استانا قالاسى اكىمىنىڭ ءبىرىنشى ورىنباسارى سەرگەي حوروشۋن «نۇرلى جەر» باعدارلاماسى بويىنشا ۇلەستىك قۇرىلىستىڭ ماسەلەسىن شەشۋ جونىندەگى اكىمنىڭ تاپسىرماسىن جانە قالا تۇرعىندارىنىڭ قاۋىپسىزدىگى مەن جايلىلىعىن قامتاماسىز ەتۋ ءۇشىن جىلى ايالداما ورناتۋدىڭ جوسپارىن دايىنداۋ جونىندە باياندادى.
«وتكەن اپتادا ۆاك وتىرىسىندا 17 نىسان قارالدى. پروبلەمالى بولىپ تانىلعان «سۆەتلىي» تۇرعىن ءۇي كەشەنى پايدالانۋعا بەرىلىپ, 143 وتباسى پاتەرمەن قامتاماسىز ەتىلدى, وسىعان وراي پروبلەمالى نىساندار سانى 52-گە دەيىن قىسقاردى. «ەلوردا قۇرىلىس كومپانياسى» وكىلەتتى مەكەمەسىمەن سوت بويىنشا تقك-نە وتكىزىلگەن نىساننىڭ تەحنيكالىق ءاۋديتى مەن قارجىلاي جۇزەگە اسىرۋ تۋرالى كەلىسسوزدەر جۇرگىزىلىپ جاتىر», – دەدى س.حوروشۋن.
اكىم وسى ورايدا «نۇرلى جەر» باعدارلاماسىن بارىنشا اشىق جۇرگىزىپ, بارلىق كەلىپ تۇسكەن قاجەتتى اقپاراتتى رەسمي رەسۋرستارعا جاريالاۋدى تاپسىردى.
اسەت يسەكەشەۆ قالاداعى اۋدان اكىمدەرىنە اۆتوبۋس ايالداماسى بويىنشا ءبىلىم, دەنساۋلىق ساقتاۋ جانە الەۋمەتتىك قورقاۋ باسقارمالارىمەن بىرلەسىپ, جىلى ايالداما قۇرۋدىڭ جوسپارىن كەلىسۋ كەرەكتىگىن ايتتى.
«ەڭ الدىمەن جىلى ايالدامالار مۇمكىندىگى شەكتەۋلى جاندار مەن بالالارعا قولايلى, ياعني مەكتەپ, اۋرۋحانا, باسقا دا الەۋمەتتىك نىساندارعا جاقىن بولۋ كەرەك. وسى جىلى قاجەتتى دەگەن بارلىق جەرلەرگە 200 ايالدامانى كۇز-قىس ايى جاقىنداعانشا ورناتىپ ۇلگەرۋىمىز ءتيىس», – دەدى اكىم.
سونداي-اق, وسى 200 ايالدامانىڭ ءتىزىمىن استانا اكىمدىگىنىڭ رەسمي سايتىندا جاريالاپ, قالا تۇرعىندارىمەن بىرىگىپ تالقىلاۋ كەرەكتىگىن دە قۇلاققاعىس ەتتى.
توتەنشە جاعداي, سانيتارلىق-ەپيدەميولوگيالىق, قالانىڭ قازىرگى تىنىس-تىرشىلىگىن, جىلۋ ماۋسىمى جايىن قالا اكىمىنىڭ ورىنباسارى قوسمان ايتمۇحامەتوۆ باياندادى. ايتۋىنشا, وتكەن اپتادا جۇقپالى اۋرۋلار بويىنشا سانيتارلىق-ەپيدەميولوگيالىق احۋال تۇراقتى, باقىلاۋ دەڭگەيىنەن اسپاعان. جىلۋ دا شتاتتىق رەجيمدە وتۋدە. ەنەرگيا كوزدەرى ءنورماتيۆتى وتىن قورىمەن قامتىلعان.
