استانا. 3 ءساۋىر. بەنديدەن (دوپتى حوككەي) رەسەيدىڭ حاباروۆسك قالاسىندا ءوتىپ جاتقان الەم چەمپيوناتىندا قازاقستان قۇراماسى قولا جۇلدەگە قول جەتكىزدى. وسىمەن وتاندىق بەنديشىلەر الەمدىك دودادا 6-رەت ۇزدىك ۇشتىكتەن كورىنىپ وتىر. بۇل تۋرالى egemen.kz حابارلادى.
ءۇشىنشى ورىن ءۇشىن بولعان تارتىستا قازاقستان فينليانديامەن وينادى. كەزدەسۋدىڭ ءبىرىنشى بولىگىن فيندەر 5:4 ەسەبىمەن ءوز پايدالارىنا اياقتادى. دەگەنمەن, ەكىنشى تايمدا قازاقستاندىقتار بەلسەندىلىك تانىتىپ, قارسىلاستار قاقپاسىن ءتورت مارتە ءدال كوزدەدى. ءوز كەزەگىندە, سكانديناۆتىقتار تەك ءبىر گولمەن عانا جاۋاپ بەرۋگە مۇمكىندىك تاپتى. ناتيجەسىندە, قازاقستان 8:6 ەسەبىمەن جەڭىسكە جەتتى.
بۇل ءبىزدىڭ كوماندا ءۇشىن الەم چەمپيوناتىنىڭ التىنشى قولا جۇلدەسى. سونىڭ سوڭعى تورتەۋىن قاتارىنان ولجالاعانىن ايتا كەتەيىك (2003, 2005 جانە 2012-2015 جج.).
بيىلعى سايىستا قازاقستان «ا» توبىندا ونەر كورسەتتى. توپتىق كەزەڭدەگى العاشقى ويىنىن ايدىن يەلەرىنە قارسى وتكىزگەن بەنديشىلەرىمىز 1:10 ەسەبىمەن ەسە جىبەردى. ەكىنشى ويىندا شۆەتسيادان 4:9 ەسەبىمەن جەڭىلدىك. ال ءۇشىنشى ماتچتا فينليانديادان پەنالتي ارقىلى باسىم تۇستىك (4:3).
شيرەك فينالدا بەلارۋس قۇراماسىن 26:8 ەسەبىمەن تاس-تالقان ەتىپ جەڭگەن قازاقستاننىڭ جارتىلاي فينالدا تاعى دا رەسەيمەن جولى ءتۇيىستى. بۇل جولى دا وتاندىق بەنديشىلەر ويسىراي جەڭىلدى (1:14). كەلەسى جارتىلاي فينالدىق جۇپتا فينليانديا مەن شۆەتسيا كۇش سىناسىپ, شۆەدتەر 10:1 ەسەبىمەن جەڭدى. ەندى ەرتەڭ رەسەي مەن شۆەتسيا الەم چەمپيونى اتانۋ ءۇشىن سىنعا تۇسەدى.
بەنديدەن الەم چەمپيوناتى 1957 جىلدان باستاپ وتكىزىلىپ كەلەدى. ەكىنشى الەمدىك دودا 4 جىلدان كەيىن, ياعني, 1961 جىلى ءوتتى. ال ودان كەيىنگى سايىستار ءار ەكى جىل سايىن ۇيىمداستىرىلىپ كەلدى. 2003 جىلى حالىقارالىق بەندي فەدەراتسياسى بۇل جارىستى جىل سايىن وتكىزۋ تۋرالى شەشىم شىعاردى. 2012 جىلعى الەم چەمپيوناتى الماتى قالاسىندا وتكەنىن ايتا كەتەيىك.
ەلامان قوڭىر.
دەرەك: egemen.ru.
سۋرەت: bandyvm2015.ru.