەكشىلىك ەتتى, ولاردىڭ ۇزىن سانى مىنالار: حرومتاۋ – التىنسارين – 404,5 كم, جەتىگەن – التىنكول – 235,0 كم, ارقالىق – شۇباركول – 225,0 كم, الماتى-1 – شۋ (ەكىنشى جولدار) – 100 كم, جەزقازعان – سەكسەۋىل – 494,5 كم.
ب.يسينامانوۆتىڭ باسشىلىعىمەن سالىنعان جاڭا تەمىر جولداردىڭ جالپى ۇزىندىعى 1460 شاقىرىمدى قۇرايدى, ال بۇل ءبىر تەمىر جول بولىمشەسىنىڭ جولدارىنا پارا-پار.
بوريس الەكساندروۆيچ ءالى كۇنگە دەيىن ەڭبەكتەن قول ۇزگەن ەمەس, ءالى دە تىڭ, قايراتتى – 2017 جىلدىڭ شىلدە ايىنان باستاپ «دوسجان تەمىرجولى» اق پرەزيدەنتىنىڭ كەڭەسشىسى بولىپ جۇمىس ىستەيدى. قارا جۇمىسشىدان باستاپ ەڭبەكتە قۇرىشتاي شىڭدالعان ارداگەر. ءوز ىسىنە بەرىلگەن مۇنداي بولات جول باعباندارى قازاقستان تەمىر جولىندا كوپتەپ سانالادى.
ناعاشىباي بالماحان ۇلى,
جۋرناليست
اقتوبە
