الماتى. 3 ءساۋىر. الماتى پوليتسياسى جىلجىمالى كريس-پ فوتورادار كەشەنىن ىسكە قوسادى. بۇل تۋرالى قالالىق ىشكى ىستەر دەپارتامەنتىنىڭ ءباسپاسوز قىزمەتىنە سىلتەمە جاساعان Tengrinews.kz ءتىلشىسى حابارلادى.
قۇقىق قورعاۋ ورگاندارىنىڭ مالىمەتىنشە, اتالمىش قۇرىلعى ءبىرىنشى كەزەكتە تەز جىلجىمالى بولۋىمەن ەرەكشەلەنەدى. الماتى پوليتسياسى وسىنى ەسكەرە كەلىپ, كريس-پ جىلجىمالى فوتورادار كەشەنىن پايدالانۋعا شەشىم ەتتى. پوليتسياداعىلاردىڭ ايتۋىنشا, ول ەندىگى جەردە اپات دەڭگەيى جوعارى جول ۋچاسكەلەرىن اۆتوماتتى تارتىپتە باقىلاپ, جولداعى جالپى احۋالدى جاقسارتۋعا سەپتىگىن تيگىزەدى. اۋەلگى كەزدە وسىنداي 10 كەشەن ىسكە قوسىلاتىن بولادى. ولار ورنالاسقان جەرلەرىن قالا جولدارىنداعى جاعدايدىڭ وزگەرۋىنە بايلانىستى اۋىستىرىپ تۇرادى.
«قازىر تۇراقتى تۇردە اپات دەڭگەيى جوعارى جول ۋچاسكەلەرىن انىقتايتىن ارنايى ساراپتاما جاسالىپ جاتىر. تاجىريبەگە سۇيەنسەك, كوپ جاعدايدا جول قوزعالىس ەرەجەسىن بۇزۋ دەرەكتەرى فوتو-ۆيدەوفيكساتورلاردىڭ كومەگىمەن انىقتالىپ ءجۇر. بۇل قۇرىلعى جولداعى اپاتتار مەن ودان زارداپ شەككەندەر سانىن ازايتۋعا كومەكتەسەدى», - دەيدى الماتى قالالىق ىشكى ىستەر دەپارتامەنتى باستىعىنىڭ ورىنباسارى جاندوس مۇراتاليەۆ.
ەسكە سالا كەتەيىك, اقپان ايىندا قازاقستاننىڭ تاۋەلسىز اۆتوموبيلشىلەر وداعى كريس-پ جىلجىمالى فوتورادار كەشەنى پايدا بولعانىن جەتكىزگەن ەدى. كەيىن ىشكى ىستەر دەپارتامەنتىنىڭ وكىلدەرى ونىڭ ازىرگە تەك سىناقتان ءوتىپ جاتقانىن حابارلادى.
تالعات ءسۇيىنباي.
دەرەك: Tengrinews.kz.
فوتو: Drive2.ru.