التىن تۇستەس كۇمبەزى انادايدان كورىنىپ, سانالىنىڭ ەسىنە يماندىلىق ساباعىن ءسات سايىن سالىپ تۇراتىن مەشىتتىڭ الدى قاراقۇرىم. قوستاناي توڭىرەگى تۇگىلى, بۇكىل ەلدە كامشات دونەنباەۆانى بىلمەيتىن كىم بار ەدى؟ ونى بىلگەن جان ەڭبەك, نامىس, ۇلتتىق ءتالىم-تاربيە, ادامگەرشىلىك پەن قاراپايىمدىلىق سەكىلدى بۇگىنگى جاق تالدىرىپ ايتىپ جۇرگەن قۇندىلىقتاردىڭ نە ەكەنىن ىشتەي ۇعىنىپ, مويىنسۇنىپ سالا بەرەتىن. ...قارالى جيىن لوبلىپ كەيىن ىسىرىلدى, جانازا شىعارىلىپ, تابىتتى كوتەرگەن توپ اقسۋاتتاعى ونىڭ قايىن جۇرتىنىڭ قورىمىنا قاراي بەت الدى. سوندا كامشاتپەن بىرگە جوڭكىلىپ ءبىر ءداۋىر كوشىپ بارا جاتتى-اۋ...
قازاقستاندا تىڭ جانە تىڭايعان جەرلەردىڭ يگەرىلۋىنە بايلانىستى وتكەن عاسىردىڭ 60- جىلدارى ەلدە جاپپاي مەحانيزاتورلار دايىنداۋ ناۋقانى باستالادى. كامشات كەلىن بوپ تۇسكەن اقسۋات اۋىلىندا دا تراكتورشىلار كۋرسى اشىلادى.سول كۋرستا كامشات پەن سول اۋىلدىڭ قىزى قۇندىزاي وقىپ شىعادى. ارحيۆ ماتەريالدارى انىقتاعانداي, ول 1966 جىلى العاش رەت جوسپاردى ەكى ەسە ورىنداپ, «متز-5» تراكتورىنىڭ الدىنا جالاۋشا ىلگەن ەكەن. ول كەزدە ەرلەرمەن قاتار تراكتور رۋلىنە وتىرعان قازاق قىزى جوقتىڭ قاسى عوي. ءبىر كۇن جۇمىستان قالمايتىن, كورسەتكىشىن اي سايىن جاڭالاپ وتىراتىن كامشات پارتيانىڭ دا, باسشىلاردىڭ دا نازارىنا ىلىنەدى. وزگەلەرگە ۇلگى ەتىپ ۇسىنۋعا ءتۇسى دە, ءىسى دە كەلىپ تۇرعان كامشاتتىڭ اتى گازەت-جۋرنال, راديو ارقىلى قازاق دالاسىنا جەلدەي ەسىپ جۇرە بەردى. 1977 جىلى كامشات دونەنباەۆا «قىز-كەلىنشەكتەر, تراكتور رۋلىنە وتىرايىق!» دەگەن ۇندەۋ تاستادى. ول وسىلاي بۇكىل ەلدەگى مەحانيزاتور قىزداردىڭ كوشىن باستادى. ەڭبەكتە دە, ومىردە دە ىسىلدى. تالاي رەت رەسپۋبليكالىق, وداقتىق جارىستاردا الدىنا جان سالمادى. سوتسياليستىك ەڭبەك ەرى, مەملەكەتتىك سىيلىقتىڭ لاۋرەاتى اتاندى. قانداي اتاق السا دا, ءوزىنىڭ ماڭداي تەرى بولاتىن.
كامشات اپا داڭققا توقمەيىلسىپ, كوكىرەك كەرىپ, جۇرتقا جوعارىدان قاراعان جان ەمەس. الايدا كەرەك جەرىندە باتىل مىنەزىمەن ءوز پىكىرىن باسشىعا دا, باسقاعا دا تىڭداتا بىلەتىن.
