قازاقستان سىرتقى ىستەر ءمينيسترى ەرلان ىدىرىسوۆ ۆەنگريا پرەمەر-ءمينيسترى ۆيكتور ورباننىڭ قازاقستانعا رەسمي ساپارى اياسىندا استاناعا كەلگەن ۆەنگريا سىرتقى ەكونوميكالىق جانە سىرتقى ىستەر ءمينيسترى پەتەر سييارتومەن كەزدەستى.
كەزدەسۋ بارىسىندا تاراپتار ەكىجاقتى ىنتىماقتاستىق پەن حالىقارالىق كۇن تارتىبىندەگى كوكەيكەستى ماسەلەلەردى تالقىعا سالدى. ە.ىدىرىسوۆ ەكى مەملەكەت اراسىنداعى ارىپتەستىك قارىم-قاتىناستى نىعايتۋ مەن كەڭەيتۋگە قوسقان ەلەۋلى ۇلەسى ءۇشىن ءوز ارىپتەسىنە العىسىن ءبىلدىردى. ەستەرىڭىزگە سالا كەتەيىك, ءۇستىمىزدەگى جىلعى 19-20 اقپان كۇندەرى پ.سييارتو استاناعا رەسمي ساپار جاساپ, ونىڭ شەڭبەرىندە ەكى ەل سىرتقى ساياسات ۆەدومستۆولارى اراسىندا 2015-2016 جىلدارعا ارنالعان جۇمىس جوسپارىنا قول قويىلعان بولاتىن.
ۆەنگريا قازاقستاننىڭ ورتالىق-شىعىس ەۋروپاداعى جانە ەۋروپالىق وداقتاعى ماڭىزدى ارىپتەسى بولىپ تابىلادى. ەكى مەملەكەت اراسىندا كۇردەلى ماسەلەلەر جوق, ال حالىقارالىق كۇن تارتىبىندەگى وزەكتى ماسەلەلەر بويىنشا ۇستانىمدارى ۇقساس نەمەسە باعىتتاس كەلەدى. بۇگىندە قازاقستان مەن ۆەنگريا اراسىنداعى ساياسي ۇنقاتىسۋ جوعارى دەڭگەيگە كوتەرىلىپ وتىر. قازاقستان پرەمەر-ءمينيسترى ك.ءماسىموۆتىڭ 2014 جىلعى ماۋسىم ايىندا ۆەنگرياعا ساپارى بارىسىندا ستراتەگيالىق ارىپتەستىك جونىندەگى دەكلاراتسياعا قول قويىلىپ, ونى ىسكە اسىرۋ ەكىجاقتى قارىم-قاتىناسقا وڭ ىقپال بەرۋى ءتيىس.
سونىمەن قاتار, كەزدەسۋ اياسىندا قازاقستان – ۆەنگريا ستراتەگيالىق كەڭەسى جۇمىسىنىڭ ماڭىزدىلىعى اتاپ ءوتىلدى. ەكونوميكا سالاسىندا دا قاجەتتى كەلىسىمدىك بازانىڭ بار ەكەنى ايتىلدى. استانادا «ۆەنگريا ساۋدا ءۇيى» قۇرىلىپ, يندۋستريا جانە يننوۆاتسيا جونىندەگى جۇمىس توبى قىزمەتىن باستادى.
ە.ىدىرىسوۆ ەو مەن ەاەو اراسىندا ىنتىماقتاستىق ورناتۋ ورايىنداعى ۆەنگريانىڭ ءرولىن ەرەكشە اتاپ, «ۆەنگريا ەكى وداق اراسىنداعى قارىم-قاتىناستى ورنىقتىراتىن كوپىرلەردىڭ بىرىنە اينالۋى مۇمكىن» ەكەنىن كولدەنەڭ تارتتى. سونداي-اق, ول ۆەنگريا پرەمەر-ءمينيسترى ۆ.ورباننىڭ ساپارى بارىسىندا قازاقستان باسشىلىعىمەن جوسپارلانعان كەزدەسۋلەر اشىقتىق جانە ءوزارا تۇسىنىستىك رۋحىندا «ساعات سالىستىرۋعا» مۇمكىندىك بەرىپ, قازاقستان مەن ۆەنگريا اراسىنداعى ءوزارا ىقپالداستىقتى بارلىق باعىتتار بويىنشا تەرەڭدەتۋگە ايتارلىقتاي سەرپىن بەرەتىنىنە سەنىمىن ءبىلدىردى.
«ەگەمەن-اقپارات».