«جەزقازعان – جەرۇيىعىم جۇرەكتەگى...» اتتى جىر كەشى س.قوجامقۇلوۆ اتىنداعى قازاق مۋزىكالىق-دراما تەاترىندا ءوتتى. كەش شىمىلدىعىن اتالعان تەاتردىڭ ارتىستەرى پۋبليتسيست اقىننىڭ «قارا ورامال» اتتى پوەماسىن وزەك ەتكەن قويىلىممەن ءتۇردى. ايتا كەتۋ كەرەك, الەمنىڭ 13 تىلىنە اۋدارىلعان بۇل تۋىندى شۆەتسيادا وتكەن «Open Eurazian-2017» ادەبي فەستيۆالىنىڭ «پوەزيا» اتالىمى بويىنشا جۇلدەگەرى بولعان. اتىشۋلى «قارلاگ»-تىڭ قاپاسىندا تۋعان سابيلەردى انا قۇشاعىنان ج ۇلىپ الىپ, تور ىشىنە توعىتقان قاسىرەتتى جىلداردىڭ شەرىن ۇقتىرىپ, زارىن جەتكىزگەن ارتىستەردىڭ شەبەر ويىنى زال تولى كورەرمەننىڭ كوزىنە جاس الدىردى.
كەش – ساحنا تورىنەن ورىن العان اقىن جانە جۇرگىزۋشىنىڭ ەركىن ۇنقاتىسۋى پىشىمىندە جۇرگىزىلدى. سۇراقتارعا جاۋاپ بەرە وتىرىپ, اقىن عالىم جايلىباي بۇگىنگى كۇندە ءوزىن عانا ەمەس, قوعامدى تولعاندىرعان وزەكتى ماسەلەلەر توڭىرەگىندە وي تولعادى. ويعا العان جوسپارلارىمەن ءبولىسىپ, جىرلارىن وقىدى.
جەزقازعان قالاسىنىڭ اكىمى باتىرلان احمەتوۆ اقىندى مەرەيتويىمەن قۇتتىقتاپ, يىعىنا شاپان جاپتى, استىنا ات مىنگىزدى. بۇدان كەيىن مەرەيتوي يەسىن قۇتتىقتاۋشى قاۋىم كەزەك-كەزەگىمەن ساحناعا كوتەرىلىپ, لەبىزدەرىن جەتكىزىپ, وزدەرىنىڭ اقجارما تىلەكتەرىن ءبىلدىردى. ولاردىڭ قاتارىندا مەملەكەتتىك قىزمەت سالاسىنداعى وڭىرلىك حابتىڭ باسقارۋشى كوميتەتىنىڭ توراعاسى ءاليحان بايمەنوۆ, تانىمال تەلەجۋرناليست نۇرتىلەۋ يمانعالي ۇلى, اقىن, قازاقستان جازۋشىلار وداعى قاراعاندى وبلىستىق بولىمشەسىنىڭ توراعاسى سەرىك اقسۇڭقار ۇلى جانە جەرگىلىكتى زيالى قاۋىم وكىلدەرى بولدى.
عالىم جايلىبايدىڭ اۋەزدى جىرلارىنا جازىلعان اندەر دە كەڭ سارايدىڭ ىشىندە قالىقتادى. اسىرەسە, اقىننىڭ «ەسىل اعادى» ءانى كورەرمەن قاۋىمدى سارىارقانىڭ مايدا سالقىن سامالىنداي سەرگىتىپ, سىرلى سەزىم قۇشاعىنا بولەدى.
اقىن جىر كەشى باستالماس بۇرىن قالاداعى №8 مەكتەپ-گيمنازيانىڭ ۇستازدارى جانە وقۋشىلارىمەن جۇزدەستى. ءبىلىم ورداسىندا ول وسكەلەڭ ۇرپاق وكىلدەرىنىڭ سۇراقتارىنا جاۋاپ بەرىپ, ءوزىنىڭ سوڭعى كەزدەرى جازىلعان ولەڭدەرىن وقىدى. ودان كەيىن وقىرماندارمەن جۇزدەسۋ جەزقازعان قالالىق تاريحي-ارحەولوگيالىق مۇراجايى قابىرعاسىندا جالعاسىن تاپتى. بۇل جەردە اقىنمەن بىرگە ەرە كەلگەن قوناقتار جەزقازعان- ۇلىتاۋ ءوڭىرىنىڭ تاريحىنان سىر شەرتەتىن جادىگەرلەرمەن جانە قۇندى دەرەكتەرمەن تانىستى.
قايرات ءابىلدا,
«ەگەمەن قازاقستان»
قاراعاندى وبلىسى,
جەزقازعان قالاسى