– 70-جىلدارى لەنينگرادتاعى كيروۆ تراكتور زاۋىتىنىڭ ءبىر تراكتورى ءبىزدىڭ شارۋاشىلىقتا سىناقتان ءوتىپ جاتقان, ونى كامشات جۇرگىزەتىن. كوكتەمدە ءدان سەۋىپ جاتقان كەزدە الگى تراكتور سىنىپ قالدى. ونى جوندەي المادىق, وبلىسقا دا ايتتىق. ال ۋاقىت سۋسىپ كەتىپ بارا جاتىر. ءبىر كۇنى كامشات بايعازىقىزى كەلدى دە, «اناتولي نيكولاەۆيچ, زاۋىتقا تەلەفون سوعامىز» دەدى. مەن تاڭعالىپ بەتىنە قارادىم, ول كەزدە اۋىلداعىلارعا قوستانايمەن حابارلاسۋ وڭاي ەمەس قوي. ول سوناۋ لەنينگرادقا تەلەفون سوعىپ, زاۋىتتىڭ باس قۇراستىرۋشىسى پوپوۆتى تاۋىپ الىپ, جاعدايدى ايتتى. ول كىسى ەكى سوزگە كەلمەستەن, «ەرتەڭ ءبىزدىڭ ماماندار ءسىزدىڭ شارۋاشىلىقتا بولادى» دەدى. ايتقانىنداي, ەرتەڭىنە تاڭەرتەڭ ساعات تاڭعى 06:00-دە لەنينگرادتىق ءبىر توپ مامان ءبىزدىڭ كەڭسەنىڭ الدىندا تۇردى عوي. ايتپاقشى, لەنينگرادتىق ماماندار «ك-700» تراكتورىن جەتىلدىرە تۇسكەندە كامشاتتىڭ ەسكەرتۋى مەن ۇسىنىستارىن قاپەرگە العانىن ەكىنىڭ ءبىرى بىلە دە بەرمەس. سونداي ەدى عوي, ءبىزدىڭ كامشات! – دەيدى شارۋاشىلىقتىڭ ينجەنەرى بولعان اناتولي شابانوۆ.
بريگادادا بىرگە تراكتور ايداعان ارىپتەستەرىنىڭ بارلىعى دا قازىر قارتايعان, توپىراقتان تىس جۇرگەنى سول حاركوۆ اۋىلىندا تۇرىپ جاتىر. ولار كامشات تۋرالى اڭگىمە ايتىلسا, الدىمەن ونىڭ قاراپايىمدىلىعى مەن ادامگەرشىلىگىن اۋىزعا الادى. 80-جىلدار بولسا كەرەك, شارۋاشىلىق كامشات اپاي ءۇشىن جۇمساق تراكتور ورىندىعىن الدىرىپتى. ول ورىندىققا وتىرىپ كورىپ, «جاقسى , ساپالى ەكەن» دەپ باعاسىن ايتىپتى. بىراق...
– بىراق كامشات بايعازىقىزى «بۇل ورىندىققا وتىرمايمىن» دەسىن. «بۇكىل بريگاداعا الىپ بەرسەڭدەر, راس, كوپتىڭ ءبىرى بولىپ وتىرار ەدىم. باسقالار مىنگەن تراكتور دا سەلكىلدەيدى, ءبارىمىز ءبىر القاپتا جۇرەمىز» دەدى. قايتالاپ ايتىپ كورىپ ەدىك, «جوق!» دەپ كەسىپ تاستادى. تالاي جاقسى ادامدار بار عوي, بىراق كامشاتتاي ايەل ومىرگە ءبىر-اق كەلەدى, – دەيدى اناتولي نيكولاەۆيچ.
جۇزىنەن نۇر توگىلگەندەي رياسىز جىميىپ تۇراتىن كامشات اپانىڭ ادىلەتتىلىك سۇرىنگەن شاقتاردا, قيسىنسىز نارسەگە كوڭىلى تولماعاندا بەت قاراتپايتىن ءور مىنەزى دە بولاتىن. بىردە وبلىستىق پارتيا كوميتەتىنىڭ ءبىرىنشى حاتشىسى نيكولاي كنيازەۆ مەڭدىعارا اۋدانىنىڭ شارۋاشىلىقتارىن ارالايدى. ساپار باعدارلاماسىندا كامشات دونەنباەۆامەن دە كەزدەسۋ بار ەكەن. «حاركوۆ» كەڭشارىنىڭ ديرەكتورى سايران بۇقانوۆ «كامشات تراكتورىمەن كنيازەۆ كەلەتىن 3-ءشى بولىمشەنىڭ القابىنا بارىپ, جۇمىس ىستەپ ءجۇرسىن» دەگەن اۋدان باسشىلىعىنىڭ سالەمىن جەتكىزەدى.