مەملەكەتتىك-جەكەمەنشىك ارىپتەستىك جوباسىن ىسكە اسىرۋ, سمارت-سيتي, نارىقتاعى جانار-جاعارماي ماتەريالدارى مەن كومىر, «سەرگەك» بەينەباقىلاۋ كامەراسىن ىسكە قوسۋ تۋرالى قالا اكىمىنىڭ ورىنباسارى ماليكا بەكتۇروۆا ايتىپ شىقتى. ول نارىقتا كومىر مەن جانار-جاعارمايعا تۇراقتى مونيتورينگ جۇرگىزىلىپ, كۇن سايىن باقىلاۋدا ەكەنىن ايتتى.
استاناداعى قۇقىقتىق ءتارتىپتى قامتاماسىز ەتۋ شارالارى مەن كريمينالدىق احۋال بارىسىندا قالالىق ءىىد باسشىسى مارات قوجاەۆ ەسەپ بەردى.
«جالپى, استانادا وپەراتيۆتى احۋال تۇراقتى. وتكەن اپتادا 616 قىلمىس تىركەلدى. بۇل وتكەن جىلمەن سالىستىرعاندا 326 وقيعاعا ازايدى. ءىزى سۋىماي 90 قىلمىس اشىلدى, ونىڭ 54-ءى بۇرىن جاسالعان, بىلتىر – 36. 33 ناركوقىلمىس انىقتالدى, ونىڭ 8-ءى اۋىر قىلمىس. ىزدەۋدە جۇرگەن 5 قىلمىسكەر قولعا ءتۇستى, ءىز-ءتۇزسىز جوعالعان 6 ادام تابىلدى.
سوڭعى كەزدەرى الەۋمەتتىك جەلىگە قاتىستى ينتەرنەت-الاياقتار دا پايدا بولدى. وسىعان بايلانىستى, حالىق اراسىندا جانە رەستوران اكىمشىسى مەن يەلەرىنە ءتۇسىندىرۋ جۇمىستارى جۇرگىزىلىپ, ارنايى جادىنامالار تاراتىلدى», – دەدى م.قوجاەۆ.
قوعامدىق ترانسپورتتىڭ جۇمىسىن «استانا LRT» جشس باسقارما توراعاسى بەكمىرزا يگەنبەردينوۆ بايانداپ بەردى.
اسەت يسەكەشەۆ حالىقتىڭ قوعامدىق ترانسپورتتىڭ تەحنيكالىق جاعدايى مەن جۇمىسىنا قاتىستى ءالى دە الاڭداۋشىلىق بىلدىرەتىنىن ايتا كەلە, «AstraBus» ءموبيلدى قوسىمشاسى ارقىلى اتالعان ماسەلەلەردى ITS كومەگىمەن شەشۋ قاجەتتىگىن ايتتى. كاسىبي جۇرگىزۋشىلەردى دە دايىنداۋ جۇمىستارىن كۇشەيتۋدى تاپسىردى.
ەستەرىڭىزگە سالا كەتەيىك, استانا اكىمى اسەت يسەكەشەۆ 2018 جىلى جاياۋ جۇرگىنشىلەر جولىنا قاتىستى ماسەلەنى شەشۋدى تاپسىرعان بولاتىن. ياعني بارلىق ماگيسترالدى جولدارداعى جاياۋ جۇرگىنشىلەر جولىن الىپ تاستاپ, باعدارشام ورناتۋدى, «جاسىل تولقىن» دەپ اتالاتىن بىرىكتىرىلگەن كەدەرگىسىز ءوتۋدى قامتاماسىز ەتۋ, سونداي-اق جارىقتاندىرۋدىڭ قاتار ءجۇرۋىن تابىس ەتكەن. كىشىگىرىم كوشەلەردەگى جاياۋ جۇرگىنشىلەر جولىن قالدىرىپ, ولاردى جارىقتاندىرۋ كەرەكتىگىن ايتتى. بۇل ايتىلعان ماسەلەنىڭ ءبارى وسى 2018 جىلى شەشىلۋى ءتيىس.
قالانى اباتتاندىرۋ ماسەلەسى بويىنشا الماتى, ەسىل, سارىارقا اۋدانى باسشىلارىنىڭ باياندامالارى تىڭدالدى.