– سوندا كامشات بايعازىقىزى: «سەندەردىڭ وسى كوزبوياۋشىلىقتارىڭنان شارشادىم. ەشقايدا دا بارمايمىن, جۇمىستى ءوز القابىمدا ىستەيمىن» دەپ, تىكە قايتارىپ تاستادى. مەن قايتىپ باتا المادىم, – دەيدى قازاقستاننىڭ ەڭبەك ەرى سايران بالكەن ۇلى.
كامشات اپانىڭ كوزى تىرىسىندە: «جوسپار بار عوي, سونى ورىنداي الماي قالامىن با دەپ جانتالاسىپ جۇرەمىن. جەر جىرتقان كەزدە كەشكە كەلىپ, سيىرىمدى ساۋىپ, بالالاردىڭ تاماعىن بەرىپ, جاتقىزعان سوڭ, ايدىڭ جارىعىمەن ءبىرشاما جۇمىس ىستەپ كەلەتىن ەدىم. قانشا دەگەنمەن, ايەل ادام عوي, قورقادى, تراكتور تۇرىپ قالادى دەي مە, تەمىربەك ارتىمنان القاپقا كەلۋشى ەدى. شارشامايتىنى قايدا, شارشايمىن. ءبىر ۇيقى ارمان بولىپ جۇرەتىن. بىردە جۇمىستان كەلە جاتقاندا رۋلدە وتىرىپ قالعىپ كەتىپپىن, سوقانى كوتەرۋدى ۇمىتىپپىن, اۋىلعا كىرگەنشە سوقا جەردى سىزىپ كەلگەن عوي» دەپ كۇلىپ العانى بار ەدى اپايدىڭ.
كەڭەس داۋىرىندە كەۋدەسى وردەن-مەدالگە تولى ەڭبەك ادامدارى كومپارتيانىڭ سەزدەرىنە دەلەگات بولىپ قاتىسىپ, الاقانىن قىزدىرىپ, قول سوققان دۇرمەكتىڭ قاتارىندا وتىرىپ قايتاتىن. كامشاتتى سولارداي ەڭبەك ادامى دەسەك تە, وزگەلەردەن ورەسى بيىك ەدى. ول 1974-1989 جىلدار ارالىعىندا كسرو جوعارعى كەڭەسىنىڭ ءۇش شاقىرىلىمىنا قاتار دەپۋتات بولىپ سايلاندى. كسرو جوعارعى كەڭەسىنىڭ ۇلتتار كەڭەسى توراعاسىنىڭ ورىنباسارى بولدى. شارۋاشىلىقتاعى جۇمىسىنىڭ سىرتىندا قانشاما قوعامدىق جۇمىستاردى اتقاردى.
– كامشات جوعارعى كەڭەسكە دەپۋتات بولعاننان كەيىن جينالىستارعا كوبىرەك جۇرەتىن بولدى. سوندا ءوزىنىڭ نورماسىن بريگاداعا قالدىرماۋ ءۇشىن تاڭعى ساعات 3-4-كە دەيىن جەر جىرتقان كەزىن بىلەمىن. قىردان ۇيىنە كەلىپ, سومكەسىن الا سالا, كومبينەزونىن دا شەشپەستەن قوستانايعا جەتىپ, كيىمىن اۋىستىرىپ, ماسكەۋگە ۇشاتىن ۇشاققا ءمىنىپ ۇلگەرەتىن. ونىڭ وسىنداي ءبىردى-بىرگە جالعاپ, جۇگىرىپ جۇرەتىن كۇندەرىنىڭ كۋاسىمىن. وعان كسرو-نىڭ تۇكپىر-تۇكپىرىنەن جۇزدەگەن حاتتار كەلەتىن. بارلىعى دا وزەكتى ماسەلەلەرىن, جانايقايىن ايتىپ, كومەك سۇراپ جازادى. مەن ماسكەۋدە وقىعان جىلدارى سەسسياسىنا كەلگەن كامشات ماعان سوقپاي كەتپەيتىن. قولىندا قانداي مينيسترلىككە, قانداي دا ورگاندارعا, سوتقا اپارۋعا ءتيىستى, الدىن الا ءوزى رەتتەپ ءبولىپ العان بۋداقتاعان حاتتاردى كورەتىنمىن. ول سونىڭ بارلىعىنا دا كەشىكتىرمەي جاۋاپ جازۋعا ءتيىستى بولاتىن, – دەيدى قۇربىسى, مەملەكەتتىك قىزمەت ارداگەرى سارا وماروۆا.
كامشاتتىڭ اناسى ءزۇبايزا اۋرۋلى بولادى. اكەسى ۇنەمى جۇمىستا, جالعىز اعاسى مەلس پەن كامشات ءۇيدىڭ جۇمىسىن اتقارادى. ون ەكى جاسىنان نان جاۋىپ, تاماق ىستەيدى. ورىس مەكتەبىنىڭ 7 سىنىبىن عانا بىتىرەدى, بىراق جاقسى وقيدى. دارىگەر بولۋدى, ءسويتىپ اناسىن ەمدەۋدى ارمانداپتى. ەگەر كامشات تراكتور رۋلىنە وتىرماي, وزگە ماماندىق العاندا دا, ادامگەرشىلىگى, جاۋاپكەرشىلىگى, تەگىمەن كەلگەن پاراساتى ونى وسى بيىگىنە جەتەلەر ەدى. دەگەنمەن ايەلدىڭ باعى كەيدە ونىڭ اقىل-اجارىنا ەمەس, تۇسكەن تابالدىرىعىنا بايلانادى-اۋ, ءسىرا. ول 1959 جىلى مەڭدىعارا اۋدانىنداعى اقسۋات اۋىلىنا 17 جاسىندا كەلىن بوپ ءتۇستى. «تەمىربەككە مەنى ۇلكەندەرىمىز كەلىسىپ, الىپ بەردى عوي. بىراق ءوزىم ىزدەسەم دە ءدال تەمكەڭدەي ازاماتتى تاپپاس ەدىم» دەپ وتىرار ەدى كامشات اپا. جولداسى تەمىربەك تە, اتاسى مەن قوس ەنەسى دە كامشاتتىڭ تراكتورعا وتىرۋىنا كولدەنەڭ تۇرماعان, قايتا قولدارىنان كەلگەنشە ونى قولداپ, كوتەرىپ وتىرعان. تاعدىردىڭ اۋىرتپالىعىن كوپ كورگەن وتباسىنا كامشات تا ىرىس-قۇت بولىپ كىرەدى. ول كەلگەندە اتا-ەنەسى قىرتىستان سالىنعان قورجىن ۇيدە تۇرادى ەكەن. اقسۋاتتىڭ اينالاسىندا قارايعان تال بولمايدى, اعاشسىز جالاڭاش جەر. كولدى جاعالاي جايعاسقان اۋىل قىسىمەن قوپانىڭ قامىسىن جاعىپ شىعادى. «تورگى بولمەدە ۇلكەن ەنەم مەن 13 جاسار قاينىم, ولاردان تومەن اتام مەن كىشى ەنەم جاتادى. ءبىز تەمىربەك ەكەۋمىزدىڭ كەرەۋەتىمىز اۋىزعى بولمەدە, پەشتىڭ جانىندا تۇردى. سول بولمەدە اس دايىندالادى, ءبىزدىڭ توسەگىمىزدىڭ جانىندا قاراعايدان قاعىپ قويعان ۇستەل بار, سونىڭ ار جاعىنا قورشاۋ جاساپ, ءبىر بۇزاۋ مەن قوزى-لاقتى قاماپ قويامىز. تازالىق ساقتاعان بولىپ, بۇزاۋ قيمىلداسا «توسىپ» شىعامىز. ءۇيدىڭ ەدەنى جوق, ونى ساز بالشىققا سيىردىڭ جاپاسىن قوسىپ سىلاپ تاستايمىز. قامىستىڭ قىزۋى نە بولسىن, ءۇي تاڭعا قاراي سۋىپ كەتەدى. مەن تاڭالاكەۋگىمدە تۇرىپ, پەشتى گۋىلدەتىپ جاعىپ, كەمپىر-شالدىڭ دارەت سۋىن جىلىتىپ قويامىن. جىپ-جىلى ۇيدە ولار ەسىنەپ تۇرىپ جاتادى» دەپ اڭگىمەلەۋشى ەدى جارىقتىق.
قازاق اۋىلى كەۋدەسىن كوتەرە قويماعان ۋاقىت بولسا دا, وسى وتباسى بارعا قاناعاتشىل, مەيىرىمگە باي جاندار ەكەن. ۇلكەن ەنەسى ءنازيرا جەسىر قالعاندا اقساقالدار 13 جاسار قاينىسىنا امەڭگەرلىكپەن اتاستىرادى. قاينىسى وسكەنشە ءبىراز جىل كۇتىپ بارىپ, نەكەسىن قيادى. بۇرىنعى كۇيەۋىنەن قالعان جالعىز ۇل سوعىسقا بارا وققا ۇشادى. كەنجەبەكتەن كوتەرگەن بالالارى شەتىنەپ كەتەدى. ءوزىنىڭ جاسى دا كەتىپ بارادى. سودان «سەن ۇرپاقسىز وتپە, ايەل ال» دەپ, شالىنا ءبىر بالامەن جەسىر وتىرعان ماكۋرانى قوسادى. اناسىنىڭ سوڭىنا ەرىپ كەلگەن 5-6 جاسار تەمىربەكتىڭ مەكتەپكە باراردا مەتريكاسى دا بولمايدى. كەنجەبەك وعان قۇجات الاردا اعايىندارى «اتىڭا جازدىرىپ المايسىڭ با, ءوزىڭ باعىپ وتىرسىڭ عوي» دەپ جاناشىرلىق تانىتىپتى. سوندا كەنجەبەك: «سوعىستا قىرشىن كەتكەن جىگىتتىڭ جالعىز ءىزىن وشىرسەم, مەنىڭ كىم بولعانىم؟ ءوزىنىڭ اكەسىنە جازامىن» دەگەن ەكەن. سونىمەن تەمىربەك ءوز اكەسىنىڭ تەگىمەن عابدول ۇلى دونەنباەۆ بولىپتى. بىراق كەنجەبەك ونى ءوزىنىڭ بالاسىنان كەم كورمەپتى.
كەنجەبەك اتاي ءوزىنىڭ جەڭگەدەي العان ۇلكەن ايەلىن «جانىم», كىشى ايەلىن «تايىم» دەپ سويلەيدى ەكەن. «مەنىڭ اتامداي ادام سيرەك شىعار. ءبىزدىڭ وتباسىمىزدا «وگەي بالا, وگەي اكە» دەگەن ۇعىم بولعان ەمەس. اتام دا, ەكى ەنەم دە ءومىر بويى ءبىزدى «تەمىربەكجان, كامشاتجان» دەۋمەن ءوتتى. مەنىڭ ۇلكەن قىزىم تۋعاندا اتىن گۇلجان قويدى دەپ ەدى كامشات اپاي.
وسىنداي وتباسىنىڭ ىنتىماعىن كامشات ودان ءارى جالعاپتى. ون جەتى جاستا بوساعا اتتاعان ول ون ءۇش جاسار قاينىسى موماقايدى «تورە جىگىت» دەپ, اۋلەتىندەگى باسقا قايىناعا, قاينىلارى مەن قايىن سىڭلىلەرىنىڭ بارلىعىنا «اعەكە», «اپاتاي», «مىرزا جىگىت», «ەركەم» دەگەن سياقتى ات قويىپتى. تازا ورىس اراسىندا وقىپ كەلگەن قىزدىڭ تاربيەسى مەن تەكتىلىگى كەلگەن ورتاسىن دا ريزا ەتكەن. «مەن كەلگەن سوڭ, جىلعا جەتپەي انام قايتتى. بىراق قوس ەنەم انامدى جوقتاتپادى» دەپ وتىراتىن جارىقتىق. وتباسىنداعى ىنتىماق, تاتۋلىقتى قاراڭىز: كىشى ەنەسى ءبىراز بالا تاۋىپتى, بىراق بارلىعى دا شەتىنەپ كەتە بەرگەن. قولدارىنا ىلىككەن جالعىز ۇل موماقاي ۇلكەن ەنەسىنىڭ باۋىرىندا جاتىپتى. ول ۇيلەنگەن سوڭ, كامشات پەن تەمىربەك بولەك شىققاندا, تەمىربەك قولىنا ءوز اناسىن ەمەس, ۇلكەن شەشەسىن الادى. «تەمىربەك بار بولعانى 56 جاسىندا جامان اۋرۋدان قايتتى. مەن 50 جاسىمدا جەسىر قالدىم. تەمىربەكپەن باقىتتى ءومىر ءسۇرىپ ەدىم, ارقا سۇيەرىم بولدى. ءوزىم دە جاعاسىنا كىر جۋىتپادىم, اياق كيىمىن سۇرتپەگەن كۇنىم بولماعان شىعار. كوپ جىلادىم. سوندا «كامشات, اللانىڭ ىسىنە امال جوق, جىلاي بەرمە! بالالاردىڭ اماندىعىن تىلە, سابىر قىل!» دەپ وزەگىن جارىپ شىققان ۇلىنان ايىرىلىپ وتىرعان ەنەم باسۋ ايتىپ, مەنى قايراپ, جىگەر بەردى عوي. كەيىن ويلاپ وتىرسام, ءومىردىڭ ىستىق-سۋىعى ەنەمنىڭ ەكەۋىن دە بالتالاساڭ وتپەيتىن ەمەندەي قاتايتىپ جىبەرگەن ەكەن» دەپ ەدى كامشات اپاي ءبىر اڭگىمەسىندە. ول ارتىنان ەرگەن ابىسىن كەلىنى جاننا مەن ءوزىنىڭ كەلىنى اقمارالدى دا اۋلەتتىڭ ىنتىماعىن ۇستاۋعا باۋلىدى.
ول اتاعى اسپانداپ, ەلدىڭ ىقىلاسىنا بولەنسە دە, قاراپايىم قالپىنان دا, قاناعات, تاۋبەسىنەن تانبادى. ايتپاقشى, «جەلتوقسان جەلى» كامشاتتى دا شارپىپ وتكەن. كەڭەس وداعى كەزىندە دىنمۇحاممەد قوناەۆ كامشات دونەنباەۆاعا الماتىدان ءبىر پاتەر بەرگىزەدى. «كامشات, جينالىستارعا الماتىعا ءجيى كەلەسىڭ, دەمالىپ ءجۇر» دەپ, ءوزى سۇراماسا دا, سىيعا تارتقانداي بەرگىزگەن ەكەن. 1986 جىلى بيلىك باسىنا كولبين كەلگەن سوڭ, «ۆەچەرنيايا الما-اتا» گازەتىنە سىن ماقالا جاريالانادى. «قالالىقتارعا باسپانا جەتپەي جاتقاندا, كامشات دونەنباەۆاعا پاتەر بەرىلگەن, ول بوس تۇرادى» دەگەن ماسەلە ايتىلادى ماقالادا.
– كامشات بايعازىقىزى وسى ماقالاعا رەنجىدى. قوناەۆقا جابىلعان كىنا قالىڭداي تۇسەدى دەپ قامىقتى. «پاتەردى قايتىپ بەرەمىن» دەدى. مەن: «قايتىپ بەرمەڭىز, ءسىزدىڭ پاتەرىڭىز عوي, سىزدەن الىپ قويا المايدى» دەپ قايرادىم. بىراق كامشات پاتەردى قايتىپ بەردى. ول وسىنداي ءىرى مىنەزدىڭ ادامى ەدى, – دەيدى سايران بالكەن ۇلى. كامشات زەينەتكە شىققان سوڭ, بەس ۋاقىت نامازىن قازا ەتپەدى. اتاسى تاسباي 5-6 جاسىنان جاينامازىنىڭ شەتىنە قويىپ, نامازعا جىعىلدىرعان ەكەن. «مەن ورىستىڭ اراسىندا وسسەم دە, جۇمىس ىستەسەم دە, پارتيادا بولسام دا ىشكى رۋحىمدى بەرمەگەن اداممىن» دەگەن ەدى ول كوزى تىرىسىندە. دەنساۋلىعى جاراپ تۇرعاندا مەككەگە بارىپ, بەس پارىزدىڭ ءبىرىن ورىنداپ قايتتى. جاسى كەلگەن سايىن دانالىققا دا بەت بۇرعانداي ەدى.
كامشات اپا ءتورت پەرزەنتى سىرىم مەن اسقاردى, گۇلجان مەن گۇلشاتتى ەڭبەككە باۋلىدى, ناپاقاسىن ادال تابۋعا تاربيەلەدى. شوبەرەلەرىن كورىپ كەتتى. اۋرۋدىڭ ازابىن تارتىپ جاتىپ, ەندى ءوزىنىڭ بۇل دۇنيەلىك بولمايتىنىنا كوزى جەتكەندە بالالارىنا: «مەنى ەنەمنىڭ اياق جاعىنا, تەمىربەكتىڭ قاسىنا قويىڭدار. قويعان تاس تەمىربەككە, ەنەمە قويىلعان تاستان بيىك بولماسىن» دەپ وسيەت قالدىرىپتى. اقسۋات قورىمىنداعى سۇيەكتىڭ ءبىرى قازاقتىڭ ءبىر اسىلى, دانا ايەل ەكەنىن كەيىنگى ۇرپاق تا بىلە جاتار.
ءنازيرا جارىمبەت,
«ەگەمەن قازاقستان»
قوستاناي
